ЕГЭ-2023. Ӱгредiг чылы тоозыл парғанда, пiрге хазна сыныхтағлары ирт парғанда, улуғ нимес салтар идерге чарир

Пӱӱл Хакасияда 2 муң азыра олған 11 класс тоосты. Оларның он азыра кiзiзi ЕГЭ-ны 100 баллға тудыбысхан! Иң кӧп Ағбанда.

Чалтырама салтар Н.Ф.Катановтың адынаң Хакас национальнай гимназия-интернаттың ӱгренҷiзi Данил Попияков кӧзiткен. Ол орыс тiлi паза тархын предметтерҷе сыныхтағны иң пӧзiк баллға тудыбысхан. Пӱкӱлее 200 балл чыып алған! Амды саарбах англия тiлiнең салтар сахтапча. Ол iдӧк пӧзiк поларына iзенче.

Данил гимназиязар 5-ҷi классха килген, социально-гуманитарнай кӧстеглiг класста ӱгренген. Позы Ағбаннаң.

– Пу кӧстег минiң чӱрееме чағын. Ағаа хоза, аннаң мин чуртазымны палғалыс­тырарға пӧгiнчем. Мин дипломат поларға сағынчам. МГИМО-зар кiрербiн. Анда тархынны паза обществознаниенi тирең ӱгренчелер, – чоохтапча оол.

Данил «Чиит дипломаттар» клубтың ӧткiн араласчызы полча. Iкi хати Россияның пасха хан киректерiнҷе министерствозынзар чӧрген, аның уcтағҷызы Сергей Лавровнаң тоғасхан паза сурығлар пирген. Гимназияда клуб азыл парғанда, пасха хан киректерiнҷе айғазар кӧңнiм улам тыып парған тiпче Хакасияның иң артых ӱгренҷiзi.

Данил тархын паза орыс тiлi предметтер олимпиадаларының муниципальнай чардығының чиңiсчiзi, Катановтың хығырығларының призеры, «Страница 22» марығның чиңiсчiзi полча паза даа пасха марығларда сыйыхтығ орыннарға турысхан. Пис кӧг тириинең ойнапча: гитара, фортепиано, ксилофон, балалайка, аккордеон. Искусство школазын ол ирткен чылда тоосхан. Iдӧк ӧткiн оолах спортнаң айғасхан. Грек-рим кӱрес секциязына 4-ҷi класстаң чӧрген. Чахсы салтарлар кӧзiтчеткен оолахты тренерлер профессиональнай спортха алып аларға пӧгiнчеткеннер, че Данилнiң сӧбiрезi ӱгредiге хайығ саларға чарадығ алған. Iдӧк ол нинҷе-де тус пауэрлифтингнең айғасхан.

– Гимназия ӱгренҷiлерге чайаачызын, спорттағы устарын тилiдерге чахсы оңдай пирче. Кем хынча, ол мында прай саринаң узын тилiтче. Мин школазар сигiс час иртен килiп, аннаң харасхы пол парза ла сыхчаңмын. Пастап уроктар, музыка школазы, иирде, тiзең, кӱреске парҷаңмын. Пасхазы, городта чуртапчатханнар, уроктар соонаң иблерiнзер парғлабысчаңнар. Иң пастап мин ууҷам Лариса Михайловна Кичееваа алғызым читiрчем. Мин ибзер орай айланзам, ол узупчатхан полча. Столда татхыннығ чиис артыс салҷаң. Иртен – iдӧк. Тоғысха парар алнында пiске туңмаҷаамнаң стол тимнеп салған полча. Iдӧк гимназияның устағҷызы, тархын предметтiң ӱгретчiзi Лилия Олеговна Ахпашеваа паза орыс тiлi предметтiң ӱгретчiзi Екатерина Владимировна Субраковаа алғызым читiрчем. Мин экзаменнерде чахсы салтар кӧзiткенi iдӧк оларның чидии. Олар миннең хада уғаа кӧп тус паза кӱс хоратханнар! – ӧрiнiзiн чазырбинча чиит оол.

Пуох ӱгредiг организациязының ӱгренҷiзi Аланго Сунчугашева чалтырама салтарға читкен. Ол гуманитарнай кӧстеглiг класста ӱгренген. Орыс тiлiнең ЕГЭ-ны 100 баллға тудыбысхан, тархын предметче, тiзең, 89 баллға. Халғанҷызы cалтарынаң чиит хыс сыныхтағ комиссиязынаң чараспаан, аппеляциянаң айланған. Сыныхтағлар соонаң ағаа 2 балл хос пиргеннер! Аланго олимпиадаларда, чайаачы марығларда сыбыра араласчаң. Iдӧк ол «Чиит дипломаттар» клубтың ӧткiн араласчызы полча. Ол МГИМО-зар кiрерге пӧгiнче.

Хайди искiрче Хакасияның ӱгредiг паза наука министерствозы, пӱӱл орыс тiлiнең 15 пала экзаменнi 100 баллға тудыбысхан! 11 ӱгренҷi Ағбаннаң, Харатастаң – 2, Ағбан пилтiрiнең паза Сорығдаң – 1-ер. Олғаннар химия, литература паза география предметтерҷе чахсы пiлiстер кӧзiткеннер. Географияҷа 81 – 100 балл алып алғаннарның саны илееде. Ирткен чылда чох полған. Пу предметче экзаменде Ағбандағы 1 № школаның ӱгренҷiзi Дарья Быкова чахсы салтар кӧзiт пирген. Орыс тiлiнең ЕГЭ-ны ол 100 баллға тудыбысхан. Чиит хыс Уфадағы университетсер «нефте-газовай геология» кӧстегҷе кiрерге пӧгiнче. Литератураҷа 18 пала чахсы балл чыып алған, ирткен чылда – 9. Химиянаң андағох кирек.