Iстенiс рыногы. Пӱӱл республикадағы предприятиелер тиксi Россиядағы тоғыс табарынҷа ярмаркада 1800 тоғыс орнын пирiп араласханнар

Тиксi Россиядағы тоғыс табарынҷа ярмарка пӱӱл «Демография» национальнай проект полызиинаң иртiрiлген. Хакасияда «Россиядағы тоғыс. Оңдайларнаң тузаланҷаң тус» ярмарканың регион синiндегi чардығы пӱӱл апрельде полған, анда площадкалар ӱс городта паза пiр аймахта тӧстелгеннер.

Ярмарканың хазна синiндегi чардығы, тiзең, хай-хай алғым иртiрiлген. Анда тиксi республикада 13 площадка тӧcтелген, прай городтар паза 8 аймах араласхан. Тоғыс чох кiзiлерге тоғыс пирчеткен улуснаң посха чоох алызар оңдай полған. Iдӧк пос киреен хайди тӧcтеп аларынҷа паза чонға тоғыс тапчаң cлужбадағыларның чӧптерi пу мероприятиеде улуғ кирексiнicнең тузаланылған.

Ярмарканың пайрамнығ чардығында чоох тутхан Хакасия пазының орынҷызы Михаил Побызаков.

– Пӱӱн республикада iстенiс рыногында кирек чахсы парча. Июньда тоғыс чохтарның саны пiр процентке тиңнелген, анзы халғанҷы 10 чыл аразындағы танығларның иң тӧбiн саны полча. Пу республика правительствозы iстенiс рыногын тилiдерiнҷе паза чонға тоғыс табарға хабазарынҷа апарчатхан тоғыстың салтары полча. Iзенчем, пу ярмарка тоғыс чохтарға даа, iдӧк тоғыс пирчеткеннерге дее сидiкciнiстерiн пӧгерге полызар, – таныхтаан Михаил Анатольевич.

Мероприятиеде посха тоғыс тiлепчеткен 1810 кiзi араласхан, ол санда студенттер. Хакасиядағы 97 предприятие (ол санда «РМ Рейл «Абаканвагонмаш» АО, «НК «Роснефть» ПАО, «Саянмолоко» ООО, «Бентонит Хакасии» ООО, «Русал Саянал» АО улуғ предприятиелер) 1911 тоғыс орнына iстенҷiлер киректелчеткеннеңер искiрген. Хайди кӧзiткен ярмарка, регионда тоғысчы специальностьтығлар иң не киректелчелер. Кӧзiдiмге, тимiр хабыстырҷаң устар, бетонщиктер, электромонтажниктер, водительлер.

Ярмаркадағы наа ниме – промышленнай предприятиелерде экскурсиялар иртiрерi. Экскурсия тузында предприятиеде ол-пу ниме-ноо хайди сығарылчатханынаң таныстырчалар. Че Хакасия промышленностьта ла тохтабасха чаратхан. Азынада пазын салып, кiзiлерге экскурсияа пекарнязар, аалҷы тураларынаң айғасчатхан предприятиелерзер, Культура тураларынзар, котельнайларзар паза садығ тураларынзар чӧр килер оңдай полған.

Студенттер дее хайығ чох халбааннар. Олар Хакасиядағы аймах кӧстеглерҷе тоғынчатхан ӱгредiг организацияларынаң танысханнар. Iдӧк оларға хайди маңнаныстығ полып алардаңар, опыт чох кiзее iстенiс рыногында пасхазына хайди конкурент полып алардаңар паза пасха даа сурығларҷа лекциялар иртiрiлген. Аннаң пасха, студенттер практика иртерге тоғыс орнын таап алар оңдайнаң тузаланғаннар.