Крематорий орны ам даа таныхталғалах
23.06.2023
Хабарлар
Аннаңар искірче Хакасия пазының орынӌызы Юрий Курлаев. Пасха искіріглер - ол олаңай чоохтар.
Республика чуртағӌылары Хакасия правительствозынзар “Единая Россия” партияның Саяногорсктағы пöлиинің малларға крематорийні Пии аймаанда, Саяногорсктаң ырах ниместе, пӱдірерге пöгінчеткеннеңер искіріг сын алай тайма полчатханын чарыт пирерге айланчалар. Хакасия правительствозы искіриинең, крематорийнің пӱдіріг орны ам даа кöрілбеен, пасха искіріглер, тізең, олаңай чоохтар полча.
- “Единая Россия” партияның Саяногорсктағы пöлии город чуртағӌыларына сыныхталбаан, пір дее чарадыға тöстенминчеткен саба искірігні таратча. Тик чирдең суум-саам кöдіргені хорғыстығ паза чарабас кирек. Йа, правительствода малларға крематорийні пӱдірӌең чир участогын тілирінӌе тоғыс апарылча. Пӱӱн муниципалитеттердең чöптер чыылған, олар ӱзӱрілчелер, че хайда пӱдірері ам даа чарадылбаан, - чарытча республика пазының орынӌызы Юрий Курлаев.
Хакасия пазы Валентин Коновалов хандых айының 20-ӌi кӱнінде Харатаста öлген малларға крематорий тоғызын тохтадарға чаратхан. Хандых айының 21-ӌі кӱнінең имнег киреенің похсағын на чох итчелер. Оларны хайди даа чох идерге киректелче, республикада, тізең, ол кирекке килістіре пасха орын чоғыл.
Хакасия пазы малға крематорийні пасха, чон чуртапчатхан орыннарға хорғыстығ нимес, орында пӱдірерге пöгін турғысхан.
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
