Піс ундубаанда – олар тіріглер
23.06.2023
Хабарлар
Чахайахтар салчатхан туста
Хумартхылас паза чобағ кӱні. Киҷее Ағбанда Чиңіc паркында «Піс ундубаспыс» халых чӧрімі ирткен
Ағбандағы Чиңіc паркынзар иртен 10.00 часха кізілер, хызыл гвоздикалар тудынып, чыылысханнар. Оларның аразында республика ӱлгӱлері, депутаттар, халых организацияларының кізілері, чиит армеецтер, чааҷылар паза даа пасхазы полғаннар.
Пӱӱл пірдеезі чоох тутпаан. Чииттер, Успас от хыринда турып, Илбек Ада чаада чат халған чааҷылардаңар паза олар хайдағ матыр полғаннаңар кибелістер хығырғаннар.
22 июнь – Ада чир-суубыстың тархынында иң чобағлығ кӱннернің пірсі. Ол кӱнде, 82 чыл мының алнында, пістің город-аалларның амыр чуртазын Илбек Ада чаа сайбаан. Пір саңай миллионнар сӧбірелер чуртазы изелген, нинҷе чиит улустың таңдағы ӱлӱзі чіткен.
Хумартхылас паза чобағ кӱнінде піс фашист азымахчыларынаң тоғыр хазыр кӱрезігде чуртастарын пир салған, піске Чиңіc ағылған паза амыр чуртас сыйлаан совет чааҷылары алнында пастарыбыс тӱзірчебіс.
1941 чылның 22 июньында чир ӱстӱ муңар бомбаларның чара чачыразына матап тітіреен. Ыырҷыны удурлаан совет чааҷылары пос Чир-суу, паба-іҷелері, палалары ӱчӱн хорыхпин чааласханнар. Ол ханнығ чаа пістің чонның иң хорғыстығ сынаа полған, хайзынаң ол турыстығ чиңіcнең сыххан. Пістің совет чааҷыларыбыстың матыры хаҷан даа ундулбас.
Піс олардаңар, хаҷан даа ундутпин, палаларға чоохтап пирерге кирекпіс, палаларыбыс соондағы тӧллерге читірер ӱчӱн! Матырларға хаҷанға даа сабланыс!
Олғаннар андағ хыйғылар искірген соонаң чаада чуртастарын пир салғаннарны сағысха киріп, пір минута сым турары чарлалған. Анаң килген чон Успас от хыринзар тіріг чахайахтар салған. Иң пурун порчолар салғаннар Хакасия пазы Валентин Коновалов паза республиканың Ӧӧркі Чӧп кнезі Владимир Штыгашев.
Хакасия паза Алтай республикаларның саблығ артизі Артур Марлужоков чаа тузынаңар сарын толдырған.
Сом Дмитрий Сунчугашевти
Автор :
Илья ТОПОЕВ
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
