ЛИТЕРАТУРАҶА АХЧАЛЫҒ СЫЙЫХТАР ЧИТІРЕРІ АЛЫСТЫРЫЛАР
16.06.2023
Хабарлар
Ӧӧркі Чӧп. Хакасияның Ӧӧркі Чӧп кнезі Владимир Штыгашев президиумның теестегі чыылиин иртірген
Ӧӧркі Чӧп президиумы пу чыылығда онға чағын сурығ ӱзӱрібіскен.
Пастағы сурығҷа Хакасияның экономика тилізі министрінің орынҷызы Елена Кисуркина чоох тутхан. Хайди ол чарытхан, «Хакас Республикадағы промышленнай политикадаңар» республика законынзар алызығлар федеральнай законодательство алыс парғаны сылтаанда кирілчелер.
Закон проектінҷе технопарктарға паза ол инвестпроектте араласчатхан инвесторларға полызар кӧстегнең республика правительствозының полномочиелерін алғыдыбызары кӧрілче. Кӧзідімге, министрлер кабинедіне индустриальнай, промышленнай технопарктарнаң, кластерлернең устапчатхан компанияларны паза ӧнетін инвестициялығ контракт иткен инвесторларны улам чахсы тоғынарға кӧӧктірчеткен оңдайлар турғызарынҷа хоза полномочиелер пирілер.
Пу кӧстегҷе тоғыс апарғаны республиказар инвесторларны тартар паза «Хакас технология ойымы» осхас алынҷа экономика зоналарын тӧстиріне полызар тіп кӧрілче. Ӧӧркі Чӧп президиумы закон проектінең чарас салған.
Ікінҷі закон проекті литератураҷа премияларнаң палғалыстығ полған. «Культурадаңар» республика законынзар хайдағ алызығлар кирілчеткенінең Хакасияның культура министрі Светлана Окольникова таныстырған.
– Піcтің республикада литератураҷа ікі ахчалығ сыйых читірілче: поэзияҷа Моисей Баиновтың адынаң паза прозаҷа Николай Доможаковтың адынаң, – искірген министр. – Че оларның сині пӱӱнгі кӱнде инфляцияны, культурадағы чидіглерні паза поэзия, проза произведениелерін чайаҷаң оңдайларны санға албинча.
Аны хоостыра культурадаңар законзар алызығлар киріп, литератураҷа ахчалығ сыйыхтарны чыл сай нимес, теести ікі чылда пір хати пирері кӧрілче. Кӧзідімге, пір чылда Моисей Баиновтың адынаң премия пирілер, пазағы чылда – Николай Доможаковтың адынаң. Олох туста ахчалығ сыйыхтарның сині ікі хати ӧскірілер: 100 муң салковайдаң 200 муң салковайға теере.
– Ахчалығ сыйыхтарның синін ӧскіргені паза ідӧк оларны теестеп читіргені оларның статузын кӧдірер, чапсых паза амғы тусха килістіре полчатхан книгаларны сығарарына хабазар, – таныхтаан Светлана Окольникова. – Закон проекті республика бюджедінең хоза хорадығлар кирексібес.
Президиумдағылар литератураҷа ахчалығ сыйыхтарны читірҷең оңдайны паза оларның синін алыстырарынаң чарас салғаннар.
– Піс ол чарадығны 2006 чылда алғабыс, хаҷан культурадаңар закон алылғанда, – теен Ӧӧркі Чӧп кнезі Владимир Штыгашев. – Пістің чайаачыларыбысха хабазарға кирек тіп санапчам.
Чыылығның пасха сурығлары федеральнай закон проекттеріне ӱндезерінең паза пасха регионнарның пастағларына, айланыстарына хабазарынаң палғалыстығ полғаннар. Кӧзідімге, пір федеральнай закон проектінҷе (автор – Хазна Думазынын депутады Михаил Делягин) налогтарны тӧлеҷең пірге кӱнні ӱс кӱнге алнынзар чылдырыбызары кӧрілче: 28-ҷі кӱннең 25-ҷі кӱнге.
Амғы туста налогтарны тӧлеҷең кӱн – ай сай 28-ҷі кӱнде. 2023 чылның 1 январьынаң пірге налог счеды тоғын сыхханда, ол ахчалар Тула облазынҷа федеральнай казначейство пастыра иртчелер. Іди регионнарның паза муниципалитеттернің бюджеттерінзер олар 30-ҷы алай 31-ҷі кӱнінде ле кірчелер. 28-ҷі кӱн тынағ алнындағы кӱнге алай тынағ кӱніне киліс парза, бюджетсер парыстарны кирері пазағы айға чылдырыл парчаттыр. Анзы кассада путхалыстарға ағылча. Аннаңар Хазна Думазының депутады налогтарны тӧлеҷең пірге кӱнні сала ирте тусха турғыс салар чӧпнең сыххан.
Ӧӧркі Чӧп президиумы апрель айда пірге налог счедынҷа тӧлир оңдайның читпестерін чох идер, ол санда налогтарны тӧлеҷең пірге кӱнні 25-ҷі алай 26-ҷы кӱнге алнынзар чылдырар, чӧпнең Россия правительствозының кнезі Михаил Мишустинзер айланған полған. Пу федеральнай закон проекті оларның чӧбіне килістіре. Аннаңар олар пір ӱннең ағаа хабазарға чаратханнар.
Сом Ӧӧркі Чӧп сайтынаң
Автор :
Альберт ТОЛМАШОВ
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
