ХАБАЗЫҒ КИРЕКСІПЧЕТКЕННЕРГЕ ПОЛЫСЧАЛАР
16.06.2023
Хабарлар
Михаил ПОБЫЗАКОВ Светлана КОКОВАА
Хакасия пазының алғыстазын читірген
Сыйыхтас. Социальнай тоғынҷы кӱнінде Хакасияның правительство туразында пу киректе маңнаныстығ істенчеткеннерні таныхтааннар
Хакасия пазының орынҷызы Михаил Побызаков регионның социальнай кирее тилізіне улуғ хозым иткен кізілерге Хакасия правительствозының Аарластығ пічиин читірген. Оларның санында полғаннар: Хакасияның істеніс паза социальнай арачыланыс министрі Татьяна Раменская, пуох министерствоның право паза кадрлар тоғыстары департаментінің ӧӧн эксперті Магдалина Орлова, пӧлік орынҷызы Ирина Котнякова, «Бюджет сананызы паза сан пирізі» Хакас Республиканың хазна казённай учреждениезінің устағҷызы Наталья Алипина, «Ветераннарның Ағбандағы пансионады» пірігіс» Хазна автоном учреждениезінің тоғынҷызы Светлана Вологжанина, «Теремок» республиканың олған тура-интернады» Хакасияның хазна бюджет учреждениезінің воспитательі Наталья Ивченко паза методист Инна Хорошавцева, «Хакас протез-ортопедия предприятиезі» акционер пірігізінің ӧӧн директоры Игорь Судьин.
Хакасия пазының алғыстазы 13 кізее читірілген. «Теремок» республиканың олған тура-интернады» хазна бюджет учреждениезінің логопеді Светлана Кокова, дефектологы Валентина Садыкова, воспитательі Татьяна Шолохова, «Чонға социальнай полызығ пирҷең управлениезі» Хакасияның хазна казённай учреждениезінің Асхыс аймаанҷа пӧлии пастығының орынҷызы Марина Кыскаракова паза пуох учреждениенің Таштып аймаанҷа пӧлиинің сӧбіре политиказы пӧлии пастығы Светлана Майтакова мындағ сыйыхха турысханнарның санындалар.
Хакасия пазының орынҷызы Михаил Побызаков социальнай киректе істенчеткен тоғынҷыларға алғызын читірген.
– Пістің социальнай тоғынҷыларыбыс тиксі республикаҷа муңарлап чуртағҷыбысха чӱзерлеп азыра аймах полызығ пирчелер. Чағынғы кізее полызығ – уғаа кирек тоғыс, хайзына полған на кізі сыдан полбас. Полғаны ла полыс полбинча паза кізее ачын полбинча. Социальнай тоғынҷыларның пу хылии пар.
Полызығ алчатхан муңарлап чуртағҷының алғызын прайзына алғапчам! Хазых полыңар, сағынған сағыстарың толзын, чуртазыңарда кӧп ӧрініс ползын! – теен Михаил Побызаков.
Татьяна Раменская Хакасия правительствозының Аарластығ пічиин алған ӱчӱн алғызын читірген. Аның чооғынаң, мындағ улуғ сыйых аның на нимес, ол министерствоның паза социальнай тоғынҷыларның салтары.
– Аарлығ хада тоғынчатханнар! Хакасияның істеніс паза социальнай арачыланыс министерствозы паза позымның адынаң профессия ӱлӱкӱнінең – Социальнай тоғынҷы кӱнінең – алғыстапчам!
Піске нандырығлығ тоғыс пирілген – кізілерге полызарға. Піс уғаа кирек тоғыс толдырчабыс. Чуртастың сидік оңдайларын тобыр полбинчатхан, хабазығ кирексіпчеткен кізілерге полысчабыс. Иң пастап ол улуғ частығларға, кинек кізілерге, олғаннарға, кӧп палалығ сӧбірелерге паза уйан чуртапчатханнарға теелче. Пістің тоғызыбыс кирексіністе.
Пу ӱлӱкӱнде сірерге полызығ кирексіпчеткен кізілернің чуртастарына хайчатхан, сағыссырапчатхан ӱчӱн алғызым читірчем! Тоғызыңарны аннаң андар нандырығлығ толдырарға паза часкалығ поларға алғапчам! Чӱрееңерде чылығ хайраллалзын паза аны чонға сыйлаңар! – алғыстаан социальнай тоғынҷыларны Татьяна Раменская.
Светлана Кокова «Теремок» республиканың олған тура-интернадында 15 чыл тоғын салған. Пастағы 3,5 чыл ол нянечка полып істенген, анаң – воспитатель. Халғанҷы пір чыл логопед полча.
– Логопедке Хакас хазна университедінде ӱгреніп алғам. Олох туста «Теремокта» тоғынғам. 38 паланы ӱгретчем. Піреезі чоохтанминча, піреезі уйан тіл алысча. Аймах ағырығлығ палалар. Ӱс час толдыр салған палаларны ӱгредіп пастапчам. Мин «Альтернативная коммуникация» методиканаң тузаланчам. Чоохтаспинчатхан олғаннарны холнаң кӧзідіп чоохтанарға ӱгретчем.
Ӧӧні – піс хынызыбысты палаларға сыйлапчатханыбыс. «Теремокта» тоғынчатхан полған на кізі, нянечкадаң ала устағҷаа теере, палаларға хынызын читірче. Андағы прай олғаннар сӧбіре чохтар, аннаңар хайығны паза хынысты кирексіпчелер. Піс оларны прай саринаң тилідерге паза оларға хыныс сыйлирға кӱстенчебіс, – теен Светлана Кокова.
Валентина Садыкова олох учреждениеде дефектолог полча. Ол 18 чыл воспитатель полып тоғын салған. Пастап олған туразында істенген, халғанҷы 15 чыл – «Теремокта». Валентина Арсентьевна Ағбандағы ӱгретчілер институдын тоосхан, анаң Новосибирсктегі хазна университедінде «Дефектология» кӧстегҷе ӱгреніп алған.
– Мин стационарда тоғынчам. Пӱӱнгі кӱнге анда 62 пала чуртапча. Оларны прайзын ӱгретчем. Пеер олғаннар пала тӧрітчең турадаң кіріп, 23 час толдырғанҷа чуртапчалар.
Пір паланы ӱгредеріне кӱнде 20 минута хоратчам, неделяда – ікі хати. Стационарда палаларнаң пасха даа специалисттер (психолог, логопед, социальнай ӱгретчі) тоғынчалар.
Олған туразында тоғынғанымда, кічіг палаларнаң айғасчаңмын. Оларға кӧп хайығ, иркеледіс киректелген. Амды мин школаа парарға тимненчеткен олғаннарнаң тоғынчам, – теен Валентина Садыкова.
Сом Дмитрий СУНЧУГАШЕВТИ
Автор :
Оксана ЧЕЛТЫГМАШЕВА
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
