ОПЕРА «ЧЫЛТЫСТАРЫНЫҢ» АЛҒЫСТАЗЫ
09.06.2023
Хабарлар
Культура. Хакас Республика кӱнінде, 3 июльда, регионның чуртағҷыларын тилекей опера сценазының «чылтыстары» алғыстир
Mladеn Prodan (тенор, Сербия), Моол чирінің паза Бурятия Республиканың саблығ артизі Ариунбаатар Ганбаатар (баритон, Монголия), Россияның саблығ артизі Татьяна Павловская (сопрано), Северная Осетия-Алания Республиканың чон артизі Анна Кикнадзе (меццо-сопрано), Луганск Чон Республиказының саблығ артизі Сергей Чуйков (баритон) – кӧрігҷілернің мындағ илбек чайаачыларның устарын кӧріп алҷаң оңдай пар.
Концертте Хакас Республиканың чон артизі, Алтай Республиканың саблығ артизі Артур Марлужоков (бас-баритон) аралазар. Ідӧк чайаачы кӧзідиин Москвадаң килген аалҷы, скрипканаң ойнапчатхан ус, чоннар аразындағы марығларның чиңісчізі Пётр Федотов сыйлир.
Илбек артисттернің сарыннарын В.Г.Чаптыковтың адынаң Хакас филармонияның симфоническай оркестрі cіліг кӧглернең чазир. Дирижер – Хакасияның чон артизі, Хакасия искусствозының саблығ деятельі Вячеслав Инкижеков.
Хакас чирінде Республика кӱніне чарыдылған гала-концертті иртірерге «Майрых разрезі» хара тас аныҷаң компания паза КОУЛСТАР холдинг полысчалар.
Ағаа хоза, Республика кӱніндегі ӧӧн концертнең регионда 2 июньнаң 3 июльға теере парчатхан Опера искусствозының фестивальы тоозылар. Фестивальның паза гала-концерттің хоос устағҷызы – Россияның саблығ артизі, Мариинскай театрның ырҷызы Татьяна Павловская.
Опера искусствозы фестивальның тӧстегҷізі – Хакасияның культура министерствозындағы республиканың кӧг искусствозына хабазығ пирчеткен чыынды. Проект грант полызиинаң чуртасха кирілче. Аны «Россиядағы культура чыындызы» тиксі Россиядағы халых-хазна организациязы «Культура» национальнай проекттің «Чайаачы кізілер» федеральнай проекті хоостыра читірген.
Сом Интернеттең алылған
Автор :
Аскар АРТАМОНОВ
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
