Кӱн суриинда - Хакасияның тилізі
03.06.2023
Хабарлар
Пӱӱн Н.Г. Доможаковтың адынаң Хакас национальнай библиотекада стратегия сессиязы иртче. Улуғ залда республиканың паза орындағы ӱлгӱ органнарының кізілері, депутаттары паза халых пірігістерінің кізілері чыылыс парғаннар.
Кӱн суриина Хакасияның таңдағы тиліс оңдайлары сығарылған. Россиядаң тоғыр хатығластар экономикабысха ӱрег ағыларға кöрілгеннер, че хазнабыс прай саринаң арачыланча, наа оңдайлар таапча паза тилирін узаратча. Стратегия сессиязын Хакасияның экономика тилізі министерствозының халых чöбі тимнеп иртірче. Аның ööн пöгіні - пу хатығ оңдайларда тиліӌең наа оңдайларны таап, оларны республиканың 2030 чылға теере тиліс стратегиязына кирерге.
Хакасия пазы Валентин Коновалов стратегия сессиязының араласчыларына республиканың Тиліс стратегиязының ööн кöстеглерін хати таныхтаан: кізі паза аның оңдайлары; чахсы экология; чир-чайаан ис-пайынаң палғалыстығ нимес экономика; амғы инфраструктура; культура ис-пайы.
Владимир Штыгашев, Хакасияның Ööркі Чöп кнезі, республиканың экономиказының паза промышленнозының тилізінің пурунғыдаң амғы тусха теере тархынын сағысха киріп, чирібістің илбек пайы парына хайығ айландырған. Аның кöрізінең, кізі тоғыс орнында, пос ізебіне тоғынмин, чиріне, чонына туза ағыларға кирек. Ööнінде ол пастыхтарға теелген, хайзылары, хазна чахығларын толдырып, ідöк постарына ахча “суур”турғаннарын (Россия Таможнязының пастыхтарын кöзідімге ағылып). Олох туста президенттің хайиин сидік сурығларға айландырып алғаны чахсы салтарлар пирче: ізептеріне тоғынған пастыхтар хатығлаттыр салғаннар, экономика кöстеенің тилізі алысхан. Андағох пöгін турча республика ӱлгӱлері алнында - прай кӱсті тиліске саларға!
Аалӌылар санында ідöк Россияның Хазна Думазының депутады Николай Коломейцев, физика-математика наукаларының докторы, академик, РАН-ның П.П. Ширшовтың адынаң Океанология институдының наука устағӌызы Роберт Нигматулин паза экономика наукаларының кандидады, МИРЭА-ның Россияның технология институдының, «Эвриканың» толдырығлығ устағӌызы Сергей Афонин.
Ööн чыылығ соонаң стратегия сессиязының араласчылары, тöрт секцияа чарылып, республиканың тиліӌең наа оңдайларын ӱзӱргеннер. Чыылған чöптер Хакасияның 2030 чылға теере Тиліс стратегиязына кирілерлер.
Сомнар авторни
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
