САРЫННАР ИСТІҢЕР, КӦҢНІЛЕРІҢ КӦДІРІҢЕР
02.06.2023
Хабарлар
«От ыры-2023». Пӱӱл Ағбанда 10 паза 12 июнь кӱннерде этническай эстраданың чоннар аразындағы фестиваль-марии алтынҷы хати иртер
Піс пу улуғ пайрам хоостыра айланғабыс «От ыры» кӧглер марииның тӧстегҷізі, Хакасиядағы композиторлар пірігізінің кнезі, Хакасияның чон артизі Герман Танбаевсер. Ол пеер кемнер килерінеңер паза хайди иртердеңер чоохтап пирген:
– Пӱӱлгі «От ыры» чоннар аразындағы cинде алтынҷы хати иртер. Ол халғанҷызын 2018 чылда полған. Анаң чуғынҷах «ковид» ағырығ чир ӱстӱне тарап сыхханда, улуғдаң полар, кічіг дее мероприятиелер иртірілбин турғаннар. Республика cинінде иртірілчеткен «От ырын» онлайн оңдайнаң апарғабыс.
Анаң Россия cинінде полған. Ам пӱӱлгі чоннар аразындағы «От ырын» иртірердеңер Хакасияның культура министерствозы паза C.П.Кадышевтің адынаң чон чайаачызы кіні азынада планға кир салғаннар паза ахча позыдары кӧріл парған. Чоохтирға кирек, пістің Сибирь республикаларында мындағ фестивальлар иртірбинібіскеннер, Хакасияда ла пол турча.
«От ырына» ырҷылар кӧп килчелер. Пістің пасха хазналарнаң палғалыстар ӱзілбееннер. Олар Хакасиязар килерге хынчалар. Піс оларны маңат удурлирға кӱстенчебіс, азырапчабыс паза хонҷаң орын таапчабыс. Пӱӱл піссер Хыдаттаң, Моол чирінең, Белоруссиядаң, Казахстаннаң, Хырғыс чирінең, Башкортостаннаң, Крымнаң, Алтынзархы Осетиядаң, хости Пӱрӱт, Алтай паза Тува республикалардаң ырҷылар килчелер. Чолға ахчаны постары таапчалар. Ачырғасха, Гагаузиядаң кил полбинчалар. Молдавия Россиядаң тоғыр полчатханда, андартын килерге сидік.
Пістің ӧӧн сағызыбыс – наа хакас кӧглерні сығарарға, ідӧк наа композиторлар паза поэттер табарға. «От ыры» наа ла пасталчатханда, наа сарыннар паза ырҷылар тӧрееннер. Ол тустарда «Хайҷы», «Солбан» паза даа пасха эстрада ӧмелері тӧстелгеннер.Амды кӧбізі ӧмелер Ағбанда тоғынчалар.
Піс пу марығда аралазар ырҷыларны таллапчабыс. Хай cинінҷе олар сарнирға тимделер. Кӧзідімге алза, ырҷы Татьяна Балахчина ыр марығларында тӧреміл араласча. Пу «От ырында» пазох аралазарға сағынча. Татьяна Алтай аймааның кіні Хубачарда чуртапча. Ағаа сіліг кип-азахтарнаң паза фонограмма тимнирінең Алтай аймааның пазы Ирина Войнова полысчатхан осхас. Пістің республикадағы пасха даа аймахтар постарының чирінде ырҷылар таап, ағаа полыс турҷаң ползалар, хайдағ чахсы поларҷых. Арса, пірее саблығ ырҷы алай композитор тӧрирҷік.
Піске ӧӧн хакас сарыннары кирек. Хай пірее ырҷылар, орыс алай кидеркі хазналардағы кӧгҷілерге кӧӧгіп, сарнапчалар. Піске пости кирек! Алып алза, тувадағылар хайлап-сарнап сыхсалар, сах андох пілдістіг – тувалар сарнапча.
Чарғыҷыларға піc саблығ ырҷыларны хығырып алғабыс. Пістің мындартын Альберт Кувезин полар. Ол Тува, Алтай паза Хакасия ырҷыларын чахсы таныпча. Алындағы фестиваль-марығларда чарғыҷы полып араласхан.
Пістің ӧӧн партнёр РТС телекомпания полар. Олар «От ыры» мариин кӧні эфирге сығар турарлар. Сцена кистіндегі улуғ экранда кізілернең чоохтазып ал турғанын кӧзідерлер.
Пастап 10 июньда C.П.Кадышевтің адынаң чон чайаачызы кінінің улуғ залында прай ырҷылар ікілер сарын сарнирлар. Анаң оларның аразынаң иң маңат сарнаан 15 ырҷыны 12 июньда М.Ю.Лермонтовтың адынаң драма театрының ӧрге туразында истіп аларға чарир. Анда «От ыры» чиңісчілерін адирлар. Олар пірер ле сарын сарнирлар. Ағаа хоза, чарғыҷылар аразынаң саблығ ырҷылар даа чыылған чонға ырлирлар.
Амды газета пастыра кізілерні «От ыры» марығны кӧрерге паза пістің ырҷыларыбыс ӱчӱн «ағырарға» хығырчабыс!
Сом Интернеттең алылған
Автор :
Пасхан Илья ТОПОЕВ
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
