11 КЛАССТАҒЫЛАРНЫҢ ХАЗНА СЫНЫХТАҒЛАРЫ ХЫЫЗЫНДА ПАРЧА
02.06.2023
Хабарлар
11 классты тоосчатханнар математикаҷа пірге хазна сыныхтаан пастылар
ЕГЭ-2023. Хазнабыстың 11 класс тоосчатхан ӱгренҷілері Пірге хазна сыныхтағларын пазып пастабысханнар. Пу кӱнге чииттер география, литература, химия, орыс тілі паза математика предметтерҷе сыныхтағлар иртібістілер
ПӰӰЛ ХАКАСИЯДА ЕГЭ-ны ПРАЙ 2,5 МУҢ АЗЫРА ЧИИТ КІЗІ ПАСЧА, ОЛАРНЫҢ САНЫНДА 2370 11 КЛАСС ӰГРЕНҶІЗІ. КИҶЕЕ МАТЕМАТИКАҶА СЫНЫХТАҒЛАР ИРТКЕННЕР. АНЫ РЕСПУБЛИКАНЫҢ 20 ШКОЛАЗЫНДА ПАСХАННАР. ПУ ПРЕДМЕТТІҢ ӦӦН СИНІНҶЕ ЭКЗАМЕННІ 1416 ӰГРЕНҶІ ПАСЧА, ПРОФИЛЬ СИНІНҶЕ – 1051.
Ағбандағы 25№ школада математикаҷа пірге хазна сыныхтааның ӧӧн синінҷе 150 азыра олған пасхан. Ол городтың 1, 2, 5, 26 паза 29 №№ школаларының ӱгренҷілері. Пір аудиторияда 13 – 15 кізі одырған, оларның сыныхтағ тоғыстарын пасчатханын іҷе-пабалар, халых пірігістерінің кізілері хайығда тутханнар. Ӱгренҷілерге тоғыстар толдырарына 3 час пирілген.
Пӱӱл экзамен тудар оңдайға ікі наа ниме кирілген. Мының алнында сыныхтағ тоғыстарын парольлығ дисктерде ағылҷаң ползалар, амды оларны Интернетче ӧнетін арачылалған каналҷа ысчалар, анаң хазна сыныхтағ комиссиязының ікі кізізі электроннай клӱстер полызиинаң оларны асчалар, аудиторияларзар читірчелер. Анда экзамен материалларын олғаннар алнында чаҷынға сығарчалар. Паза мының алнында олғаннарның пас салған тоғыстарын сканировать поларға Хакасиядағы искіріглернең тоғынҷаң кінзер ал чӧрҷең ползалар, амды оларны аудиториядох сканировать полчалар. Анаң ідӧк арачылалған почтаҷа кінзер ызылча. Соонаң аудиториядох конверттерге суғылған олғаннарның чаҷындағы тоғыстары апарылча.
Математикаҷа пірге хазна сыныхтааның салтарларын олғаннар 15 июньда піліп аларлар.
Ӱгренҷілерге тархын, физика, обществознание, информатика паза пасха хан тіллері предметтерҷе сыныхтағлар иртібізерге халар. Орыс тілінҷе паза математикаҷа экзаменнерні олғаннарға прайзына хайди даа пазарға кирек полза, вузтарзар кірерге сағынчатханнар хоза ікі предметті таллирға киректер. Хайзынҷа пірге хазна сыныхтаан иртерін олар постары кӧрчелер. Пасха хан тіллерінеңер чоохтаза, 11 класс тоосчатханнар кибірли англия тілін таллап алчалар. Че пӱӱл аннаң пасха тіллерні таллааннар, асхынах таа полза, парох. Іди испан тілінҷе ЕГЭ-ны пір ӱгренҷі пасча, хыдат тілінҷе – 2 пала.
Сом Дина Карамчаковани
Автор :
Татьяна КЫШТЫМОВА
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
