ЭЭЗІ ЧОХ АДАЙЛАР, ТАКСИЛЕР ПАЗА ТАБЫҒЛАР
02.06.2023
Хабарлар
Ӧӧркі Чӧп. Хакасияның Ӧӧркі Чӧп кнезі Владимир Штыгашев президиумның теестегі чыылиин иртірген
Ӧӧркі Чӧп президиумы пу чыылығда 10 сурығ ӱзӱрібіскен. Оларның чарымы республиканың закон проекттері полған, чарымы – федеральнай закон проекттеріне ӱндезіглер.
Пастағы сурығ ээзі чох адайларға теелген. Закон проектін Хакасияның аал хонии министерствозы тимнеп кирген. Республика законынзар алызығлар 27.12.2018 чылда алылған 498-ФЗ № федеральнай законға паза Россия правительствозының 03.11.2022 чылда алылған чарадиина тӧстеніп кирілчелер тіп чарытхан аал хонии министрінің орынҷызы, ветеринария департаментінің устағҷызы Гульнара Керимова.
– Закон проекті городтар паза ааллар орамаларында ээзі чох адайлар чох поларына кӧстегліг, – таныхтаан ол. – Чоох парча ээзі чох адайлардаңар, хайзыларын олох орынзар айландырарға чарабас. Иң не пурнада кізінің чуртазына паза хазиина хорғыс чох поларға кирек.
Закон проектінҷе орындағы пос устаныс органнарына ээзі чох адайларның тӧлленчеткенін сыныхтағда тударынҷа паза андағ адайлар хорғыс ағылчатхан орыннарда профилактика иртірерінҷе хоза полномочиелер пирері кӧрілче. Ол полномочиелерні толдырарына, ол санда полған орнынзар айландырарға чарабас адайларны тударына паза вакцинация иртіреріне, соонаң республика бюджедінде ахча салыл турар.
Россия правительствозы позының чарадиинаң ээзі чох адайлар кізілерге атығарын азынада тохтадарынҷа методикалығ чӧптерін чарадыға алған. Аны хоостыра ээзі чох адайларны кӧп чон чӧрчеткен чирлерзер, олған садтары, школалар хыринзар паза пасха даа орыннарзар айландырарға чарабас. Хакасияда закон проекті хоостыра полған на муниципалитет андағ орыннарны позы чарадыға ал турар тіп кӧрілче.
Президиумдағылар закон проектінең чарас салғаннар.
– Ээзі чох адайларнаң палғалыстығ сурығны пӧгерінде алнынзар хаалағ иділді тиирге чарир, – таныхтаан Ӧӧркі Чӧп кнезі Владимир Штыгашев.
Хакасияның транспорт паза чол хонии министрі Дмитрий Василиади ікі закон проектінең таныстырған. Пастағызы – таксинең палғалыстығ. Федеральнай законодательство алыс парған сылтаанда республика законынзар алызығлар кирілче тіп чарытхан министр.
Федеральнай законҷа таксинең тартчатханнарға кирексіністер турғызылған: путевой листтер идері, налог органында санға алылары, таксиге заказтарны электроннай оңдайнаң алай чаҷыннығ журналда санға алары паза пасхалары. Ідӧк такси водительлеріне хоза кирексініcтер кирілтір.
Ікінҷі закон проекті тӧлегліг парковкаларнаң палғалыстығ полған. Ол ідӧк федеральнай законодательстваа килістіре тӱптестірілген. Итсе, пістің республикада андағ тӧлегліг парковкалар амғы туста чоғыл осхас.
Ӧӧркі Чӧп президиумы пу чыылығда ідӧк Хакасияның Табығ комиссиязына чӧптер пирчеткен чарадиин алыбысхан. Чоох парча пӱӱлгі кӱскӱдегі табығларны пір кӱнде иртірердеңер. Алында коронавирус пандемиязы хоостыра федеральнай ӱлгӱлер ӱн пирерін ӱс кӱнге теере узарадарға чаратханнар. Че амды, пандемия режимі суурылғанда, анзында кирексініc чоғыл тіп санапчалар депутаттар. Ӧӧркі Чӧп депутаттары кӧрізінең, табығларны пір кӱнде иртіргені республика бюджедінің ахчазын ӱзӱрлир, табығҷыларның киртінізін тыыдар.
– Законда даа кӧзіділче нооза – Ӱн пирҷең пірге кӱн, – таныхтаан Владимир Штыгашев. – Ол сентябрьның ікінҷі позырағында иртірілче.
Чыылығның пасха сурығлары федеральнай закон проекттеріне ӱндезіглер пирерінең палғалыстығ полғаннар. Кӧзідімге, пірсі – «Аал хонии кооперациязынаңар» федеральнай законзар алызығ кирчеткен закон проекті.
– Ол алызығ аал хонии кооперативінде полған, че анаң мобилизация хоостыра чааҷы службазына хығыртылған кізілернің праволарын арачылир кӧстегнең кирілче, – чарытхан Ӧӧркі Чӧптің аграрнай политикаҷа, ас-тамахча паза чирнең тузаланарынҷа комитедінің кнезі Пётр Воронин. – Аны хоостыра кооператив араласчызы полған чааҷыларға кооператив пастыра алған парыстарын (дивиденттерін) хайраллап халарға оңдай пирілче.
Сом Хакасияның Ӧӧркі Чӧп сайтынаң
Автор :
Альберт ТОЛМАШОВ
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
