КИИ АРЫҒ ПОЛАР ӰЧӰН
02.06.2023
Хабарлар
Ӧӧркі Чӧп кнезі Владимир ШТЫГАШЕВ Ағбандағы Культура паза тынағ паркында хузух ағазын одыртхан
Чӧрім. Хакасияның Ӧӧркі Чӧбінің пастаа хоостыра чыл сай иртірілчеткен «Хакасияның хузух ағастары» чӧрім пасталыбысхан. Аны хоостыра пӱӱл республиканың аал-городтарында тиксі 1300 хузух ағазы одыртылар
Сілкер айының 30-ҷы кӱнінде Ағбан городтың Культура паза тынағ паркында паза Харатас городта В.А.Баландинаның адынаң скверде 100-зер хузух ағазы одыртылған. Ағас хорбыларын одыртарында Хакасияның Ӧӧркі Чӧп кнезі Владимир Штыгашев, депутаттар, Ӧӧркі Чӧп аппарадының тоғынҷылары, республиканың ағас хонии, чир-чайаан ис-пайы паза экология министерстволарының, муниципальнай пӱдістернің кізілері араласханнар.
Таныхтирға кирек, пу чӧрім пизінҷі хати иртірілче. Ӧӧркі Чӧп депутаттары аны Таштып аймаанаң пастааннар, андада 100 хузух ағазы одыртылған. Пазағы чылда ағас хорбыларын ӱс муниципальнай пӱдісте одырт салғаннар – Таштып, Пии паза Шира аймахтарында. Соонаң чахсы кирекке прай аймахтар паза городтар хозылғаннар. Салтарында «Хакасияның хузух ағастары» чӧрімні чыл сай иртірердеңер Ӧӧркі Чӧптің чарадии алылған.
Пӱӱл чӧрім хоостыра 1300 хузух ағазын одырт салары кӧрілче, полған на аймахта паза городта 100-зердең. Чӧрім хандых айының 15-ҷі кӱніне теере иртер. Хузух ағас хорбыларын аларына республика бюджедінде Ӧӧркі Чӧптің чӧбі хоостыра 3 миллион салковай кӧріл парған. Ағас хорбыларын садығлар хоостыра утхан Ағбандағы фирма читірче. Ағбанның Культура паза тынағ паркында одыртарға кӧрілген ағас хорбыларын Томсктағы ағас ӧcкірҷең питомниктең ағылтырлар. Чӧрімнің пӧгіні – республиканың аал-городтарында ибіре ағастар одыртып, экологияны чахсыландырары.
– Тайғада полып, арығ киинең тынып алзаң, чағында мындағох хузух ағастары ӧссіннер тіп сағынчазың, – чарытхан ӧӧн пастағҷы, Хакасияның Ӧӧркі Чӧп кнезінің пастағы орынҷызы Юрий Шпигальских. – Хузух ағазы – Сибирьдегі хайхастығ ағас нооза. «Хакасияның хузух ағастары» проекттің кӧстее – хузух ағазын аал-городтарға чағын идері.
Юрий Александровичтің таниинаң, пӱӱл ирткен чыллардағы опыт прай санға алылған. Одыртылған ағастар прайзы ла ӧспинче нооза, піреелері хуруп парчалар.
– Пӱӱл ағазахтарны пастағызын на питомниктең алдыбыс, – чоохтаан ол. – Олар хай-хай чахсылар. Мының алнында ағас хорбыларын, тайғада хазып, лесничестволар пирҷеңнер. Хасчатса, чилегелерін ардат саларға ӱр нимес, аннаңар ӧс полчатханы хоостыра оларның сині тӧбін полған.
Араласчыларға пастап инструктаж иртірілген – ағазахтарны хайди орта одыртарға. Анаң олар, хузух ағазы хорбыларын алып паза кӱрҷектер тудынып, час ағастарны хазылған оймахтарға одыртарға паркча тараза халғаннар.
Сом Дина Карамчаковани
Автор :
Альберт ТОЛМАШОВ
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
