ӰГРЕТЧІЛЕРНІ ПАЗА АГРОНОМНАРНЫ ТИМНИР ОҢДАЙ
31.05.2023
Хабарлар
Хакасияның ӱгредіг министерствозының
устағ-пастаа ХГУ-ның студенттерінең тоғасхан
Кадрлар сурии. Абитуриенттерні кӧстегліг оңдайнаң на ӱгредіп, ӱгретчілер паза аал хонии специалисттері чидіспинчеткен сурығны пӧгіп аларға чарир
Мындағ сағыснаң ӱлескеннер Хакасияның ӱгредіг паза наука, аал хонии паза ас-тамах министрлері Анатолий Бутенконаң Сергей Труфанов, Н.Ф.Катановтың адынаң Хакас хазна университедінің ректоры Татьяна Краснованаң паза студенттернең тоғасханда.
Пу ӱгредіг чылында ХГУ-да 9,5 муң студент ӱгренче, оларның ӱзінҷі чардығы ӱгретчі специальнозын алча. Ирткен чылда школаларзар 300 азыра чиит специалист істенерге парған. Че андағ даа полза, ӱгретчілер чидіспинче. Орыс тілі паза литература ӱгретчілері иң кӧп киректелче – 35 кізі! Хайди тоғазығда таныхтаан Боград аймааның пір школазының директоры, олар школада тоғынчатхан 78 частығ ӱгретчіні чылдаң чылға тынаға парбасха сурынчалар. Ол парыбысса, уроктар иртірҷең ӱгретчі чох пол парар. Аннаңар улуғ частығ ӱгретчі 15 чыл тынаға пар полбинча! Ідӧк ӱгредіг организацияларында педагог-психологтар киректелче.
Хайди таныхтаан чооғында ХГУ-ның ректоры Татьяна Краснова, чииттерні школазар тартар ӱчӱн, оларға тоғынар, тус чахсы иртірер оңдайлар тимнирге паза турыстыра чал ахчазын тӧлирге кирек.
Хайди саннар кӧзітче, университетті тоосхан оол-хыстар Хакасиядаң парғлапчалар. Олар Хызылчарзар, Ыраххы Востоксар, Северзер «улуғ» ахча тоғынарға кӧсчелер. Чииттерні республикада халғызар ӱчӱн, ниме идерге кирек? Студенттерні кӧстегліг оңдайҷа ӱгредерге! Андада ла олар чӧптезіг иткен аймахтарзар, аалларзар тоғынарға айланарлар.
Хайди таныхтаан Хакасияның ӱгредіг паза наука министрі Анатолий Бутенко, пӱӱнгі кӱнде школаларда ӱгретчілернің ортымах чал ахчазы 46 муң салковайға тиңнелче, класс устағҷылары хоза сигіс муң салковай алчалар.
Ирткен чыылығда ідӧк Харатас город, Шира, Боград, Асхыс аймахтарының школа директорлары паза специалисттері араласханнар. Олар ӱгредіг организацияларында хайдағ предметтерҷе ӱгретчілер чидіспинчеткенінеңер искіргеннер. Іди математика, англия тілі, орыс тілі паза литература предметтерҷе ӱгретчілер киректелче. Хомзынысха, пір дее школа директоры хакас тілі ӱгретчізі киректелчеткенінеңер искірбеен. Пу предметче cпециалисттер республикада ідӧк улуғ кирексіністе. Анзын ӱр ниместе Хакасия правительствозында ирткен хакас тілін хайраллирынҷа чӧптің халғанҷы чыылиинда Боград паза Шира аймахтарының ӱгредіг управлениелерінің устағ-пастаа искірген. Хайди олар тееннер, аймахта хакас тілі ӱгретчілері чохтаңар, олған садтарында паза школаларда хакас тілінҷе ӱгредіг апарылбинча.
ХГУ-да ирткен чыылығда аймах институттарның студенттері араласханнар, оларның аразында хакас тілі ӱгретчізіне ӱгренчеткеннер пар полған полбастар ба? Оларға даа, диплом алза, хайдағ школада орыннар парын пілерге кирек.
Аал хонии киреенде специалисттер чидіспинчеткен сурығ ідӧк сыбыра кӧдірілче. Амды Хакасияа агрономнар, бухгалтерлер, зооинженерлер, мал имҷілері, энергетиктер, ІТ-специалисттер киректелче. Хайди таныхтаан Хакасияның аал хонии паза ас-тамах министрі Сергей Труфанов, пістің республика – маллар ӧскірҷең регион. Амды пістің ӧӧн пӧгінібіс – чииттерге аалларда городтағы осхас оңдайлар тимнеп салары. Андағ полбаза, оол-хыстарыбыс республикадаң аннаң андар парғлирлар.
– Хакасияда «Аалларның тиксі тилізі» федеральнай программа чахсы тоғынча. 2021 чылда пу программаҷа имҷілерге, ӱгретчілерге паза социальнай тоғынҷыларға алты муң квадрат чурт тимге сығарылған. Ағаа хоза, ӱр ниместе ікі Культура туразы азылған. Пӧгінде – Орджоникидзе аймаандағы Копьев аалда мал ӧскірҷең комплекс, Алтай аймаанда 10 муң тонна ас-тамах хайраллаҷаң орын пӱдірерге паза Хыдаттағы тракторларны чыыр завод азарға. Пу пӧгіннерні чуртасха кирер ӱчӱн, республикаа кӧп специалист киректелче, – таныхтаан чооғында Сергей Иванович.
Тоғазығда аал хонии министрі Сергей Труфанов республиканың предприятиелерінде практика иртчеткен ХГУ-ның студенттерін позының хайиина алып аларға паза оларны тарт чӧрер ӱчӱн ӧнетін автобус аларға молҷаан. Хакас хазна университедінің ректоры Татьяна Краснова министерстваа таңдағы аал-хонии специалисттеріне ӧнетін стипендия тӧлелген полза, чахсы поларҷых тіп сағыснаң ӱлескен.
Сом ХГУ-ның сайтынаң
Автор :
Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
