ХАЗЫР АДАЙЛАРНЫ «УЗУДАРҒА» АЛАЙ ЧОХ?
04.05.2023
Хабарлар
Ӧӧркі Чӧп. Хакасияның Ӧӧркі Чӧп кнезі Владимир Штыгашев президиум чыылиин иртірген
Ӧӧркі Чӧп президиумы пу чыылығда республиканың «Россияның Аарластығ доноры» паза «СССР-ның Аарластығ доноры» кӧксіне хазанҷаң танығнаң сыйыхтатхан чуртағҷыларына хоза социальнай хабазығлардаңар закон проектін ӱзӱрген. Хан пирчеткеннерге хабазығларны алғыдар кӧстегліг закон проектінең авторларның пірсі, Ӧӧркі Чӧп депутады Михаил Молчанов, таныстырған.
Закон проектінҷе аарластығ таныға турысхан донорларға хоза хабазығлар санында: город істінде чӧрчеткен автобус-троллейбустарда тикке чӧрері; тіс протезтерін тикке турғыстырары; коммунальнай полызығлар паза тиксі тыхтағ ӱчӱн хорадығларны компенсация оңдайынаң айландырары; тураларын песнең чылытчатханнарға хара тас аларына ахча тӧлирі.
Владимир Штыгашев Хазна Думазында мындағ закон проекті кӧрілгенін таныхтаан.
– Андада хазна андағ хабазығлар пиреріне тимде полбааны таныхталған, – теен Ӧӧркі Чӧп кнезі.
Пістің республикада мындағ аарластығ танығны алғаннарның саны – 2127 кізі. Пу хоза хабазығларны киргені республика бюджеді хорадығларын 41 миллионҷа салковайға ӧскірібізер осхас. Амғы туста, тізең, пістің бюджетті федеральнай минфин сыныхтағда тутча. Оларның чарадии чох хоза хорадығлар кирерге чарабас тіп таныхтаан Владимир Штыгашев. Че іди дее полза, закон проекті кирілгенге санирға чарадығ алылған. Аны сессия ӱзӱриине сығарарлар, ол тусха Москвадаң ӱндезіг килер, неке.
Хайығ тартхан паза пір сурығ – Астрахань облазы Думазының Россияның Федерация Чӧбінзер паза Россия правительствозынзар айланызына хабазардаңар. Хайди чарытхан аграрнай политикаҷа, ас-тамахча паза чирнең тузаланарынҷа комитет кнезі Пётр Воронин, айланыста ээзі чох адайлардаңар чоох парча. Астрахань облазының депутаттары, федеральнай законзар алызығлар киріп, кізілерге атыхчатхан ээзі чох хазыр адайларны эвтаназия полызиинаң чох идерге чӧпнең айланчалар.
Хайди таныхталча ол айланыста, халғанҷы чылларда ээзі чох хазыр адайлар саны ӧскеннең ӧслече. Ӧӧрлернең чӧрчеткен адайларға тутхлаттыр салып кізілер чуртастарын чідірчелер. Андағ чобағлығ киректер Астраханьда, Башкортостанда, Хызылчарда, Петропавловск-Камчатскта, Улан-Удэде, Ухтада полғаны санға алылтыр. Башкириядағы пір аалда, тізең, ирткен чылда адайлар ӧӧрі кічіг паланы ӧдір салған.
Хакасияда мындағ чочыныстығ киректер ідӧк учурапча – ӱр ниместе Харатаста пір ипчі, олған садынзар парчадып, андағ хазыр адайға ызыртырыбысхан.
Ӧӧркі чӧптегілер айланысха хабазарға чаратханнар. Че пір кізі тоғыр полған – бюджетче комитеттің кнезі Олег Иванов. Аның искіриинең, адайларны тутчатханнар удаа ээзі пар адайларны апарыбысчалар. Ээзін тапханҷа, ол тусха адайны «узудыбызардаңар» хорғыс пар тіп сағыс-кӧрізінең ӱлескен ол.
Автор :
Альберт ТОЛМАШОВ
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
