Чир Ине ӱлӱкӱн – Ағбан пилтiрiнде
02.05.2023
Хабарлар
Хакас чонның Чир Ине ӱлӱкӱнi Ағбан пилтiрi посёлоктағы «Тынағ олтырығы» ачыхта ирткен. Пу истiг орында аал чуртағҷылары тынанарға хынадырлар.
Идiнҷек Любовь Мухлынина чыылысхан чонны ирбен отнаң аластаан паза От иненi азыраан.
– Пiстiң ӧбекелерiбiс чир тiрiг ниме тiп киртiнҷеңнер, – чарытхан Любовь Алексеевна. – Часхызын, таарығ тоғыстарын пастир алнында, чирнi усхурып аларға, аны азырабызарға кирек. Анаң Чир инедең хыра тоғыстарын пастирға чарадығ аларға, ол чахсы ас пирзiн тiп, сурынарға кирек.
От иненi азырир кибiрде Хакасия пазы Валентин Коновалов, культура министрi Светлана Окольникова, чир-чайаан ис-пайы паза экология министрi Владимир Лебедев, Ағбан пилтiрi поссоведiнiң пазы Нина Леонченко араласханнар.
– Аарлығ арғыстар! Сiрер ибiркi чир-чайаанны хайраллирында паза национальнай культураны тилiдерiнде улуғ хозым итчезер. Пiс хынған Хакасиябысты хада-пiрге ӧңнендiрербiс. Прайзына пик хазых, часка, сӧбiреде амыр чуртас алғапчам! – ӱлӱкӱннең алғыстаан регион пазы.
Валентин Коновалов Солнечнай аал чӧбi пазы Николай Сергеевке, Ағбан пилтiрi поссоведi пазы Нина Леонченкоға, олар 2023 чылда «Хакас Республикада чарытхыны ӱзӱрлирi паза чарытхы тоғызын чахсыландырары» хазна программазында ӧткiн араласчатхан ӱчӱн, алғыстастығ пiчiктер читiрген.
Анаң Нина Владимировна прайзын «Ынархас аллеязы» чӧрiмде аралазарға хығырған. Анда посёлок чуртағҷылары паза аалҷылар чиит харағай хорбыларын одыртханнар.
Автор :
Тимнеен Татьяна Тютюбеева
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
