ХАКАСИЯДАҢАР КӦЗІДІГ – ХАЗНА ДУМАЗЫНДА
17.03.2023
Хабарлар
Кӧрік айының 14-ҷi кӱнінде Россияның Хазна Думазында «Хакасия. Пис кӱс чирі» кӧзідіг азылған. Аннаңар искірче республика пазы Валентин Коновалов социальнай сетьтердегі позының страницазында
Кӧзідігні азарында кӧп кізі араласхан, ол санда Думадағы прай фракцияларның депутаттары. Аймах партия кізілері чоох тутханнар: Геннадий Зюганов (КПРФ), Шолбан Кара-оол («Единая Россия»), Геннадий Семигин («Справедливая Россия – Патриоты – За правду»), Алексей Диденко (ЛДПР), Николай Валуев («Единая Россия»), Сангаджи Тарбаев («Новые люди»).
– Пістің кӧзідігні хынып кӧрчелер, – таныхтапча Валентин Олегович. – Ол Ӱстӱнзархы Сибирьнің, пістің Хакасияның тархынын, культуразын, чир-чайаанын паза чуртазын читірче. Хыри-пазы чох чазылар, чылығ тан, илбек Сойан тағлары паза тайға, ағын суғлар паза кӧллер, нымзах кӱнніг климат. Муңарлап чыл пістің чир кізі хайиин тартхан паза ам даа чыл сай тиксі Россиядаң паза хырығ озаринаң чӱзерлеп муң турист кил парча.
2021 чылда Хакасияда «Пис кӱс чирі» турист таңмазы чарадыл парған. Ол чарых от, им-томнығ суғ, чазы киизі, пай чир «пизінҷі кӱснең», тархыныбыс кӱнінең, піріктірілгенін киречілепче. Хакасияда пурунғы паза амғы чуртас пик палғалыс парған.
– Пістің 2019 чылда алылған амғы чуртас-экономика тилізі стратегиябыс ідӧк пис тиліс кӧстеенең пӱтче, – чарытча республика пазы Валентин Коновалов. – Пис кӧстегнің ӧӧні – кізі, Хакасия чуртағҷызы, аның оңдайларын тилідері. Кізі, хайзы Хакасияда позының соонда 30 муң азыра пурунғы тархын хумартхызын артыс салған, чирде тоғынчатхан кізі, промышленностьты тӧстеен, Кимні аптап алған, пӱӱн дее республикабысты чахсыландырарын узаратчатхан кізі. Піс кізі республикада чуртирға, сӧбіре тӧстирге, палаларын ӧскірерге, сағыстарын чуртасха кирерге оңдайларны тӧстирге кӱстенчебіс.
Тӧрт чыл аразына республика правительствозы Хакасия бюджедін ікі хати ӧскіріп алған. Ахча суриин иптеп алған сылтаанда социальнай кӧстеге, чуртағҷыларға хабазарына хорадығлар даа ӧскірілген. Хазых хайраллирына паза спортха хорадығлар ӱс хати ӧскірілген, ӱгредіге паза культураа – ікі хати. Чыл сай регионда сығарылчатхан ниме-ноо сині ӧсче, экономикаа кирілчеткен инвестициялар хозылча.
– Туризм паза тынағ инфраструктуразын тилідерінҷе, туристтерге чапсых ниме-ноо тимнирінҷе сурығны алынҷа хайығда тутчабыс. Пу кӧстеге хорадығлар пис хати ӧскірілген, – ӱлесче республика пазы. – Хакас чирі аалҷыларға даа, наа чуртағҷыларға даа хаҷан даа азых! Піс прайзын пурунғы чирібіссер кил парарға, пурунғынаң амғы тус палғалыс парғанын пос хараанаң кӧріп аларға, пис кӱсті поста сынап кӧрерге хығырчабыс!
Автор :
Тимнеен Наталья СЮПТЕРЕКОВА
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
