Кӧӧр ағырығдаңар
31.01.2023
Хабарлар
Кӧӧр (аалҷы, кӧӧр аалҷы, кӧӧр ӧрекен) - вирустығ уғаа чуғынҷах ағырығ. Пу вирус кииҷе, сілегей пастыра тарапча. Ол ибіркізінде ӱр чуртабинча. Кізі ит-сӧӧгінең тастыхти халза, вирус ізіг хайнапчатхан суға алай дезинфекция иділзе, пасха даа химия ниме-нооларына чох иділче. Комната температуразында ол 1-2 сутка тудылча, тӧбін температура полза, нинҷе-де неделя.
Кӧӧрні ағырчатхан кізідең чухтырып алчалар. Ағырчатхан кізі вирусты апсырчатса, чидірчетсе, сілегейі тамҷыхтары пастыра таратча.
Кізі пу чуғынҷахты чухтырып алза, 9-21 кӱн пазынаң ағырыбысча. Ӧöнінде онынҷы кӱнінде ит ізии 38-39 градусха теере кӧдірілче алай ит аннаң даа тың ізіпче. Кізі сағ чоохтанча, чахсы узуп полбинча, пуруннаң суғ ахча, чидірче, харах хызар парча (конъюктивит), ахсындағы азайлығ (слизистая) хызар парып, сізік полча, мойнындағы мирсілер сісче, иді пузурапча. Пастап хулахтар кистіндегі теер, пурун, хамах пузурап сыхча, анаң ол сырайға, мойынға, азах-холларға паза парчан итке чайылча. Пурнада ит чарых ӧңніг кизектернең пузурапча, анаң ол кизектер прай піріктіре пол парчалар.
Иді пузурабысхан соонаң 3-4-ҷі кӱнінде ит ізии табырах син сыхча.
Кӧӧрнең ағырза, нерва системазының тоғызы сайбаларға айабас. Ідӧк тыныс ит чардыхтарының, хурсах-харынның хазии сайбалча. Чуғынӌах сылтаанда удаа ларингит, тамах-тыныс ағырии (круп), бронхит, трахеит, отит, синусит, кӧӧр пневмониязы паза энцефалиді, гепатит, лимфаденит паза аннаң даа пасха ағырығлар улғаат сығарға айабас.
Кӧӧрдең арачыланҷаң иң не ізестіг оңдай - ол прививка! Россиядағы прививкаларның национальнай календарьы хоостыра, кӧӧрдең тоғыр прививка ікі хати турғызылча: 1 частығ палаларға (вакцинация - пастағы прививка) паза 6 частығларға (ревакцинация - ікінҷі прививка).
Иммунизацияны 35 часха теере прайзына хайди даа иртерге киректелче. Улуғларға, хайзылары алында кӧӧрдең тоғыр прививка турғыстырбааннар паза пу чуғынҷахнаң ағырбааннар, вакцина ікі хати турғызылча. Вакцинанаң тузаланарынҷа инструкция хоостыра пастағы паза ікінӌi прививка аралары 3 ай поларға кирек. Алында пу чуғынҷахтаң тоғыр вакцина пір ле хати турғызылған полза, иммунизация 35 часха читіре пір ле хати иділче. Салтарында, кізее 6 частығдаң 35 частыға читіре кӧӧрдең тоғыр ікі прививка турғызыларға кирек.
Ағырчатхан кізінең пір чирде полчатхан, алында кӧӧрдең тоғыр прививка турғыстырбаан паза пу чуғынҷахнаң ағырбаан, вакцинаны пір ле хати турғыстырған кізілерге иммунизацияны ағырығның эпидемиязы тузында ноо даа частығ ползалар иртірерге кирек.
Кӧӧрдең тоғыр вакцина кізінің иммунитедін пик итче, аны 20 чыл азыра ізестіг арачылапча. Кӧӧрнең ағырыбысхан кізі, сағам вирус аның сылтаанда матап тарапчатхан арада, ор хазых чоннаң нинҷе-де тус алынҷа тудыларға кирек. Иді пузурабысхан соонаң 4-че кӱн вирус тарапча. Аннаңар чуғынҷахты тараттырбас ӱчӱн, аннаң ағырчатхан кізі имнег туразынзар алай пӧлілген ӧнетін орынзар чатырылча.
Ағырығны чухтырып албас ӱчӱн, гигиена правилоларына тудыныңар. Кӧӧр эпидемиязы чарлалза, кӧп кізі чӧрчеткен паза чыылысчатхан орыннарда полбасха кӱстеніңер. Квартирада, турада, офисте паза сірер кӧп тус полчатхан пасха даа чирде кӧзенектер удаа азыңар.
Пасха кізілернең чоох алызарға киліс парза, оларзар тың чағын пастырбасха харазыңар.
Автор :
Республиканың имнег профилактиказы кіні
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
