ПОЭТТIҢ «КӰМӰC ТӰСТЕРI»
25.01.2023
Хабарлар
Марығ. Ӱр ниместе Хакасияның Чайаачылар туразында «Кӱмӱc тӱстер» марығның салтарлары идiлген
Хакас поэзиязы хығырығҷыларының «Кӱмӱc тӱстер» республика синiндегi марии саблығ поэт Валерий Майнашевтiң 75 чазына чарыдылған. Аны иртiргеннер Хакасияның культура министерствозы, писательлер пiрiгiзi паза Чайаачылар туразы.
Марығның ӧӧн пӧгiннерi поэт Валерий Майнашевтiң кибелicтерiн чонға тарадары, олғаннарны паза чииттернi хакас тiлiнең арығ чоохтанарға кӧстирi паза оларның чайаачызын iлезiне сығарары полчалар.
Марығда 7 частығ олғаннардаң пасти улуғ частығларға даа аралазарға чарир полған. Аннаңар араласчатханнар частары хоостыра тӧрт номинацияа чарылғаннар.
Валерий Майнашевтiң кибелicтерiн хығырар марығ пылтыр ноябрь айда заочнай оңдайнаң пасталған. Араласчылар поэттiң кибелicтерiн, чаҷынзар кӧрбин, видео пастыра сiлiг хығырарға кирек полғаннар. Анда 90 азыра кiзi араласхан. Анаң оларның иң артыхтарын Ағбанзар марығ чарғыҷылары алнында кибелicтер хығырарға таллап алғаннар. Андағларның саны 46 кiзi пол парған.
Оларны 17 январьда Чайаачылар туразында искеннер. Пiр минута аразына ӱгрен салған кибелicтi сiлiг паза пiлдicтiг хығырарға киректелген. Полған на номинацияда пiр чиңiсчi табылған.
Iди марығ чиңiсчiлерi полыбысханнар: 7 – 10 частығ олғаннарның аразында Асхыс аймаандағы Кызлас аалдағы школаның ӱгренҷiзi Марк Санзараев, 11 – 14 частығ саарбахтарның аразында Ағбандағы Н.Ф.Катановтың адынаң национальнай гимназияның ӱгренҷiзi Милослава Сербигешева, 15 – 17 частығ чииттернiң аразында Асхыс аймаандағы Ӱc чулдағы школаның ӱгренҷiзi Ольга Томочакова паза улуғ частығларның аразында Асхыс аймаандағы Чоғархы Тӧӧ аалдағы М.Е.Кильчичаковтың адынаң Литературнай музейнiң устағҷызы Надежда Боргоякова. Прай чиңiсчiлер ахчалығ сертификаттар алғаннар. Пасхаларына ӧнетiн дипломнар пиргеннер.
Кибелicтер хығырар марығны Хакасияның Чайаачылар туразы паза писательлер пiрiгiзi чыл сай иртiрчелер.
Автор :
Илья ТОПОЕВ
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
