ӦНЕТІН ТӦЛЕГЛЕР ЗАКОННАҢ ТЫЫДЫЛАР
20.01.2023
Хабарлар
Ӧӧркі Чӧп. Хакасияның Ӧӧркі Чӧп кнезі Владимир Штыгашев президиумның теестегі чыылиин иртірген
Чыылығның ӧӧн сурии пу чылның 1 январьынаң сығара имнег тоғынҷыларына ӧнетін социальнай тӧлеглер турғызылғанынаң палғалыстығ полған. Россия правительствозы андағ чарадығны 2022 чылның 31 декабрьында алған.
Чал ахчазына хоза тӧлегні чидіспинчеткен специальностьтығ имнег тоғынҷылары аларлар: пастағы имнег полызиин пирчеткен имҷілер паза специалисттер, аймахтарның паза участковай имнег тураларының имнег тоғынҷылары, имнег полызии станцияларында паза табырах полызығ пирҷең пӧліктерде істенчеткеннер. Аның сині 4,5 муң салковайдаң 18,5 муң салковайға теере полар. Тӧлеглер Россияның Социальнай чыындызы пастыра иділер, ахча хайди даа итчең имнег страхованиезі чыындызынаң (ФОМС-таң) позыдылча.
Хайди таныхтаан Хакасияның хазых хайраллаҷаң министрі Олег Ананьевский, регионда пар алынҷа категория имҷілері (фтизиатрлар, наркологтар, психиатрлар паза пасхазы), хайзылары хайди даа итчең имнег страхованиезі программазына кірбинчеткен имнег полызиин пирчелер, че олох аймахтарның имнег тураларында тоғынчалар. Оларға ӧнетін тӧлег республика бюджедінең иділер. Аннаңар республиканың чуртағҷылар хазиин хайраллирдаңар законынзар килістіре тӱзедіглер кирері киректелче. Чарыда чоохтаза, ол тӧлеглерні законға килістіре ит саларға кирек.
– Нинҷе ахча киректелер? – сурған Ӧӧркі Чӧп кнезі Владимир Штыгашев.
Министрнің нандыриинаң, пу кӧстеглерге чылда 41 миллионҷа салковай позыдарға кирек. Владимир Штыгашев ол кӧстеглерге ахча азынада салылбаан, аннаңар республика бюджедінзер ідӧк алызығлар кирерге киректелер тіп таныхтаан.
Пазағы сурығ пасха хазналарның агенттеріне саналғаннарға хазна ӱлгӱзі органнарында тоғынарға чаратпастаңар полған. Хайди чарытхан конституционнай законодательствоҷа, хазна пӱдіриинҷе, законностьча паза правопорядокча комитеттің кнезі Светлана Могилина, Хазна Думазы «Россия Федерациязының алынҷа законодательнай акттарынзар алызығлар кирердеңер» федеральнай законны алыбысхан. Ӧӧн алызығларның пірсі – пасха хазналарның агенттеріне хазна ӱлгӱзі органнарында тоғынарға чаратпастаңар.
Аннаңар республиканың хазна должностьтарынаңар паза хазнаның гражданскай службазынаңар законынзар килістіре алызығлар кирілче. Таныхтирға кирек, президиумдағылар ирткен чыылығда республиканың муниципальнай службадаңар законынзар андағох тӱзедіглер кирерін кӧрібіскеннер.
Теестегі хайығ тартхан сурығларның пірсі Ӧӧркі Чӧптің регламентінзер алызығлар кирердеңер полған. Оларда, сессия пасталчатса, депутаттарға чоох тударға тус пирердеңер чоохталча. Анда депутаттар оларзар кірген айланыстардаңар искір поларлар тіп чарытхан авторларның пірсі, Ӧӧркі Чӧптің депутады Михаил Молчанов (ЛДПР).
Президиумдағылар регламентте андағ тус пар полғанын таныхтааннар – сессия соонзар. Ноға пу алызығ кирілчеткені пілдіcтіг нимес. Табығлар тузы чағыннапчатханын сизінерге халча: пӱӱл кӱскӱзін Ӧӧркі Чӧптің наа хығыртиин табарбыс. Піреезі амох тимненіп пастапча полар – хайдағ-да хыймыраныс кӧзідерге кирек нооза.
Че хайди даа полза, президиум регламентнең палғалыстығ чарадығ проектін кирілген тіп санирға чаратхан. Пу сурығ сессия ӱзӱриине сығарылар, неке.
Федеральнай закон проекттері аразында Россияның административнай сайбағлардаңар Кодексінзер алызығлар кирчеткен закон проекті хайығлығ полған. Россия правительствозы кирчеткен алызығларҷа сыныхтағлығ органнардағы тоғыстарын толдырбинчатхан должностьтығ кізілерні хатығлиры кӧрілче.
– Дисциплинаны прай синде, правительстводаң пасти орындағы пос устаныс органнарына читіре, кӧдірібізерге чӧп кирілче, – таныхтаан Владимир Штыгашев. – Штрафтар кирерге, тоғыстаң суурарға.
Хайди искірілче чарыдығлығ пічікте, ӱлгӱ органнарының, хазна корпорацияларының, хазна сыныхтаан, муниципальнай синдегі сыныхтағны толдырчатхан органнарның должностьтығ кізілері тоғыстарын толдырбааны сыныхтағлығ тоғыстың кӧcтеглеріне чидерінің тӱзімін тӱзірче, пірееде кізілернің чуртазына паза хазиина ӱрег дее ағыларға айабас.
Аны хоостыра должностьтығ кізілерге 3 муң салковайдаң 5 муң салковайға теере штрафтар сал турарға чӧп кирілче. Хати административнай сайбағ иткені ӱчӱн – 5 муң салковайдаң 15 муң салковайға теере алай тоғыстаң суурары.
Автор :
Альберт ТОЛМАШОВ
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
