КИСКЕК ПАЗА ГРИПП АМ ДАА ТАРАПЧАЛАР
20.01.2023
Хабарлар
Селекторҷа чыылығ. Хакасия пазы Валентин Коновалов видеоселектор пастыра муниципальнай пӱдістер устағҷыларынаң чыылығ иртірген
Пастап республикада санитар-эпидемиологияҷа киректер хайди парчатханы кӧрілген. Аннаңар чоохтаан Хакасияның хазых хайраллаҷаң министрі Олег Ананьевский. Аның искіриинең, регионда кискек паза грипп ағырығлар ам даа тарапчалар. Пу тусха кискек ағырығны 52 муң кізі хаптырған, 506 кізі гриппнең ағырча. Гриппнең ағырчатханнарның 62 проценті – палалар. Пу ағырығ иң кӧп тарап парған Саяногорск паза Харатас городтарда. Ағырчатханнар саны эпидемия синінең ас парыбысхан. Халғанҷы кӱннерде ӧзіс сала хызырылча. Табырах имнег полызиин хығыртыпчатханнар саны iдӧк кӧмес хызырыл сыххан. Iди Ағбанда суткада ортымахти 12-ҷе хығыртығ полча.
Коронавирус ағырығны iдӧк суткада ортымахти 15 кiзi хаптырып алча. Стационарда 10-ҷа кiзi имненче, аар ағырчатханнар чоғыл. Ағырығдаң тоғыр вакцинация узарадылча, вакциналар улуғларға ла пар, палаларға чоғыл. Вакцинация иртірер план толдырыл парған, имнер читкіҷе.
Чонның хазиин хайраллирынҷа хоза чоох тутхан Роспотребнадзорның Хакасияҷа устанызының пастығы Татьяна Романова. Хайди ол искірген, республикада лаборатория сыныхтағларында 736 кізіде грипп таныхталған. Ағырығ таратчатхан пис орын ілезіне сығарылған: ікі имнег учреждениезінде, ікі ӱгредіг заведениезінде паза Абазадағы служащайлар аразында. Грипптең тоғыр вакцинацияны чонның 43 ле проценті идіп алған, анзы уғаа асхынах. 14 часха читкелек палалар аразында ағырығ эпидемия синінең ас парыбысхан. Пу тоғысты школаларда апарарға кирек, iдӧк андағ учреждениелерде ас-тамах тимнепчеткен тоғынҷыларны чахсы сыныхтирға.
Ағбан город пазының орынҷызы Владимир Крафттың чооғынаң, грипптең тоғыр вакцинацияны улуғлар аразында городтағы чуртағҷыларның 2/3 чардығы ла иртiбіскен. Пу кӧзідімҷе Ағбан сыбыра соона хал парча, чон вакцинация иртерге тың хынминча. Предприятиелерде, учреждениелерде пу кӧстегҷе тоғыс апарылча. Ӧӧн рынокта вакцинация иртірер пункт азылған, че кізілер андар килбееннер. Азынада пазынып, вакцинация иртірерге чарлағ пирілген, анда тӧрт ле кізі пазын салған, мероприятиені тохтадарға киліскен.
Чыылығда iдӧк республиканың коммунальнай предприятиелері соохтарны хайди иртірчеткеннерінеңер искірiлген. Хакасияның пӱдіріг паза чурт-коммунальнай хоных министрі Валерий Келиннің чооғынаң, коммунальнай предприятиелер олаңай режимҷе тоғынчалар. 30 декабрьдаң сығара республикадағы коммунальнай объекттерде 5 улуғ нимес сайбағ таныхталған. Хысхы пасталғаннаң сығара 65 сайбағ санға алылған, олар прайзы ЖКХ объекттеріне теелгеннер.
9 – 16 январьда министерствозар суғ, чылығ пирер сурығларҷа 11 айланыс кірген. Тоғыстарында читпестер табылчатхан чурт компанияларының устағҷыларына сизiндіріглер иділче. Котельнайларда 48,6 муң тонна хара тас пилетелген. Хара тас кӧріл парған синнең тӧбін 9 организацияда таныхталған. 56 аалда суғ пирҷең сетьтер схемазын орталадарға киректелче. Суғ, чылығ, чарытхы пирчеткен организацияларға муниципалитеттернің алымы 864,9 миллион салковайға тиңнелче.
Муниципальнай пӱдістер устағҷылары постарының чирлерінде тоғыс хайди апарылчатханнаңар сан пиріс иткеннер.
– Прай предприятиелернің, учреждениелернің устағҷылары читпестерні тӱзедерiнҷе хайдағ тоғыс толдырчатханнаңар сан пиріс итсіннер. Хара тас читкіҷе тартылчатханын паза даа пасха тоғыстарны сыныхтағда тудыңар, – теен Валентин Коновалов.
Автор :
Николай СУЛТРЕКОВ
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
