КЕМГЕ-ДЕ – ӰЛӰКӰН, КЕМГЕ-ДЕ – ӰТЕРТIС
20.01.2023
Хабарлар
Мылтых хараазы. Кибiр хоостыра пу хараада Худай киртiнiстiг чуртағҷылар паза чочынминчатханнар суға кiрчелер. Пӱӱл республикада оларға тиксi 15 тилтi тимнелген
Ағбандағы дренаж каналында абыс прай киртiнiс кибiрлерiн иртiрiбiскен соонда чыылған чон, ӧӧнiнде чииттер, хатхы-кӱлкiнең соох суға кiрглеп пастааннар. Пiреезi, сала-сула кiрестенiп, холларынаң пулахтап, мылтых уғы ла чiли суғдаң сығара чӱгӱрген, хайзы, маңзырабин, Худайдаң амыр чуртас, хазых сурап, прай хомай киректерiн «чууп» арығланған.
Пӱӱл суға кiрчеткеннер илееде полған, че оларнаң хада килген «кӧрiгҷiлер» улам кӧп чыылған. Оол-хыстар арғыстарына тилтiзер кiргенiн сомға алай видеоға суурарға чахыпчатханнар. Анаң ол сомнарны алай видеоларны постарының социальнай сетьтегi страницаларынзар сығарарға сағынчатпастар ба. Пасхаларына махтанарға кирек нооза. Анзы полбаан полза, олар хараазын соох суға кiрерҷiктер ни?
Хараа чарых, чил чох, айас полған. Соох таа полбаан. Пiр ирен суға кiрген соонаң, ипчiзiн холтыхтап алып, машиназынзар пас парир. Купальниктiг, сланец тапочкалығ, мойнында махровай чызынҷах. Хыриндағы пасха ипчi апсаана тiпче: «Кӧрдек, пляжта ла чiли пас чӧрче. Бр-р!» Пiлдiстiг, прайзы ла андағ пик нимес, кӧбiзiнiң суға кiрген соонаң тiстерi тiстерiне теңминчеткен.
Чар хазынзар хайдаң-да Соох апсах сығара хонды. Ол, чыылған чонны Худай ӱлӱкӱнiнең алғыстап, киптiгӧк суға кiрiбiстi.
– Мының алнында мин Ким суғда тилтiзер кiрҷеңмiн, – чоохтапча Соох апсахха хубулған ирен. – Пӱӱл, тiзең, Ағбан суғзар килдiм. Ӱр ниместе Наа чыл, Кӧлееде ӱлӱкӱннер ирт парғаннар. Чонның кӧңнiн кӧмес кӧдiрiбiзер ӱчӱн, тилтiзер Соох апсахтың кибiн кизiп килдiм, суға кiрдiм. Суғ хандыра! Сибирьдегiлер соохтаң хорыхпинчалар!
Ағбан пилтiрi аймаанда пӱӱл суға кiрер орын тимнелбеен. Хайди искiргеннер ГО паза ЧС специалисттерi, аймахтағы суғлар тайыс. Аннаңар пу муниципалитеттiң хай пiрее чуртағҷылары Ағбанзар килгеннер.
– Россия чуртағҷылары ам даа ундутпинча поларлар, хайди ирткен чылда Мылтыхта чиит сӧбiре, Ленинград облазынзар тынанарға парып, саайға кiрген. Анда 40 частығ ипчi, кiрестенiп ала тилтiзер сегiрiп, ӱреен. Пу чобағ хазнаның прай чуртағҷыларын сизiндiрген: ӧнетiн тимнелбеен орыннарда суға кiрерге чарабас. Аннаңар пiс хонғанымнаң Ағбандағы дренажсар суға кiрерге килгебiс. Мында хорғыстығ нимес, МЧС службазы хадағда турча, – чоохтапча Ағбан пилтiрi аймаа чуртағҷызы Карина Чочиева.
Мылтых хараазын Ағбандағы суға кiрер орында МЧС, табырах имнег полызиин пирчеткен службалар дежурство апарғаннар, иреннерге паза ипчiлерге кип-азах алыстырҷаң, чылынҷаң ӧнетiн палаткалар турғызылған. Анда одырчыхтар пар полған, чылғыйах полбазын тiп сызыр чайылтыр. Iдӧк тасхар улуғ нимес ӧрт кӧйген, аның хыринда суғдаң сыхханнар паза соохха тооп парғаннар чылынып ал турғаннар. Ағбандағы дренаж каналында 3500-че кiзi пол парыбысхан.
Тиксi алза, Хакасияда Мылтых хараазы амыр ирт парыбысхан. Ол-пу саайлар полғаны санға алылбаан. Худайға киртiнчеткен чон iдiстерге чарытхан суғ алған. Мының алнында, арса, ам даа, чурт ээлерi аннаң тура, мал турчатхан хазааларны чарытчаңнар. Ағбандағылар чарытхан суғны Никольскай тигiриб хыринда тимнелген тилтiдең алғаннар.
Автор :
Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
