ТАҢДАҒЫ КӰНЗЕР – IЗЕНIСНЕҢ
18.01.2023
Хабарлар
Тоғыс чорығы. Пу наада Хакасия пазы Валентин Коновалов Таштып аймаанзар тоғыс чорығынаң чӧр килген
Мадырдағы школаның тастындағы стенезiнде хызылған хумартхы чардыда пазыл партыр: «Мында ӱгренген ефрейтор Владислав Вячеславович Бозыков (14.04.1996 – 17.06.2022). Украинада апарылчатхан ӧнетiн чаа операциязында матыр чіли чат халған».
Чибiргi алты частығ оол чайғызын ӱреен, халғанҷы чаалазығда позын турыстығ тудынған ӱчӱн ағаа Мужество ордені (ӧлiм соонаң) пирiлген.
Ирткен пятницада хумартхы чардыны азарға кил парған республика пазы Валентин Коновалов, ол теен: «Чайғызын правительство алнында пӧгін турғысхам. Украинада паза Донбасста чат халған пiстiң чир-суғҷыларыбысха хумартхы чардылар тимнеп саларға. Оларны чааҷылар ӱгренген школаларда хыс саларға. Пiс матырларыбысты хаҷан даа ундутпасха кирекпiс, халғанҷы тыныстарына теере олар чааҷы сӧзiне тудынғаннар, пiстiң чир-суубысты арачылап...»
Владислав Мадырдағы школаны 2012 чылда тоосхан, Таштыптағы 16№ училищеде ӱгренген соонаң армияа парған, анаң контрактча тоғын сыххан. Мадырда аның iҷе-пабазы, ипчiзi паза палазы халғаннар... Чарды азылчатханына олар килгенӧктер. Соохта турып, пасха даа аал чуртағҷылары, школа ӱгренҷiлерi, ӱгретчiлер, пастыхтар Владиславты сағысха киргеннер. Оларның санында Хакасия Ӧӧркi Чӧбiнiң кнезi Владимир Штыгашев, депутат Василий Шулбаев полғаннар. Таштып аймаа пазы Николай Чебодаев чооғында таныхтаан: «Мадыр чирi турыстығ кiзiлернең сабланча, амды мыннаң Украинада читi чааҷы чааласча, оларның санында пос кӧңнiнең парғаннар пар. Пiстiң пӧгінібісте, тiзең, оларның сӧбiрелерiне хабас пирерге, сидiксiнiстерiнiң узы-пазына сығарға. Ӧсчеткен тӧл, мындағ хумартхы чардыларны кӧрiп, пiстiң чааҷыларыбыс ниме ӱчӱн чат халғаннарын хаҷан даа ундутпасха кирек».
Чардыны асхан соонаң аарлығ аалҷылар Мадырдағы школаның музейiн кӧрiп алғаннар. Анаң программа хоостыра ӱлгӱ Культура туразында аалдағы чуртағҷыларнаң тоғазығ иртiрген. Чоннаң чоох алызар алнында, кiчiг лейтенант, батарея командирi Аркадий Мамышевтiң ипчiзiне Валентин Коновалов хада хонғаны чаа киреен чахсы толдырчатхан ӱчӱн алғыстас пiчиин читірген, чааҷы позы ӱр ниместе Украиназар парыбысхан. Виктория ипчiзi ибде кiчiг паланаң одырча.
Пастыхтар хумартхылас митингінде
Хайдағ сурығлар пирiлген азых чоохтазығда? Чоллар. Таштыптаң пасти асфальт чол Шепчул аалға ла теере парча, анаң Мадырға теере сайнаң урылған чол парча. Аны чон асфальтнаң чабарға сурынча. Че пу чағында андағ оңдай чоғыл, 18 километр чолны асфальтнаң чабарға нинҷе-нинҷе миллион салковай киректелче. Валентин Олегович таныхтаан: «Хакасия правительствозы чоллар тыхтирынҷа, транспорт инфраструктуразын чахсыландырарынҷа тоғысты апарча. Пiстiң республика чоллар хоостыра Сибирьҷе 3-ҷi паза Россияҷа 19-ҷы орында. 2017 чылнаң тиңнестiрзе, 2022 чылда чолларның тиксі тыхтағ тоғыстарына хорадығлар алты хати ӧс парған! Таштып аймааның чолларына пылтыр илеедӧк ахча пирiлген».
Пасха сурығлар аал чӧбiнiң туразын нааҷылирына, олған площадказын пӱдiрерiне, туризмге, имҷiлер чидiспинчеткенiне, чарытхаа теелгеннер. Кӧзiдiмге алза, чон Таштып аймааның имнег туразында морг тоғын сығарын сахтапча, пылтыр анда улуғ тыхтағ тоғыстары апарылған. Ол тоғысха тимде, че, хомзынысха, патологоанатом, хайзы анда iстенерге кирек полған, тың ағырыбысхан. Ол хаҷан хазыхтанып аларын пiрдеезi пiлбинче. Нинҷе-де чыл Таштып аймаа чуртағҷылары ӱреен кiзiлернi Асхыссар алай Ағбанзар ал чӧрчелер, транспорт ӱчӱн кӧп ахча сых парча полбас па.
Iдӧк Валентин Коноваловха Мадырда ӧрт ӱзірҷеңнер депозы хаҷан пӱдiрiлер тіп сурығ пирiлген, республика пазы пу чылда пӱдiрiлер тiп молҷаан. Пiрее сурығларны аал чӧбi тоғынҷыларына аймах-пасха хазна паза Хакасия программаларында аралазып, пӧгiп аларға чарир тіп таныхтаан республика пазы. Олох олған площадказын, национальнай паза территориальнай политика министерствозы иртiрчеткен марығда аралазып, пӱдiрiп аларға чарир. Мадыр аал чӧбi пазы Наталья Иванова араласхабыс, че ут полбаабыс тіп чоохтанған.
Сағынчам, чон ӱлгӱнең хада тосханҷа чоох алызып алған, хай пiрее сурығларны Валентин Коновалов министерстволарға пӧгiбiзерге чахығ пирген. Iдӧк чыылығда пасха даа пастыхтар нандырығлар пиргеннер, ол санда республика Ӧӧркi Чӧбiнің кнезi Владимир Штыгашев. Кiзiлер Мадыр чирiнең сыххан чир-суғҷыларын хынып искеннер, чӱректерiнде iзенiс тӧреен – прай ниме маңат полар, чуртас мыннаң мындар чахсыланар, сидiксiнiстер пӧгiлер.
Автор :
Тарина БУТОНАЕВА
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
