ИҢ АРТЫХТАРЫНА – ТУРЫСТЫРА СЫЙЫХТАР
18.01.2023
Хабарлар
Печать кӱнінде сыйыхтас соонаң
Сыйыхтас. 13 январьда печать киреенде iстенчеткен улус позының профессиональнай ӱлӱкӱнiн пайрамнаан. Пу кӱн «Хакас чирi» газетаның ӧмезiне iдӧк танығлығ полған
Пайрамнығ кӱнде печатьнаң айғасчатхан учреждение-организациялар аймах министерство-ведомстволардаң, халых организацияларынаң, нанҷылардаң алғыстас пiчiктерiн алғаннар. Анзы тоғынҷылар кӧңнiн кӧдiрген паза ол пiске олаңай нимес кӱн полчатханын таныхтаан.
Иң ӧӧн алғыстастар паза сыйыхтастар Л.Р.Кызласовтың адынаң чир-суғ ӱгренҷең музейде ирткеннер. Андар республика паза аймах синiнде сығарылчатхан газеталар редакцияларының устағ-пастаа, хабарҷылары чыылысханнар. Улуғ нимес экскурсия соонаң, хайзын музейнiң ученай хачызы Игорь Таштандинов иртiрген, Хакасия пазының орынҷызы Михаил Побызаков, аймах министерстволарның кiзiлерi, Россияның журналисттер пiрiгiзiнiң Хакасиядағы пӧлиинiң кнезi Ольга Ширковец ирткен чылда пӧзiк чидiглерге читкен, марығларда чиңiс тутхан редакцияларны, хабарҷыларны таныхтааннар.
Iди Хакасия пазының алғыстас пiчиине «Хакас чирi» газетаның iкi тоғынҷызы турысхан. Ол нандырығлығ хачының орынҷызы Наталья Угдыжекова паза корректор Алёна Тодозакова, «Хакасия» газетадаң, тiзең, сыйыхты пӧлiк редакторлары Александра Мацкевичнең Елена Леонченко алғаннар. Наталья Валериевна хакас газетазынзар 2007 чылда килген. Нинҷе-де чыл пазынаң ӧӧн редактор орынҷызы полыбысхан. Правительство паза министерство сыйыхтарына пiр ле хати турыспаан. Соонаң ол нандырығлығ хачының орынҷызына турғызылған. Наталья Угдыжекова паза Алёна Тодозакова – амыр хылыхтығ паза нандырығлығ специалисттер.
– Тилекейде хакас тiлiнең сыхчатхан газета пiр ле. Ол «Хакас чирi» газета, – таныхтаан чооғында Хакасия пазының орынҷызы Михаил Побызаков. – Мин аны кiчiгдең ала хығырчам. Ам даа ол пiстiң сӧбiреде пар. Ол пасха газеталардаң пасхалалча. Аның позының тiлi, анда чонның худы, культуразы пiлдiрче. Мин прай хабарҷыларға алғызым читiрчем. Сiрернiң материалларыңнаң тиксi халых чонның кӧңнi пӱтче. Аннаңар улам кӧп чахсы хабар сығарарға алғапчам.
Хакасияның ӱгредiг паза наука министрiнiң орынҷызы Елена Конева паза спорт министрiнiң орынҷызы Елена Краснова, чыылған хабарҷыларны Печать кӱнiнең алғыстап, пик палғалыс тутчатхан алынҷа редакция тоғынҷыларына алғыстастар читіргеннер. Iди ӱгредiг министерствозының алғыстас пiчiктерiн алғаннар: «Хакасия» газетаның хабарҷылары Татьяна Потапованаң Наталья Гераськина, «Хакас чирi» газетаның хабарҷылары Оксана Ивандаеванаң Александра Карамчакова. Хакасияның спорт министерствозының алғыстас пiчии «Хакас чирi» газетаның cпорт пӧлиинiң хабарҷызы Майя Кильчичаковаа пирiлген. Хайди таныхтаан министрнің орынҷызы Елена Краснова, Майя Александровнанаң аймах спорт марығларында удаа тоғазарға килiсче. Ол Хакасияның спортсменнерi паза командалары ӱчӱн матап «ағырча», анзын материалларының строкаларында даа сизiнерге чарир. Хабарҷы таныс-таныс нимес спортсменнернiң чидiглерiнеңер республиканың чуртағҷыларына искiрерге кӱстенче. Iдӧк спорт министерствозы хада-пiрге тоғынчатхан редакцияларны таныхтаан.
Хакасия Ӧӧркi Чӧбiнің алғыстас пiчиин «Хакас чирi» газетаның ӧӧн редактор орынҷызы Наталья Сюптерекова алған. Таныхтирға кирек, Ӧӧркi Чӧптiң тоғызын чарыдары ниик нимес. Аны чаҷынға салар алнында хабарҷаа позына кӧп ниме пiлiп аларға кирек.
Россияның хабарҷылар пiрiгiзiнiң Хакасиядағы пӧлиинiң кнезi Ольга Ширковец iдӧк ведомственнай пiчiктер читiрген. Тиксi 10 азыра кiзее. Че иң пӧзiк сыйыхха хакас СМИ тоғынҷылары турысханнар! ГТРК «Хакасия» телевидениезiнiң паза «Хакас чирi» газетаның хабарҷылары Алексей Боргояковнаң Альберт Толмашов журналисттер пiрiгiзiнiң пӧзiк сыйии «За заслуги перед профессиональным сообществом» аарластығ танығнаң таныхтатханнар! Хайди искiрген Ольга Валериановна, пу танығ полған на хабарҷаа пирiлбинче. Аны алып алар ӱчӱн, редакция тоғынҷызына, ӱр iстен салғанынаң пасха, iдӧк журналистикаа улуғ хозым ит саларға, профессияда пӧзiк чидiглерге чидерге кирек.
Ӧрiнiстiг, хаҷан мындағ танығларны iкi хакас хабарҷы алған. Алексей Боргояков журналистикада кӧп чыл iстен салған паза чидiглерi iдӧк илееде. Ол 90 чылларда пастағы хабарҷы полған, кем телевидениеде ток-шоу иртiрген, хайда иң ағырсымнығ паза изi чох сурығлар кӧдiрiл турҷаң. Аның студиязының аалҷылары саблығ политиктер полғаннар. Ол туста чон аразында хырыс-табыстар, сӧклестер кӧп сығысчаңнар. Мындағ кӧзідігні иртiрерге ниик ле полбаан. Ағаа сыдамах паза пик хылыхтығ поларға килiскен. Алексей Боргояковтың кӧзідіглерін кӧрiгҷiлер тың сахтаҷаңнар паза хынып кӧрҷеңнер. Ӧӧн тоғыстаң пасха, хабарҷы iдӧк пос туста тiлег тоғызынаң айғасча.
Альберт Толмашов журналистиказар 26 чыл мының алнында килген. Амды ол ӧӧн редактор орынҷызы полча паза политика сурығларын газета страницаларында чарытча, iстенiс чолы, тiзең, пiчiктер пӧлиинде пасталған.
– Пiс, Наталья Табакова, Геннадий Кичеев, Римма Кочелорова паза мин, «Ӱтертiстiг чечiме» сығарҷаңмыс. Хаңалҷостар, чуртаста полған нимелер, таптырғастар тимнеҷеңмiс. Хығырығҷылар оларны сахтаҷаңнар, хынып хығырҷаңнар, удаа ӱндесчеңнер. Пу минiң иң хынығ тустарымның пiрсi полча, – сағысха кирче Альберт Иванович.
Журналистиказар чолым азылбаан полза, мин пасталығ класстар ӱгретчiзi поларҷыхпын тiп чоохтапча ол. Альберт Толмашов Сойан-Алтай тюркология институдында хакас пӧлиинде ӱгретчее ӱгренген нооза.
– Чолым пасха саринзар парыбысханына ӧрiнчем. Журналистика – ол хай-хай хынығ профессия! Кӧп кiзiнең танысчазың, аймах аалларда, городтарда пол килчезiң. Че ӧӧнi ол – ӧме. «Хакас чирi» газетаның амғы ӧмезi уғаа ынағ, удур-тӧдiр полысхах. Тоғынарынаң пасха, пiс чыл сай чайғызын ӧменең чир-чайаанзар тынанарға пар килчебiс. «За заслуги перед профессиональным сообществом» аарластығ танығ алғаныма ӧрiнчем. Алғызым читiрчем минi пу тоғысха ӱгреткен, кӧдiрген ӱгретчiлерiме. Ол Николай Гаврилович Ахпашев, Наталья Михайловна Табакова, Анатолий Серафимович Угдыжеков, Максим Константинович Чаптыков. Амды мин политика сурығларын чарытчам. Мында мағаа чахсы чӧлег полча ӧӧн редактор Радион Дмитриевич Сунчугашев. Политика сурығларын чарыдарға оой ла нимес. Официальнай пiчiктернi, законнарны чарыдар ӱчӱн, аны пастап прай саринаң тӱптестiрiп, орта тiлбестеп аларға кирек, – таныхтапча Альберт Толмашов.
Танығлығ кӱнде, «Хакас чирi» газетаның устағ-пастаа ирткен чылда тоғызын маңнаныстығ апарған тоғынҷыларына iдӧк алғыстас пiчiктерiн читірген. Анда прайзынаң артых полыбысхан редакцияның культура пӧлиинiң редакторы Татьяна Тютюбеева. Чиит хабарҷы республикада иртчеткен прай культура мероприятиелерiн чарытча, саблығ артисттернiң танығлығ кӱннерiн хайығда тутча, олох туста, аймах марығларда аралазып, чиңiске сығарға, аал-городтарҷа чорыхтарнаң чӧрерге маңнанча.
Піди ирткен чылның салтары идiл парған. 2022 чыл тархында халған тиирге чарир, пiске, тiзең, 2023 чылға наа пӧгiннер турғызарға, марығларда, аннаң андар аралазып, чиңiске сығарға, хығырығҷыларға чапсых материаллар тимнирге, чорыхтарға сығарға кӱстенерге кирек. 2023 чылның страницазы азыл парды, тархыны пасталыбысты.
Автор :
Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
