СIЛIГ ПАЗА ХАЙХАСТЫҒ ХАКАСИЯҶА ЧОРЫХ
18.01.2023
Хабарлар
Хакасиядаңар пасчалар. Ирткен чылның халғанҷы айында Россияның пасха хазналар киректерiнҷе министерствозының хығыртиинаң Хакасияда Пакистаннаң килген журналист, «ПолитЭксперт» журналда тӧремiл колонка апарчатхан Иштеак Хамдани ааллаан. «SADA-Е-Rғs» изданиеде ол республикабысча чорығынаңар, аның чир-чайаанынаңар, тархынынаңар хабар сығарған
Хакасияда пол килерге хығырғаннарында, декабрьда тоғызым кӧп тее полған полза, чорыхха сығарға ынаам тiп пасча ол. Республикабыстаңар ол аның алнында искен полтыр, Россия президентi Владимир Путин пеер тынанарға кил парадыр нооза. Аның тынағдағы сомнары прай Интернетке тарап парчалар, чон оларны ӧткiн ӱзӱрче. Анда Хакасияның сiлии чахсы кӧрiнче тiп чоохтапча Иштеак Хамдани.
«Хакасия, муңарлап чыл саналчатхан тархынынаң пасха, чир-чайаанының поc оңдайлығ сiлиинең чапсытча. Пеер килген чорыхчылар пу чирлерге саңай хыныбысчалар, олар сағыстарында хаҷанға даа халчалар», – пасча пасха хан чирiнең килген хабарҷы.
Иштеак Хамдани нинҷе-де ле кӱн аразына Хакасияның чир-суғ ӱгренҷең музейiнде, Ағбан пилтiрi хыринда Ким суғ хазында, Асхыс аймаандағы Ӱӱ тағда, «Хуртуйах тас» музейде пол килтiр. Iдӧк экономика тилiзi министрi Виктор Богушевичнең тоғазып, республиканы тилiдер кӧстеглердеңер чоохтастырлар. Паза чапсых тоғазығлар Н.Ф.Катановтың адынаң Хакас национальнай гимназияда ирткеннер. Аның директоры Марина Сагатаева паза чиит дипломаттар клубының араласчылары аалҷыларны чылығ удурлааннар. «Олғаннарның паза улуғларның пiссер чылығ хайғанынаңар пазарға сӧстер табарға даа сидiк», – пасча аалҷы. Ӱгредiг учреждениезiнҷе экскурсия соонаң Иштеак Россияның паза Хакасияның саблығ артизi Евгений Улугбашевнең таныстыр, олар iкi чонның кӧг тирiглерiнеңер хынып чоохтастырлар. Пакистанда пiстiң чатханға паза хомысха тӧӧй кӧг тирiглерi парох осхас, олар сантур паза рубаб тiп адалчаттырлар.
Хабарҷы статьязында, чорых хоостыра сағыстарынаң пасха, Хакасияның тархынынаңар, пурунғы хумартхылардаңар, ӧӧн город Ағбаннаңар, хакас чонның киртiнiзiнеңер, тiлiнеңер паза пасха даа сариларынаңар чарыда, толдыра искiрче.
Паза пасха хан чирiнең килген аалҷының сағызында соох чил ӱрге халған осхас: «Сибирьдегi соохтарнаң танысхабыс. Соох паза хазыр чил пiстi аңдара ӱбӱрiбiскедег полған», – пасча ол.
Хакасияның тағлары, суғлары Кашмирнiң (Индостан чарым олтырыхтағы область) чир-чайаанына тӧӧй тіпче Иштеак Хамдани. Хакас ипчiлернiң кип-азаа паза чазанҷыхтары iдӧк кашмиркаларның тонанҷығына тӧӧй осхас. «Хакастар, кашмир чоныох чiли, хой идiне хынчалар. Ол ачых-чарых, аалҷыларны улуғлапчатхан чон. Кашмир чонында мындағ синнiг удур-тӧдiр улуғлас, тӧреен чирiне хыныс полза, чахсы полар», – таныхтапча Иштеак.
Чорығының халғанҷы кӱнiнде аалҷы хабарҷы Хакасия пазы Валентин Коноваловнаң чоохтазып алған.
Пакистандағы паза Вьетнамдағы хабарҷылар Иштеак ХАМДАНИ паза Чан ТХАН ТХЕ «Хуртуйах тас» музейде
Автор :
Тимнеен Татьяна КЫШТЫМОВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
