СОЛ ХОЛНАҢ САПХАНЫ
18.01.2023
Хабарлар
Спорт. Хубачардағы «Колос» спорткомплексте 16 часха читкелек хызыҷахтар аразында волейболҷа Россия первенствозының чарым финалындағы марығлары иртчелер
Iкiнҷi кӱніндегі тоғазығ махалығ пасталча – пістіңнер 0:4 саннаң утырчалар. Iди поларға кирек. Ырахтаң килген аалҷыларны аарлап пілчебіс нооза. Аннаңар Алтай крайынаң килген команданың хызыҷахтары ачых-чарых кӧңнілiг ойнапчалар – марығ ээлерін утчалар нооза. Анзына хайди ӧрінмес, я.
– Киҷее ойын iдӧк пасталған. Сахалиннең килген хызыҷағастар пістіңнерге матап сыдан парчатханнар. Че тоғазығ 3:0 саннаң тоозылған, – тынағдағы ӱс апсахтың пірсі нанҷыларына тыыда чоохтапча.
– Пістіңнер утханнар ба? – пiлерге харасча хонҷии.
– Паза чи. Амох кӧрерзер, кирек саңай алыс парыбызар, – холларын чызынғлап пастабысты пірсі.
Спорткомплексте, тізең, суум-саам оңнығ нимес. Хубачардағы ортымах школаның ӱгренҷілері кӧгліг хысхырыстарнаң пістіңнернің кӧңнілерін кӧдірерге харасчалар, «Хакасия-я, алнынзар!.. Чиңic пісти полар!» тіп сууласчалар. Оолағас-хызыҷахтар пір тиң тудынчалар, волейбол ойнапчатханнарның аттарын адағлапчалар.
Мына, сых килді. Пӧзік сыннығ хызыҷах полтыр. Хакасия ӱчӱн ойнапчатхан команданың тренері Ирина Золотухинаның хыринда пір пасха пӧзік турча. Кӧрігҷiлер аны чидікпин сағыпчатханнар. Амды тоғазығның чӧрімі саңай алыс парыбызар тіп ӧрінісчелер минің улуғ частығ хонҷыхтарым. Постары сиргек тудынчалар.
Солағай хызыҷах полтыр. Сала даа iкінҷiлепчеткені пілдірбинче. Меспекті чоғар тастабызып, аны «ыырҷылары» саринзар тыыда сапты. «Заря Алтая» команданың ойынҷызы, аның учуғызын тохтадып, ӧӧрелерінің піреезiне меспекті пирібізерге харасхан – полбады. Андағ нимені кӧрерге дее чапсыстығ пілдірген. Волейбол меспегі, аның айаларына орта полып, кинетiн не кірлектене тӱскен, сығара толғала халған. Чапсыстығ даа.
– Мындағ меспек «крученнай» тіп адалча. Пу хызыҷағас андағ микенең чалғысхан на маңат тузаланча, – оңнығ ла ӧрінминче кӧрігҷi апсах, хонҷыхтарынзар кӧріп.
– Ол оңдай-микені прайзы чахсы пілче, – чараспинча аннаң пір нанҷызы, анаң меспекті хайди сабарға кирек полчатханын пасхазына кӧзіт пирерге харасча.
– Кiчiг палалар пол партырбыс па? Ойын тузында позыбыс таа удаа тузаланҷаңмыс, – кӱлімзіресчелер олар.
Мында хайдағ чазыт? Меспекті айанаң нимес, айа хабырғазынаң cабарға кирек полтыр. Андада волейбол, ипти ле кӧні учухпинча, киидӧк кірлектен парча ба, хайдағ. Піреезі аны тохтадарға харасса, кірлектенерін узаратча, суура толғала халча. Футболда андағ нимелер полыбохчатханын чахсы пілчебіс нооза. Аны тударға сидік.
Саннар харах кӧзіне алыс сыхханнар. Пастап 1:4, анаң 2:4, соонаң 5:4 пол парған. Солағай хыс позы алҷаас идібіспеен полза, саннар алыс ла турарҷых, неке. Iди тоғазығның пастағы чардығы 25:12 саннаң тоозылған. Iкінҷi чардығында солағай хызыҷахты тренер Ирина Золотухина, саннар 8:8 полғанда, ойынға сығарған. Анзы пазох ла тазылат-тазылат салыбысхан, тоғазығны 18:8 санға читірібіскенде, Ирина Петровна аны тынанарға ызыбысхан. Андағ ойынҷыларны хайраллирға кирек. Марығ тузында ниме ле пол парбинча.
Iди «Хакасия» команда, пу тоғазығның ікінҷі дее, ӱзінҷi дее чардығында «Заря Алтая» команданы чиңiп алып, марығның ікінҷі кӱнінде дее пірдеезіне утырғалах.
Хубачарда иртчеткен Россия первенствозының чарым финалындағы марығда пис команда араласча. Тоғазығлар уғаа хазыр оңдайларда иртчеткені iдӧк тее пілдiстіг. Мында иң кӱстіг командалар араласчалар. Сахалиннең, пасха даа орыннардаң килген аалҷы хызыҷахтар утырарға хынминчалар, чиңiс тударға матап сіренчелер. Че Россия первенствозында аралазарға ікі ле команда сығар. Ол марығ март айда иртер. Сағам арға-мӧрій хайди иртері искірілбинче.
Автор :
Анатолий СУЛТРЕКОВ
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
