ХАБАЗЫҒ – НАА ПРОГРАММАҶА
13.01.2023
Хабарлар
Дмитрий Клыпин, Татьяна Раменская,
Михаил Побызаков хабарҷыларнаң тоғазығда
Пресс-конференция. 2023-2024 чылларда Хакасияда ӧнетін чаа операциязының (СВО) пӧгіннерін толдырарында араласчатхан чуртағҷыларға паза оларның сӧбірелеріне хабасчаң программа тоғынар
Наа программаның пӧгіннерінеңер, тузазынаңар, хай син ахча кӧрілгенінеңер паза пасха сурығларға Хакасия пазының орынҷызы Михаил Побызаков, істеніc паза социальнай арачыланыс министрі Татьяна Раменская паза Хакасия пазының аппарат устағҷызының орынҷызы Дмитрий Клыпин нандырғаннар.
Татьяна Раменскаяның искіриинең, наа программа ікі чыл чуртасха кирілер, киректелзе – узарадылар. Аның тиксі бюджеді – 348,5 миллион салковай, ол санда 2023 чылға – 200 азыра миллион салковай. Ол ахча 2023 чылның республика бюджедінде кӧріл парған.
Программада ӧнетін чаа операциязының пӧгіннерін толдырарында араласчатхан чир-суғҷыларыбысха паза оларның сӧбірелеріне кӧрілген тиксі хабазығлар чыылғаннар. Іди полызығнаң тузалан поларлар СВО пӧгіннерін толдырарға чардыхти мобилизацияҷа паза контракт службазынҷа тартылғаннар паза пос кӧңнінең араласчатханнар. Пӱӱнгі кӱнде Хакасия правительствозының чардыхти мобилизацияа тартылғаннарның паза оларның сӧбірелерінің социальнай паспорттары пар. Амды, чаа ведомстволарынаң палғалызып, пасха араласчылардаңар искіріг чыылча.
Аннаңар хабазығнаң тузаланар ӱчӱн аның араласчыларына сурыныс пічіктерінең айланарға кирек.
– Программаны чуртасха кирер ӱчӱн Хакасияның істеніс паза социальнай арачыланыс министерствозы нандырча, – чарытхан Татьяна Раменская. – Че хабазығлар 12 хазна программазынҷа читірілер, оларның ӱчӱн республика правительствозының кӧcтегліг министерство-ведомстволары нандырчалар. Хабазығ кӧстеглері сигіс аймах: СВО араласчыларының тиксі хазиин пиктирі, оларны наа профессияа ӱгредері, тоғыс табарға полызары, палаларына хазых пиктеҷең чайғы лагерьлерге, санаторий-курорттарға тикке путевкалар пирері, ЖКХ полызығларына льготалар паза пасхазы. Ӧӧні – СВО араласчылары сӧбірелерінеңер сағыссырабасха киректер, аннаң айланған чааҷыларға олаңай чуртасха ниик кӧнігерге полыс пирерге.
Пресс-конференцияда ідӧк, нинҷе-де хабазығны чуртасха кирер ӱчӱн, Хакасияның Ӧӧркі Чӧбінің депутаттарына хай пірее законнарға алызығлар кирібізерге киректелчеткенінеңер искірiлген. Дмитрий Клыпиннің нандыриинаң, закон проекті теестегі сессияның ӱзӱриине сығарылар, ол кӱрген айының 25-ҷі кӱнінде иртер. Алызығлар мындағ хабазығларны кирерге полызарлар: коммунальнай полызығлар хорадығларының паза тиксі тыхтағ тӧлеенің 50 %-ін айландырарын, пестіг турада чуртапчатханнарға хара тас паза одың хорадығларын айландырарын паза пасхазын. Пу паза программада кӧрілген пасха даа хабазығлар 2023 чылның кӱрген айының пастағы кӱнінең сығара читірілер.
Таныхтирға кирек, контракт службазын тоос салған алай пос кӧңнінең аралас килген чааҷыларға «Чаалазығлар ветераны» ат пирілче.
– Хазнада паза республикада оларға хабасчаң пасха программалар чуртасха кирілче, – чарытхан Михаил Побызаков. – Наа программа, тізең, СВО араласчыларына паза оларның сӧбірелеріне ле хабазарына теелче.
Аннаң пасха, республика правительствозы город-аймах устағ-пастағларына кӧрілген хабазығларын узарадарға чӧп пирче. Олар іҷе-пабаларны олған сады ӱчӱн тӧлегдең позытчалар паза школада ӱгренчеткен палаларны ізіг чииснең тикке азырапчалар.
Автор :
Наталья СЮПТЕРЕКОВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
