ХАКАСИЯ ПАЗА ЛНР ПАЛҒАЛЫСТАРНЫ ТЫЫТЧАЛАР
13.01.2023
Хабарлар
Тоғазығ. Хакасия делегациязы Луганск Республикадаң айлан килген
Хакасия пазы Валентин Коноваловтың чахиинҷа пістің республиканың делегациязы Луганск Чон Республиказынзар чӧрген. Делегациязар Хакасияның аал хонии паза экономика тилізі министерстволарының кізілері кіргеннер.
Делегация айланғанда, Валентин Коновалов аал хонии министрі Сергей Труфановнаң паза экономика тилізі министрінің пастағы орынҷызы Роман Ковтуннаң тоғазығ иртірген.
Таныхтирға кирек, республика правительствозының делегациязы ЛНР-зар пастағызын на ирткен чылның октябрьында чӧрген. Андада делегациянаң Хакасия пазы позы устаан. Валентин Коновалов ол чорыхта ЛНР пазы Леонид Пасечникнең паза ЛНР правительствозының кнезі Сергей Козловнаң тоғасхан, пірге тоғынар оңдайларны кӧр салар ӱчӱн. Андада ікі республиканың правительстволары пірге тоғынып пастирлар тіп чӧптезіг иділген.
Ікінҷі тоғыс чорығы тузында правительство делегациязы ЛНР-дағы нинҷе-де предприятиеде, ол санда промышленностьха, коммунальнай сфераа кирек ниме-ноо сығарчатхан заводтарда, аал хонии паза ас-тамах предприятиелерінде, пол килген. ЛНР правительствозы кізілерінең, ӧӧн министерстволар устағ-пастаанаң паза улуғ предприятиелер, заводтар директорларынаң тоғазығлар ирткен.
Тоғазығда регион устағҷызы хакас делегациязы араласчыларынаң хада ол чорыхтың салтарларын ӱзӱрген. Анда пірге тоғысты тӱзімніг апарарына иң килістіре кӧcтеглер, Луганск Республиканың чуртағҷыларына гуманитарнай полызығ пирҷең оңдайлар кӧрілген.
Луганск саринаң Хакасиядаң ағас садызарында кирексініс пар, пӱдіріге паза позыдылған чирлердегі объекттерні тыхтирына. Ідӧк аттар паза хойлар тударын тилідерінҷе пірге тоғынар сағыс пар. Хакасияның промышленность предприятиелері, тізең, ЛНР-да сығарылчатхан оборудованиені ал поларҷыхтар.
Ідӧк Лугансктағы олғаннар ӱгредіг паза хоос литературазын кирексіпчелер.
Паза лугансктағылар Хакасия «Аалларның тиксі тилізі» хазна программазын чуртасха хайди кирчеткенінҷе опыдынаң ӱлезеріне ізенчелер, пістің республика пу кӧстегҷе хазнадағы пис иң чахсы субъекттің санына кірче нооза.
Палғалыс тудары тимнелген. Амды пістің министерстволар лугансктағыларнаң хада оларны чуртасха кирҷең оңдайларны прай саринаң ӱзӱрчелер.
Хакасия делегациязы ЛНР-зар теестегі тоғыс чорығынаң парар тіп кӧрілче. Анзынаң пасха, Хакасиядаң андар теестегі гуманитарнай полызығны ызары тимнелче.
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
