ХУБАЧАРДАҒЫ ШКОЛАДА – ХУМАРТХЫ ЧАРДЫ
13.01.2023
Хабарлар
Хумартхылас. Алтай аймаандағы Хубачар аалның ортымах школазында Украинадағы ӧнетін чаа операциязында чуртазын пир салған Владислав Тимощуктың хумартхы чардызын азар мероприятие ирткен
Соох таа кӱн турған полза, Хубачардағы ортымах школа алнында чон илееде чыылысхан. Анда ӱгретчілер, ӱгренҷілер, Алтай аймаандағы халых пірігістерiнің кізілері полғаннар. Пу школада ӱгреніп, аны тоосхан Владислав Тимощук, Украинада иртірілчеткен ӧнетін чаа операциязында аралазып, чуртазын пир салған. Амды аның хумартхы чардызын школа стенезiнде азар мероприятие ирткен. Анда Хакасия пазы Валентин Коновалов, Алтай аймаа пазы Ирина Войнова паза даа пасха аалҷылар араласханнар.
Мероприятиені апарчатхан кізі, Владислав Тимощуктың чуртас чолынаңар хысхаҷахти искіріп, митинг азылчатханнаңар чарлабысхан. Школа стенезінде хумартхы чарды хызыл иснең чабых полған. Аның алнында аарластығ хадағда юнармеецтер турғаннар. Школаның юнармеецтері, строевой хаалағнаң Россияның паза Хакасияның флагтарын ағылып, хумартхы чарды хыринда турыбысханнар. Россияның паза Хакасияның гимннері толдырылған соонда сӧс республика пазына пирілген.
– Пӱӱн Алтай аймаанда танығлығ кӱн полча. Піс, Украинада иртірілчеткен ӧнетін чаа операциязында аралазып, чааҷы пӧгінін толдырчадып, чуртазын пир салған Владислав Станиславович Тимощуктың хумартхы чардызын асчабыс. Пу школаны тоосхан чир-суғҷыбыс, махачы чаалазып, матыр чіли чат халған. Аның чарых омазы хаҷанға даа піснең хада халар. Ол Чир-суубыстың сын патриоды полған, iдӧк сын чааҷы полып, позына айабин, чуртазын пир салған. Аның хумартхызын піс хаҷанға даа ӧсчеткен тӧллерге хайраллирбыс, прайзына ол чахсы кӧзідім полар. Хакасияның правительствозы махачы чир-суғҷыларыбыстың хумартхызын хайраллир тоғысты мыннаң мындар апарар. Матыр чир-суғҷыбысха сабланыс хаҷанға даа! – теен Валентин Коновалов.
Аның соонаң чоох тударға Алтай аймаа пазы Ирина Войнова сыххан.
– Владислав Тимощук Хубачардағы пу школада ӱгренген, аны тоосхан. Амды ол одырған парта кистінде пасха ӱгренҷі одырча полар. Чир-суғҷыбыс Украинадағы чаалазығда, турыстыра тудынып, махачы чааласхан, матыр чiли чуртазын пир салған. Хорғыстығ, хаҷан 80 чыл пазынаң пістің оолларыбыс пазох чаада чуртастарын пир салчалар. Владиславты піс хаҷан даа ундутпаспыс, сабланыс ағаа хаҷанға даа! – чоохтаан Ирина Ивановна.
Митингте iдӧк чоох тутханнар Хубачардағы ортымах школаның директоры Оксана Ельчанинова, Афганистандағы чаалазығның ветераны, «Боевое братство» халых пірігізінің Алтай аймаандағы пӧлиинің устағҷызы, запастағы полковник Сергей Клычко, ӱгретчі Светлана Сицкая паза 11 класстың ӱгренҷізі Алёна Бычкова.
Хумартхы чардыны азар право пирілген Валентин Коноваловха паза Ирина Войноваа. Анаң олар аның тӧзінзер чахайахтар салғаннар. Пір минута сым турған соонаң чыылысхан чон iдӧк хумартхы чарды тӧзінзер чахайахтар салған. Мыннаң митинг тоозылған.
Кічіг сержант Владислав Тимощук, Украинада иртірілчеткен ӧнетін чаа операциязында аралазып, 3 сентябрьда 2022 чылда матыр чіли чуртазын пир салған. Чаалазығда махачызын кӧзіткен ӱчӱн чир-суғҷыбыс Мужество орденінең сыйыхтатхан (ӱреен соонда). Ағаа 35 час полған.
Автор :
Николай СУЛТРЕКОВ
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
