Іскі кізі хазиин сайбапча
31.12.2022
Хабарлар
Хакасияның имҷілері паза имнег тоғынҷылары чуртағҷыларны Наа чыл ӱлӱкӱннерін хазыхха хорғыс чох, че тузалығ иртірерге кирек тіп сизіндірчелер. Статистика танығларынаң, кізілер Наа чыл ӱлӱкӱннерінде кӧбізін ачығ суғны тингенҷе ізіп алған сылтаанда пиртінчелер, саайланчалар алай хол-азаан учут салчалар.
Ачығ суғ миистің тоғызын сайбап сыхча алай ӱрӱктірче, анзы арағаны хай син ізіп алғанынаң сылтағлығ поладыр. Іскі чахсы нимее ағылбинча, кізі саайға кір парарынаң паза иб істінде пиртін парарынаң чочыныстығ. Арағаны амзап алған кізінің сағызы сайбал сыхча, ол майың сағыстығ пол сыхча, сизіктіг тудынминча, харах таа чітіг кӧрбинібісче. Физиология кӧрізінең, ачығ суғ ханны тӱзірче паза тынысты пазыра пасча, кізі пілбеске кір парча.
Изірік кізее орта диагноз турғызарға сидік паза аны хайди имнирге кирек полчатхан сурығны пӧгерге оой нимес. Ачығ суға миис тоғызы сайбалған сылтаанда кізі пазын пиртіндіріп алған чіли пілдірче. Изірік кізі тың аар даа пиртін парарға айабас. Изірік полып, ол ағыриинаңар даа искір полбинча паза аның ниме ағырчатханын даа орта чоохтабинча. Имнерні ізіп (ӧӧнінде нерваларны паза ағырсынчатханын амырадарға полысчатхан имнерні), ағаа хоза араға амзалза улам на изіртче. Паза изірік кізее хирургия операциязын идерге сидік поладыр, имҷілерге пациентті узудыбысчаң имні (анестезия имін) орта таллап аларға оой нимес.
Іскее ілезіне сығарылбаан чӧреес ағырығлар улғаадыбысчалар. Іскее кір парған пациенттернің пірее ағырығлар алай психиказы сайбалчатханынаң палғалыстығ ағырығ даа пол сығарға айабас. Оларның сылтаанда кізіні имнирге сидік поладыр. Ідӧк ілезіне сығарылбаан чӱрек, чуғынҷах ағырығлар пол сығарға айабас, ханы хойыбинчатханы даа сидіксініске ағылар.
Іскі сылтаанда кізі хатап пиртін парарға айабас. Изірік кізі, пір хати пиртін парып, соонаң пазох пиртін парадыр. Ізілік водительлернің кӧбізі законны хатап-хатап сайбапча.
Ачығ суғны кӧп іссе, ол хазыхха хомай теелче. Аны тимеер іскен соонаң хазыхтан сыххан туста пасха ағырығлар сығыс киледір. Кӧзідімге, пневмония сығыс килче. Іскее кір парған кізінің прай ит-сӧӧгінің паза ит чардыхтарының хазии сайбалча, ол санда нерва системазы, этиловай спиртке ит-хан ӱр тус ооғып, піреезінің психиказы тың сайбалча. Хайди искіргеннер республиканың наркология диспансерінің имҷілері, кӧзідімге, арағаны тимеер іскен соонаң іскіні кинетін тохтат салған кізінің психоз пасталыбысча, аны олаңай тілнең «белая горячка» тіпчелер. Ол іскі тузында нимес, че іскіні тохтат салза пол сыхча. Пу психознаң ирееленчеткеннернің 1-2%-і, матап имнензе дее, ӱреп парча. Имненмееннернің 20%-і тігі чирзер парыбысча.
Табырах имнег полызиин хығыртарға кирек пу телефоннарҷа: 03, 112.
Имнег полызии сурығларынаң ідӧк айланарға чарир 122 телефонҷа.
Автор :
Хакасияның хазых хайраллаҷаң министерствозы
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
