ПӦЗIК ЧИДIГЛЕРГЕ ЧИТКЕН ОЛҒАННАРҒА – СЫЙЫХТАР
30.12.2022
Хабарлар

ПРАВИТЕЛЬСТВО СЫБЫҶАА. КИҶЕЕ А.М.ТОПАНОВТЫҢ адынаң драма театрында Хакасияның чайаачы олғаннарына правительство сыбыҷаа ирткен. Коронавирус чуғынҷах ағырығ тараан сылтаанда, ол 2020 чылдаң иртiрiлбеен
Аннаңар пу пайрамны, орта чоохтаза, тоғазығны, олғаннар даа, улуғлар даа ӱр сағааннар. Пӱӱл ковиднең кирек сала амырап парғанда, республиканың прай муниципалитеттерiндегi иң артых олғаннар Ағбанзар хығыртылғаннар. Тиксi 500 азыра ӱгренҷi. Олар ӱгредiгде, спортта, чайаачы тоғыста пӧзiк чидiглерге читкеннер паза олимпиада-марығларда чиңiсчi полғаннар.
Правительство сыбыҷаана килгеннернi нымахтағы матырлар фойедӧк чылығ удурлааннар, оолах-хызыҷахтарның кӧңнiлерiн кӧдiргеннер. Театрда оларға сомға суурынар ӧнетiн орыннар тимнелген, мастер-класстар паза ойыннар иртiрiлген.
Асхыс аймааның Калининдегi ортымах школазынаң правительство сыбыҷаана тӧрт ӱгренҷi килген. Олар прайзы хыйғаҷахтар паза ӧткiннер.
Максим Черпаков «Хакас чирi» газетаның матыры пiр ле хати полбаан. Оолах, олған садына чӧрчеткендӧк, хакас тiлiне паза культуразына чарыдылған марығларда араласчаң, сыйыхтығ орыннар ал турҷаң. Газетаның хоза сығарыстарында аннаңар удаа пазылҷаң. Ӧткiн оолах ам даа андағ хылыхтығ. Турғысхан пӧгiнге читпеенде, cалынмас. Аймах марығларда аралазып, школа паза аймах адын турыстыра кӧзiтче. Хакасияның национальнай паза территориальнай политика министерствозы пӱӱл пизiнҷi класстағы ӱгренҷiлер аразында тiл мариин иртiргенде, Максим анда араласханох. Тӧреен тiлiн пiлчеткен ӱчӱн ахчалығ cертификатха турысхан. Iҷе-пабазына ол ахчаа табырах ойлатчатхан велосипед алдыртып алған.
Валерия Убоженька iдӧк чахсы ӱгренче. Дарья Кулаганова Апчанай аалдаң. Ол футболға уғаа хынча.
– Пiстiң аалдағы хызыҷахтарның кӧбiзi футболнаң айғасча. Мин iдӧк ағаа хынчам. Секцияа хаҷаннаң чӧрчеткеннер аймах городтарзар марығларға чӧрчелер, чиңiстер ағылчалар, сабланчалар. Олар пiске кӧзiдiм полчалар. Пiс, кiчiглер, оларох чiли кӱстiг поларға хынчабыс, аннаңар тренер Валентин Иванович Тормозаковтың чооғын исчебiс, прай чахығларны толдырарға кӱстенчебiс, – чоохтапча Дарья.
Спорттаң пасха, Дарья iдӧк хоостирға, холнаң узанарға хынча паза хакас тiлi марығларында ӧткiн араласча. Максим Топоев iдӧк Калининдегi ортымах школада ӱгренче. Чайаачы оңдайлығ оолах музыка школазынзар чӧрче, олох туста ниик атлетиканаң айғасча. Максимнiң чидiглерi илееде.
Правительство сыбыҷаана килген прай палаларны Хакасия пазы Валентин Коновалов алғыстаан:
– Хакасияның драма театрынзар пӱӱл пӧзiк чидiглерге читкен олғаннар чыылғаннар. Чағдапчатхан чылда чиңiстерiң улам кӧп ползын. Андада пу залда хатап тоғазарбыс. Сiрернiң ӱгредiгде, спортта, чайаачыда сағынған сағыстарың прай толзын, ибде, тiзең, амыр-хазых ползын. Iдӧк пiлiске тартылыс успазын. Наа чылнаң, аарлығ кiчiг чуртағҷыларыбыс!
Театрның артисттерi оолах-хызыҷахтарға «Тайна замка на холме» нымахты кӧзiткеннер. Аның соонаң полған на олған Соох апсахтаң паза Хар хызыҷахтаң тадылығ сыйых паза нымзах ойнаҷах алған. Наа чыл чағдапча нооза! Аннаңар олғаннар сыйыхтар паза хайхастар сахтапчалар!
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде