МАХТАҒЛЫҒ СОЦИАЛЬНАЙ ПРОЕКТТЕР ТАНЫХТАЛҒАННАР
30.12.2022
Хабарлар
Сыйыхтас. Хакасияда чуртағҷыларға социальнай полызығ пирерінҷе иң чахсы проекттерні тимнеен идінҷектерні сыйыхтааннар
Республика правительствозының туразында «Чылның иң чахсы социальнай проекті-2022» федеральнай марығның регион синінде чиңic тутхан идінҷектерні паза марығ араласчыларын чеестееннер. Тиксі 35 кізее сыйыхтар читірілген.
Хакасия пазы Валентин Коновалов, марығ араласчыларын алғыстап, таныхтаан:
– «Чылның иң чахсы социальнай проекті» тиксі Россиядағы марығ нинҷе-де чыл иртіріл парир. Аның сылтаанда законзар 2019 чылда «социальное предпринимательство» оңнағ кирілген паза мындағ мероприятиелерге хабасчаң оңдайлар кӧріл парған. Хакасияда социальнай тоғыснаң айғасчатхан 57 идінҷек санға алылған, оларның 20-зі республика правительствозының грантына турысхан. Піс пу уғаа кирек кӧстегҷе аннаң андар хабазарға пӧгінчебіс. Хакасияда пу марығда араласчатханнарның саны кӧптең кӧп полып одырча, пӱӱл оларның саны 40 полған. Піске полған на проект аарлығ, олар прайзы республика чуртағҷыларына хабазарына кӧстелчелер. Кізілерге полызарға оой нимес, че чахсы кирек.
Ол регионда чиңic тутхан улусха, организацияларға дипломнар паза сыйыхтар читiрген. Андағ сыйыхха 12 идінҷек паза организация турысхан. Оларның проекттерi социальнай полызығ, хоза ӱгредіг, кинектер реабилитациязы, физкультура паза спорт, культура-чарыдығлығ тоғыс, социальнай туризм, город паза аал чирлерінің тилізі паза даа пасха сфераларға кӧстелгеннер. Чиңiсчілер Хакасия ӱчӱн амды хазна синінде турызарлар.
Кӧзідімге, «Водный туроператор стихия воды» пірігiс «Республиканская набережная» проектінҷе кинектерге туризмнең суғ-кӧллерде айғазар оңдайлар тӧстирге пӧгінче. Нымырттығ поселоктағы идінҷек Анатолий Туганашев ДЦП-наң ағырчатхан палаларға тренажерлар, пасха кирек ниме-ноо тимнепчеттір.
Марығның 23 араласчызы сертификатнаң таныхтатхан. Оларға сыйыхтарны читіргеннер республиканың экономика тилiзi министрі Виктор Богушевич паза Халыхтар палатазының кнезі Ольга Левченко. Хайди таныхталған пу тоғазығда, пістің республика социальнай кӧcтегҷе тоғынчатхан идінҷектер паза организациялар саны хоостыра Сибирьдегі федеральнай округта ікінҷi орында саналча. Регионда аны республиканың экономика тилізі министерствозы паза тиліс фонды иртiрчелер. Гранттарға чыл сай 20-ҷе млн салковай позыдылча.
Мындағ марығ идінҷектерге Россияның социальнай хазна университедінің профессиональнай ӱгредіг программазынҷа ӱгренер оңдай пирче. Олар, удур чоох тудып, республика правительствозына постарына хабасчатхан ӱчӱн, iдӧк «Минің бизнезім» кiнге пос киреен тилідерге хабасчатхан ӱчӱн алғыстарын читіргеннер.
Пу марығда пӱӱл, «Фабрика – дети» Абакан» проект тимнеп, пастағызын на араласты Ағбандағы идінҷек Илона Топоева. Ол олғаннарның хоза ӱгредии сферазына теелчеткен номинацияда араласхан.
– Идінҷек полып, минің опыдым улуғ нимес, пос киреенең пір ле чыл айғас салдым. Мин олғаннарға тӧстелген «Фабрика предпринимательства – дети» бизнес-школаның устағҷызы полчам. Піс анда 6 – 17 частығ палаларны ӱгретчебіс. Олар лидер поларға, ӧменең тоғынарға, бизнес-планны пӱдіріп, чуртасха кирерге ӱгренчелер. Ярмаркалар паза экскурсиялар иртірчебіс, хайзында олғаннар бизнестің аймах кӧрімнерінең танысчалар. Iдӧк кічіглерні чон алнында чоох тударға, пос тимнеен ниме-нооны чонға чахсы кӧзіт пиреріне ӱгретчебіс. Хада-пірге тудынып, ӧменең пірее ниме сағын табарға, анаң аны чуртасха кирерге кӱстенчелер, – чоохтаан идінҷек.
Аның чооғынаң, пу федеральнай сетьсер кірчеткен бизнес-школа полча, аның ӧӧн офизі Казань городта орныхчаттыр. Бизнес-школа 80 азыра городта паза СНГ-дағы 6 хазнада пар полтыр. Амды Ағбандағы олғаннарға андағ школа азылған. Анда Илона Олеговна ӱгретчі полча паза аның полысчылары пар. Олар идінҷектiң пу проектін чуртасха кирерге полысчалар. Кiчіглернің пілістерін iдӧк финанс паза бизнес ойыннары пастыра алғыдарға харасчалар. Идінҷек «Иң чахсы социальнай проект» марығда кічіглерге бизнес-школа амды Ағбанда даа пар тіп чонға искір пирер кӧстегнең аралазарға чаратхан.
И.О.Топоева (хыс фамилиязы Кызласова), пастағы пӧзік ӱгредіг алып, англия паза немец тіллерінің ӱгретчізі полған. Iкiнҷi пӧзік ӱгредии хоостыра ол экономист полча, «финанстар паза кредит» кӧстегҷе пілізін алғытхан. Ӱзінҷi профессиязынҷа – хазна учреждениезінде ол-пу нимелерні садызарынҷа специалист. Экономист полып Сбербанкта, республиканың ӧӧн имнег туразында, стоматология поликлиниказында істенген. Бюджет сферазында, коммерческай организацияларда тоғынған соонаң пос киреенең айғазар сағыс тӧреен. Іди ол тӧреен-ӧскен городында бизнес-школа тӧстеп алған.
Хайди санапча идінҷек, палалар, мындағ школада ӱгреніп, постары чуртастаң ниме сағыпчатханын чахсы оңар сыхчалар. Идінҷектерзер экскурсияларға (кӧзідімге, техносервиссер, имнег кінінзер алай коммерческай организациязар) чӧрчеткен сылтаанда, олар пос сағызынаң чуртирға, нандырығлығ поларға ӱгреніп алчалар, профессияны даа таллап аларға оой поладыр. Аннаңар Илона Олеговна паба-iҷелерге чӧп пирче: палалары пір дее нименең айғаспинчатса алай нименең айғазарын орта таллап полбинчатса, пу
школазар ӱгренерге ағылзыннар.
Автор :
Инора БОРГОЯКОВА
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде
