«ТАЗОБА» ИНДУСТРИЯ ПАРКЫ ПӰДІРИИНЕ – 500 МИЛЛИОН САЛКОВАЙ
30.12.2022
Хабарлар

Хакасияның Ӧӧркі Чӧп кнезі Владимир ШТЫГАШЕВ паза экономика тилізі министрі
Виктор БОГУШЕВИЧ ӧрген сапхан соонаң
Наа пӱдіріг. Ағбан город тастында «Тазоба» индустрия паркының пӱдірии пасталыбысты. 2024 чылның чарыс айына ол тимде поларға кирек
Хакасияда пастағы индустрия паркын тӧстирдеңер чоохтар чарым чылҷа чӧр парир. Пу наада, тізең, республиканың экономика тилізі министерствозы паза Ағбан городтың устағ-пастааның чӧптіг тоғызы салтар пиргеніне «Тазоба» индустрия паркы орнында пастағы ӧрген сабылғаны киречі полча. Хакасияның тиксі экономиказына танығлығ кирекке республиканың Ӧӧркі Чӧп кнезі Владимир Штыгашев, экономика политиказынҷа, промышленностьча, транспортча паза палғалысча комитет кнезі Василий Шулбаев, республика пазының орынҷызы Сергей Комаров, экономика тилізі министрі Виктор Богушевич, «Тазоба» индустрия паркының устағҷызы Андрей Федчишин, «ТрансАренда» ООО-ның уcтағҷызы Андрей Щапов паза пасхазы кил парған.
«Тазоба» индустрия паркы «Ағбанвагонмаш» саринда орныхча. Ағаа 13,8 гектар чир пӧлілген. Парк пӱдіриине паза идінҷектерге киректелчеткен инфраструктураны тӧстирге 500 миллион салковай федеральнай кіннең пирілген, 333 миллион салковайны устағ компаниязы позы пирче. Ол ахчаа парк орнында устағ-пастағ туразы паза сығарыс цехтары пӱдірілер, инфраструктура тартылар. Наа проект республикаа хоза 450 тоғыс орнын пирерге, кічіг паза ортын пос киреенең айғасчатхан 15 резидентті тартарға паза 1 миллиард азыра cалковай инвестиция кирерге кирек.
Парк пӱдірии пасталчатханын пайрамни азып, «Тазоба» индустрия паркының устағҷызы Андрей Федчишин Хакасия пазы Валентин Коноваловты паза аның ӧмезін алынҷа алғыстаан, ол санда республиканың экономика тилізі министрі Виктор Богушевичті паза министерство тоғынҷыларын. «Тазоба» индустрия паркының проект стендін асхан соонаң Андрей Юрьевич паза Виктор Николаевич ӧргенні сапханнар.
– Пӱӱн піс промпарктың пӱдірии пасталчатханын киречілепчеткен пастағы ӧргенні саптыбыс! Хакасияның экономика тилізі министерствозының тоғынҷыларына, миннең хада тоғынчатхан арғыстарыма, алғызым читірерге сағынчам! Сірернің пілістіг паза чӧптіг тоғызыңар проектті пӧзік синге кӧдірген, піс пасхазын асхабыс паза проектке «Кічіг паза ортын пос кирее паза алынҷа идінҷектің пастаана хабазары» нацпроектче федеральнай бюджеттең иң кӧп пирілчеткен ахчаны – 500 миллион салковайны – алып алғабыс! – таныхтаан Виктор Богушевич.
Проект бюрозының паза хазна сыныхтааның тоғызының хозымы андағох улуғ. Аның сылтаанда Хакасия «Тазоба» индустрия паркын тӧстирінҷе проектнең Россияның иң артых читі субъектi санына кірген.
Владимир Штыгашев паза Василий Шулбаев Хакасияда кічіг паза ортын пос киреен тилідеріне проекттің хозымын ідӧк таныхтааннар паза ол пастағы, че халғанҷы индустрия паркы полбазына ізеністерінең ӱлескеннер.
Пӱӱнгі кӱнде «Тазобада» орнығар пастағы предприятиелер пар, оларның санында пӱдіріг ниме-ноозын, удобрениелер сығарҷаң паза, ниме-ноонаң хати тузаланып, наа ниме сығарҷаң кӧстеглер. Оларға мында пос киреен пастирға чахсы оңдайлар тӧстелер: ис-пайға паза парысха налог льготалары, кредит проценттерін тӧлирге субсидиялар, маркетинг паза искіріг хабазии пирілер, ідӧк устағ-пастағларнаң сурығлар чапчаң пӧгіл турар.
Олох кӱн Виктор Богушевичтің устаанынаң «Тазоба» индустрия паркын пӱдірер «ТрансАренда» пірігіснең чыылығ иртірілген. Устағҷылар пӱдіріг тоғыстарын пастирға киректелчеткен сурығларны ӱзӱргеннер. 2023 чылның кӱрген айының 9-ҷы кӱнінең пасти тоғыстар пасталарға кирек.
Хакасияның ӱлгӱлері пӱдіріг хайди парчатханын тӧреміл хайығда тударлар паза сығысчатхан сурығларны ӧӧн подряд пірігізіне пӧгерге полыс турарлар.
Автор :
Наталья СЮПТЕРЕКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде