"Хакас чирі” газета хабарӌылары - чиңiсчiлер
23.12.2022
Хабарлар

Киҷее Хакасияның Ӧӧркi Чӧбiнде "Хрусталь парыс" республика марииның салтарлары идiлген. Аның чиңісчілері санында "Хакас чирi" газетаның хабарҷылары Альберт Толмашов паза Наталья Сюптерекова.
Пайрамнығ чыылыға марығда араласхан хабарҷылар тиксi республикадаң чыылысханнар. "Хрусталь парыс" марығ пӱӱл 19-ҷызын иртiрiлген. Пу тус аразына аның салтарларын Наа чыл ӱлӱкӱнiне удур иртiрерi Ӧӧркi Чӧптiң чахсы кибiрi пол парған. Хабарҷылар даа аны чидiкпин сағыпчалар.
Марығ чиңiсчiлерiн паза араласчыларын алғыстирға килгеннер республика парламентiнiң кнес орынҷылары Юрий Шпигальских, Светлана Могилина паза Евгений Молостов, бюджетче паза налог политиказынҷа комитет кнезi Олег Иванов паза пасхазы.
Хакасияның Ӧӧркi Чӧбi кнезiнiң пастағы орынҷызы Юрий Шпигальскихтiң таниинаң, пӱӱл марыға 80 азыра тоғыс пирiлген. Хай пiрее номинацияларда араласчыларның тоғыстары пiр синде кӱстiг тимнелгеннер, аннаңар чарғыҷыларға чиңiсчiнi таллап аларға даа сидiк полған.
Тиксi марығда тӧрт номинация кӧрiлген: "Ӧӧнiнеңер – пiлдiстiг", "Чон тапханнар", "Азых чоохтазығ" паза "Парламент партнеры".
Полған на номинацияда iкi чиңiсчi адалча: телевидение-радиодаң паза газетадаң алай Интернет-сығарыстарынаң. Альберт Толмашов "Ӧӧнiнеңер – пiлдiстiг" номинацияда чиңiсчi полыбысхан, Наталья Сюптерекова – "Парламент партнеры" номинацияда.
Чоохтирға кирек, марығның пастағы салтары республика парламентiнiң 44-ҷi сессиязында, улуғ хырлас айының 9-ҷы кӱнiнде чарлалған. Ӧӧн сыйыхты – Гран-принi паза парыстың хрусталь статуэтказын – "Хакасия" газетаның ӧӧн редакторы Марина Алехина алған.
Марығдаңар толдыра искiрiгнi газетаның пазағы сығарызында, улуғ хырлас айының 28-ҷi кӱнiнде, хығырыңар.
Автор :
Наталья Сюптерекова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде