ТУРЫСТЫҒ CЫЙЫХТАР НАА ЧИДIГЛЕРГЕ АҒЫЛЗЫН
23.12.2022
Хабарлар

«Алтай» ООО-ның інек сағҷаңы, істеніс марииның чиңісчізі
Ирина ФИЛАТОВАА сыйыхха автомобиль читірілген
Сыйыхтас. Улуғ хырлас айының 20-ҷi кӱнiнде Хакасия пазы Валентин Коновалов республиканың школаларына автобустар паза аал хонии тоғынҷылары аразында ирткен iстенiс марииның чиңiсчiлерiне автомобиль клӱстерiн читiрген
ПРАВИТЕЛЬСТВО ТУРАЗЫ АЛНЫНДА 23 АВТОБУС ПАЗА ӰС LADA NIVA TRAVЕL АВТОМОБИЛЬ ТУРЧАТХАН ПАЗА ИЛЕЕДЕ КIЗI ЧЫЫЛЫС ПАРҒАН.
– Пӱӱн Хакасияа ӧрiнiстiг кӱн: Россия Федерациязы президентi турғысхан пӧгiннер хоостыра школаларның автомобильлер паркы нааҷылалча. Амды ӱгредiг орнынзар чол истiг паза хорғыс чох полар. Пӱӱн пiс iдӧк иң чахсы аал хонии тоғынҷыларына автомобильлер читiрчебiс. Оой нимес тоғыстарың ӱчӱн сiрерге алғызым читiрчем!
Турыстығ сыйых сiрерге мыннаң мындар наа чидiглерге чидерге полызар тiп сағынчам, – теен Хакасия пазы Валентин Коновалов.
Автомобильге ӱс тоғынҷы турысхан: «Целинное» ООО-ның механизаторы Павел Ребонен, «Аршановское» ООО-ның механизаторы Александр Сметанин паза «Алтай» ООО-ның iнек сағҷаңы Ирина Филатова. Александр Сметанин тоңастығлар чығҷаң комбайннаң тоғынча. Пӱӱл тиксi республикада ол иң кӧп тоңастығ чыып алған – 3840 тонна.

Павел Ребонен, Ширада аал хонии техникумында тракторист-машинистке ӱгренiп алып, 2007 чылдаң сығара «Целинное» ООО-да тоғынча. Пӱӱл ол, мал азиин пилетеҷең комбайннаң тоғынып, 6775 тонна силос пилетеп салған. Ӱс чыл мының алнында ағаа наа комбайн пирiлген. Пылтыр ол, 11 муң азыра тонна сенаж пилетеп салып, механизаторлар аразында пастағы орында полған.
Алтай аймаандағы Хойбал аал чуртағҷызы Ирина Филатова 1987 чылда совхозта iнек сағҷаң полып тоғынып пастаан. Школа тоозыбысханда, сыр тимнеҷең усха ӱгренiп алған. «Алтай» ООО-да iкi чыл iнек сағҷаң полча. Пу аар тоғыста тиксi 17 чыл iстен салған. Пӱӱл 9 ай аразына Ирина Филатова 213660 килограмм сӱт саап алған, пiр iнектең – ортымахти 4748 килограмм.
– Нинҷе сӱт саап алары iнектi хайди кӧрерiнең палғалыстығ. Аны чахсы кӧрерге кирек, имҷектерi ағырбас ӱчӱн. Полған на iнек сағҷаң ортымахти 50-ер iнек саапча. 6.00 часта тоғызыбысты пастапчабыс. Iкi час аразына прай iнектернi саап алчабыс. Анаң иирде 18.00 часта пазох тоғысха килчебiс.
Iнек сағҷаң полып 17 чыл тоғын салғам. Минiң тӧрт пала. Олар кiчiг полғаннарында, тоғынмаам, оларнаң ибде одырғам. Амды тун хызыма 32 час, кiчиине – 14 час. Минiң водитель правазы чоғыл, аннаңар автомобильнi кемге пирҷең тiп сағынчам, – теен Ирина Филатова.
«Алтай» ООО-да 400 пас симментал тӧллiг iнек саалча, 4 iнек сағҷаң тоғынча.
Федеральнай программа хоостыра пiстiң регионға 23 ГАЗ, ПАЗ паза УАЗ автобус аларына ахча пирiлген. Оларны Алтай, Асхыс, Пии, Орджоникидзе, Таштып, Ағбан пилтiрi паза Шира аймахтарының, Абаза, Ағбан паза Харатас городтарның ӱгредiг организациялары алғаннар.
Пии аймаандағы Хызыл хара суғ аалдағы школа наа автобустар алғаннарның санында. Кiчiг Ноныптағы ӱгренҷiлернi Хызыл хара суғдағы школазар тарт чӧрчелер. Пӱӱнгi кӱнде Кiчiг Ноныптаң 14 ӱгренҷi паза школа алнындағы классха чӧрчеткен тӧрт пала. Автобус водительi Александр Аникиннiң чооғынаң, Хызыл хара суғ аалдаң Кiчiг Ноныпсар чол чахсы, че пасха чирзер парчатса, хомай чоллар удаа учурапчалар. Аннаңар автобус, иргiлен сыхса, удаа сайбалча. Иргi автобуснаң ол 8 чылҷа чӧрген.
Школа автобустарын алғаннарның санында Ис пилтiрi, Катанов, Райковтар, Арбыт, Калинин, Бондарев ааллардағы школалар, Боградтағы паза Харатастағы школа-интернаттар полғаннар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде