МЕДАЛЬЛАР ӰЧӰН ХАРБАЗЫҒ ХАЗЫР ПАРҒАН
21.12.2022
Хабарлар
Спорт. Кӱресчілер СССР-ның саблығ тренері В.И.Чарковтың хумартхызына чарыдылған тиксі Россия мариинда устарын кӧзіткеннер
МАРЫҒ
Тынағ кӱннерiнде «Ағбан» спорткомплексте «iзiг» полған. Оол-хыстар медальлар ӱчӱн харбасханнар нооза. Пу турнир – кибірліг марығ. Ол Хакасиядағы олаңай кӱрестің пастағҷызы Владимир Чарковтың хумартхызына чарыдылған. Владимир Ильич – ікі хати олимп чемпионы Иван Ярыгиннің пастағы тренері. Ідӧк ӱгренҷілерінің санында В.Е.Поповты, А.М.Майнагашевті, Ю.С.Мамышевті адирға кирек. Поповнаң Майнагашев аалдағы спортсменнер аразындағы СССР марығларында чиңістер тутханнар. Юрий Мамышев СССР чемпионаттарында ӱс хати сыйыхтығ орынға сыххан, тилекей мариинда араласхан. Хазых полған полза, чоныбыстың саблығ оолғы В.И.Чарков пӱӱл 85 чазын таныхтирҷых.
Марығны 17 декабрьда пайрамни асханнар. Ол хакас паза орыс тіллерінең апарылған. Чыылған чонны Владимир Ильичтің чуртас чолынаң хысхаҷахти таныстырғаннар. Анаң «Шейк» ӧме спортсменнерге паза тренерлерге теелбектердең пӱткен ойынны кӧзіткен. Сизінгенде, чиит артисттернің узы чылдаң чылға ӧсче. Чоохтирға кирек, «Каданс» хорның хызыҷахтары чапсытханнар. Олар Россия гимнін чӱрекке теерте толдырыбысханнар.
Турнирні азарында Хакасия пазының орынҷызы Михаил Побызаков, республиканың спорт кӱрезінҷе федерациязының президенті Геннадий Канзычаков, олимп арбитрі Алексей Базулин араласханнар. Аарлығ аалҷылар, чылығ сӧстер читіріп, спортсменнерге прай кӧңнін cалып харбазарға, медальлар утарға алғааннар.
Чарковтың турнирі чииттерге кӧрілген. Марығда 21 часха читкелек оол-хыстар араласчалар. Пӱӱл анда 184 спортсмен кӱзін сынады. Олар Приморскай, Хызылчар крайларынаң, Иркутск, Кемеров, Новосибирск областьтарынаң, Саха (Якутия), Тыва паза Хакас республикалардаң полғаннар. Пiстiң республика ӱчӱн 34 кізі турысхан: 15 хыс паза 19 оол.
Хабыстардаңар чоохтаза, cпортсменнерiбістең хыстар кӱстіг кӱресті кӧзіткеннер. 50 кг кӧдірімде пик сындырынаң Алина Сагалакова морсындырды. Ол ӱзінҷі орын ӱчӱн харбасхан. 2:6 саннаң утырчадып, Алина 16:6 саннаң чиңіс тутхан. Кӱресчі тренер Лилия Каскаракованың холында узын таптапча. Че марығда ағаа чӧптернең Владимир Чучунов полысхан. Хайди таныхтаан Владимир Гаврилович, Алина кибісте «ыырҷыларын» сӱмее киріп аларға кӱстенче. Туртуғып, таң, спортсмен утыр сыххан, позының оңдайынҷа харбас сыхханда, хола медаль пісти полған.
50 кг кӧдірімдӧк Алинаның пиҷезі Алёна Сагалакова харбасча. Аны пастағы орынға сығар тіп ізенгеннер. Че спортсмен Александра Копыловаа чиңдір салған. Саша – саха чонның хызы. Ағаа 19 час, тренері Ким Колодезников полча. Пӱӱл ноябрьда Александра Копылова Россия первенствозында алтын медаль холға кирген. Сахалар Хакасиязар турнирлерге тӧреміл килчелер. 2022 чылда кӱскӱзін ооллар марығласханнар. Амды Ким Кимович ӱс хысты ағылтыр. Чоохтасханда, Россия чииттерінің піріктірілген командазына пис кӱресчі хыс кірчеттір, ипчілер ӧмезінзер – пір кізі.
Дарья Токоякова чиңісті кӱснең алып алған тиирге чарир. Татьяна Карамчакованың ӱгренҷізі хабыстың пастағы чардығы соонаң 1:2 саннаң утырчатхан. Че ікінҷі чардығында ол «ыырҷызына» маң пирбеен. Хабыс 5:3 саннаң тоозылған. Аима Бутанаева, Даша чіли, 59 кг кӧдірімде харбасчаттыр. 17 частығ спортсмен Таштып аймаандағы Аңчул аалдаң. Ол Юрий Тюмерековтың холында харбазып пастаан, амғы тренері – Марат Кичеев. Аиманың пу пастағы улуғ турнирі. Хола медальына ол прай чӱреенең ӧрінген.
Тиксі алза, хыстар Хакасияа тоғыс медаль ағылғаннар. Пастағы орынға сыхханнар Тарина Бытотованаң Дарья Токоякова, кӱмӱс призерлар – Алёна Сагалакова, Агата Торбастаева, Казылган Монгуш, Валерия Карамчакова паза Валерия Мистрикова. Алина Сагалакованаң Аима Бутанаева хола медальлар утханнар.
Ооллардаң Егор Боцманны таныхтирға кирек. Чиит кізее 17 час, ол 97 кг кӧдірімде харбасча. Пастағы тренері Иван Шулбаев полтыр. Иван Семёнович Сорығда тоғынча, кӧп оол-хысха спортсар чол асхан. Аның ӱгренҷізі Семён Терещенко Хакасия паза Хызылчар крайы ӱчӱн турысча. Егор В.И.Чарковтың турнирінде хола призер полыбысхан. Михаил Кулагашевнең Егор Черковха пьедесталға пір ле хаалығ читпиндір. Оларның пизінҷі орын. Пастағы кӱресчі 79 кг кӧдірімде харбасча, Егор – 125 кг кӧдірімде.
СЕМИНАР
Пӱӱл В.И.Чарковтың хумартхызына чарыдылған тиксі Россия марии хоостыра ідӧк семинар ирткен. Ол спорт кӱрезінҷе чарғыҷыларға кӧрілген. Аны Россияның паза Хакасияның спорт федерациялары иртіргеннер. Семинарда 116 кізі араластыр. Устарын тилідерге сағынчатханнарның санында Пермь, Хызылчар, Алтай крайларының, Кемеров, Иркутск, Омск, Новосибирск областьтарының, Тываның паза Хакасияның cпециалисттері полғаннар.
Семинарны олимп арбитрлерi Норавард Арустамяннаң Алексей Базулин апарғаннар. Норавард Александровна Москвадаң, ол 2016 паза 2020 чылларда ирткен Олимп ойыннарында чарғыҷы полтыр.
Ағаа хоза, Н.А.Арустамянға чииттер Олимпиадазында ӱс хати чарғылирға киліскен. Алексей Николаевич Брянсктаң. Ол пылтыр Токиода тоғынтыр. Ӱгредіг тӧрт кӱн парған. 15-16 декабрьда семинар араласчылары марығларға кирілген алызығларнаң танысханнар, опыттарынаң ӱлескеннер. 17-18 декабрьда, тізең, олар В.И.Чарковтың турнирінде чарғыҷылар полып тоғынғаннар.
Араласчыларның пірcі – грек-рим кӱрезінҷе тренер паза чарғыҷы Аркадий Субраков. Ол Асхыс аймаандағы Индіркі Тӧӧ аалдаң. Аркадий Аверьяновичтің таниинаң, Хакасияда полған на марығда чарғылирға килісче. Пӱӱл февральда Субраков Россия чемпионадында тоғынған. Ол Суздальда ирткен. 2018 чылда чир-суғҷыбыс Хызылчарда мындағох семинарда ӱгредіг ирттір. Тӱзiмніг тоғынарға сағынчатсаң, пілістерні тӧреміл алғыдарға кирек.
Семинар араласчыларына сертификаттарны марығ соонаң читіргеннер. Турнирзер айланза, иң чахсы спортсменнерге Александра Копылованаң Дарья Токоякова саналғаннар, чарғыҷызына – Матвей Зангеев (Иркутск облазы). Валерия Карамчакованы чиңіске кӱстенген ӱчӱн таныхтааннар. Ідӧк чиңісчілер паза призерлар ахчалығ сыйых алғаннар.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
