ХАКАСИЯДАҒЫ СӦБIРЕ – КИБIРЛЕР ХАЙРАЛЛАҒҶЫЗЫ
16.12.2022
Хабарлар
Поғдархас. Кӧп палалығ Макарчуктар сӧбiрезi «Чыл сӧбiрезi» тиксi Россиядағы марығда «Сӧбiре – кибiрлер хайраллағҷызы» номинацияда чиңiс тутхан
Хакасия пазының орынҷызы Михаил Побызаковнаң республиканың iстенiс паза социальнай арачыланыс министрi Татьяна Раменская Макарчуктар сӧбiрезiне «Чыл сӧбiрезi» тиксi Россиядағы марығның чиңiсчi дипломын паза «Чыл сӧбiрезi. Россия 2022» аарластығ книганы читiргеннер, хайзынзар Макарчуктар сӧбiрезi турыстығ чиңiсчi чiли кирiлген.
Сӧбiре пазы Пётр Макарчук – Хакасияның спорт поғдархазы. Ол 2002 чылда Солт-Лейк-Ситиде паза 2006 чылда Туринде ирткен Хысхы Олимп ойыннарында пiстiң хазнаның бобслейҷе ӧмезiне кiрген, бобслейҷе алты хати Россия чемпионы, 1999, 2001 чылларда тилекей чемпионадының кӱмӱc призёры, бобслейҷе чоннар аразындағы класстығ спорт узы, ниик атлетикаҷа спорт узы. Амғы туста «Динамо» тиксi Россияның региондағы пӧлиинiң физкультура-спорт пiрiгiзi кнезiнiң орынҷызы полча.
Пётр Макарчук, ӧрт-арачыланыс службазында тоғынчатханда, хада хонғаны Натальяа тоғас парған. Ол Россия МЧС-ының Хакасияҷа ӧрт-арачыланыс отрядының ӱгредiглiг частьында пастағы полызығ пирерiне ӱгретче. Ағаа тӱзiмнiг тоғынған ӱчӱн Хакасия правительствозының алғыстазы, пӧзiк пiлiстiг специалисттер тимнеен ӱчӱн Россия МЧС-ының грамотазы читiрiлген.
Ирепчi 26 чыл хада чуртап салған. Ӱс паланың улии Сергей iҷе-пабазы чолынҷа парча, ӧрт ӱзiрҷең полча. Ол ӧрт ӱзiрҷең-прикладной спортнаң, аар атлетиканаң, тағ саналарынҷа паза автокросснаң айғасча. Диана 2003 чылдаң. Ол тӧреен кӱнде пабазы Германияда тилекей чемпионадында пiстiң хазна ӱчӱн турысхан. Пӱӱл Диана Кемеровтағы имнег университедiнзер кiрiп алған. Ол, теелбек ансамбльында аралазып, Парижте, Москвада, Хазанда, Екатеринбургта чиңiске турысхан. Очы хыс Даяна теелбекнең айғасча, музыка школазында ӱгренче паза, тобитче марығларда аралазып, сыйыхтығ орыннар алча.
Пос туста Макарчуктар сӧбiрезi Хакасияның танығлығ орыннарында тынанарға хынча.
Тиксi Россиядағы «Чыл сӧбiрезi» марығ читiнҷi хати ирткен. Аның тӧстегҷiзi палаларға хабасчаң фонд паза Россияның iстенiс паза социальнай арачыланыс министерствозы полчалар.
Автор :
Юлия ШУШАКОВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
