ОЛАРНЫҢ ЧУРТАЗЫ УЛУҒ IСТЕНIСТЕ ИРТ ПАРҒАН
16.12.2022
Хабарлар
Презентация. Таштыптағы культура туразында «Хакасияның iстенiс сабланызы» кинденiң iкiнҷi томының презентациязы ирттi
Пастағы том 2018 чылда сыххан, ол Социализм Iстенiзiнiң Матырларына чарыдылған, iкiнҷi томда, тiзең, Ленин орденiн алған тоғынҷылардаңар пазылча. Ленин орденi – СССР-ның иң пӧзiк сыйии, ол халых паза хазна алнында пӧзiк чидiглер ӱчӱн не пирiлҷең. Прай Хакасиядаң ол сыйыхты 460 кiзi алтыр.
Таштып аймааның Ленин орденi 14 iстенҷее читiрiлтiр, олардаңар презентация тузында чоох тутханнар: Пётр Карагусов, Надежда Головастикова, Николай Тыгдымаев, Варвара Сазанакова, Аграфена Тартачакова, Василий Султреков, Анна Медведцкая, Кирилл Шулбаев, Дмитрий Зарва, Георгий Кизесов, Клавдия Кучугешева, Павел Чистобаев, Георгий Шуверов. Аймах профессиялығ чон – ӱгретчiлер, трактористтер, мал сағҷаңнар, чабаннар... Пу кiзiлер прай чуртастарын чир-сууна, чонына пир салғаннар, майығыс чох чылларнаң iстенгеннер, аның ӱчӱн андағ пӧзiк сыйыхха турысханнар.
Презентацияда Таштып аймаа пазы Николай Чебодаев, Ленин орденiн алған матырларның туған-чағыннары, чииттер араласханнар. Хакасия Ӧӧркi Чӧбiнiң депутады Наталья Кокарева полғанох, ол «Единая Россия» партиядаң Наталья Канзычаковаа алғыстас пiчиин читiрген. Наталья Николаевна Таштып аймааның ветераннар чӧбiнiң устағҷызы полча. Ленин орденiн алған кiзiлердеңер пiлiп алар ӱчӱн ол улуғ хозым иткен. Архивте одырып, чағыннарынаң чоохтазып, матырларның сомнарын тiлеп, ол iстенҷiлернiң чуртастарын iстескен.
Iдӧк сценаа чоохнаң «Хакасияның iстенiс сабланызы» кинденiң редакторы Валерий Полежаев сыххан. Валерий Викторович СССР-ның даа, Россияның даа журналисттер пiрiгiзiнiң кiзiзi полча, Россияның писательлер пiрiгiзiне кiрче, республикада аны чахсы таныпчалар. 1980 чылларда ол Ленин орденi матырының Георгий Шуверовнаң таныс полтыр, аннаңар «Советская Хакасия» газетада статья сығартыр. Амды ол киндее кiр парғанох. Аны-мыны сағысха кирiп, Валерий Полежаев Наталья Канзычакованы хабазығ ӱчӱн алғыстаан.
Сценаа матырларның пала-пархалары хығыртылған, оларға аймах пазы «Хакасияның iстенiс сабланызы» кинделернi сыйлаан.
Автор :
Тарина БУТОНАЕВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
