КИКБОКСИНГ КІЗІ ХЫЛИИН ТЫЫТЧА
16.12.2022
Хабарлар
Спорт. Кикбоксингче Россияның спорт узы Данил Чепсараков аймах марығларда чиңістер тутча
Пістің республикада кикбоксингнең ооллар даа, хыстар даа айғасчалар. Оларның чидіглері илееде. Тиктең нимес 2022 чылдаң кикбоксинг Хакасияның ӧӧн спорт кӧрімнері санына киріл парған. Кикбоксерлар аразында хакастар парох. Амғы cпортсменнердең Даниил Трояковты паза Леонид Чебодаевті адирға чарир.
Даниил Александрович 2017 чылда тилекей чемпионадында чиңіс тутхан, пiр чыл пазынаң Европа мариинда алтын медальны холға кирген. Аннаң пасха, ол тилекей марығларының ікі хати хола призеры (2019, 2021 чыллар), Россия чемпионадында алты хати пастағы орынға сыххан. Пӱӱнгі кӱнде Д.А.Трояков тренер полып істенче. Леонид Чебодаев Асхыс аймаандағы Пилтір аалдаң. Ол 2018 чылда Европа мариинда чиңіс тутхан, пылтыр, тізең, тилекей чемпионы полыбысхан. Чемпионат Италиядағы Лидо-ди-Езоло городта ирттір. Ооллар чидіглерi ӱчӱн чоннар аразындағы класстығ спорт узы атха турысханнар. Чебодаевнең Трояков – Россияның саблығ тренері Михаил Сазоновтың ӱгренҷілері. Михаил Юрьевичтіңӧк холында Данил Чепсараков узын таптапча.
21 частығ оол Пии аймаандағы Чоғархы Киндірліг аалда тӧреен. Хакас тілінең матлама чоохтанча. Саарбах тузы Пилтір аалда ирткен. Андох ол спортнаң танысхан. Спортсмен чоохтапча:
– Кічігде секцияларға чӧрбеем. Чоғархы Киндірліг – кічіг аал. Пилтірде чуртирға киліс парғанда, бокс секциязына пазын салғам. Аны Андрей Фёдорович Челтыгмашевнең Артём Владимирович Байкалов апарғаннар. Бокс кӧңніме кірген. Тренировкаларны иртірбеске кӱстенҷеңмін. Тоғыс класс соонаң Ағбандағы олимп резерві училищезінзер кірерге чаратхам.
Ол туста Данилнің кикбоксингтеңер сағыс чох таа полған. Че У(Т)ОР-зар сыныхтағлар тутчатханда, ол тренер Михаил Сазоновнаң танызып алған. Ол хакас саарбахты кикбоксингнең айғазарға хығыртыр. Чир-суғҷыбыс таныхтапча:
– 51 килограмм кӧдірімнең пастаам, амғы кӧдірім – 57 килограмм. Піреезі кикбоксер полчатханымны піл салып, Жан-Клод Ван Дамм чіли тудысчам тіп cағынча. Сынында піс пос оңдайлығ спортсменнерге саналчабыс, аннаңар марығлар тузында шлемніг тудысчабыс. Хабыс ӱс чардыхтаң пӱтче, полғаны ла ікі минута парча. Кикбоксингте табырах сағыстығ, пик хуйахтығ паза чапчаң поларға кирек. Шпагатха одыр полбинчам. Пістің секция Ағбанның 12 № школазының подвалында орныхча. Анда чон ӱзілбинче.
Хакас оол Россия, Сибирь марығларында чиңіс тутхан. 2019 чылда хазна чемпионадына паза первенствозына кикбоксерлар Иркутскта чыылысханнар. Анда 800 артиинаң спортсмен узын кӧзіттiр. Данил Чепсараков, пастағы орынға сығып, спорт узына нормативті толдырыбысхан. 2020 чылда чир-суғҷыбыс хола призёр полыбысхан, пылтыр кӱмӱс медаль холға кирген. Чепсараковтың сағынған сағызы – хырығ озариндағы турнирде аралазары. Итсе, Россияда иртірілчеткен чоннар аразындағы марығларда ол кӱзін cынапча. Пӱӱл Кемеровта «Россия – спорт державазы» турнир полған, Данил Чепсараковтың кӱмӱс медаль.
2021-2022 чылларда спортсмен армияда служба ирткен. Пӱӱл Хакас хазна университедінзер ӱгренерге кіріп алды. Вузты тоосса, ол хакас паза орыс тіллері ӱгретчізі полар. Студент ӧмезінде 24 кізі, олардаң 16 хыс паза 8 оол. Куратор – Наталья Николаевна Таскаракова. Училищеде ӱгренчеткенде, Данил тренировкаларға кӱнде ікі хати чӧрҷең. Амды тус чидiспинче. Тренері тоғыр нимес. Михаил Юрьевич хакас оол ӱгреніп алзын тiп сағынча. Чооғының халғанҷызында Данил Чепсараков теен:
– Минің кӧрізімнең, кикбоксингтең артых спорт кӧрімi чоғыл. Ол кiзінің хылиин тыытча. Аннаң айғасса, пала хазых ӧзер. Тренировкаларға чӱгӱріc кірче. 5 – 10 километр хайди даа чӱгӱрібізерге кирек. Кӱстіг спортсменнер Москвада, Ульяновскта, Челябинскте пар. Хакасиядағыларны пасхаларынаң тиңнестірзе, чахсы кӧрінчелер. Марығлардаң піс медаль чох айланминчабыс.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
