ОЛАҢАЙ НИМЕС, «АЛТЫН»
14.12.2022
Хабарлар
Чидiг. Москвада «Школа межэтнической журналистики» Россия синiндегi проекттiң халғанҷы чардығы ирткен. Иң артыхтарның санында Л.Р.Кызласовтың адынаң чир-суғ ӱгренҷең музейнiң специализi Эльвира Самрина пол парған
«Школа межэтнической журналистики» ӱгредiглiг проекттi чоннар аразындағы хайызығлары журналистиказының гильдиязы паза национальностьтар киректерiнҷе федеральнай агентство хада-пiрге тӧстееннер. Ол 2015 чылдаң сығара иртiрiл сыххан. Аның пӧгiнi – национальностьтар сурығларынаң палғалыстығ темаларны чарытчатхан хабарҷыларның устарын тилiдерi. Пӱӱнгi кӱнге тиксi хазнада андағ 16 школа тӧстел парған. Ана оларда проекттiң пастағы чардығы иртче. Анда журналистика факультедiнiң студенттерiне алай хабарҷы чолын наа ла пастапчатхан оол-хыстарға аймах лекциялар, мастер-класстар иртiрiлчелер. Халғанҷы чылларда ла андағ тоғазығларны онлайн иртiрерi кибiрге кирiл парды. Анаң чииттернiң аразында устарын иң артых кӧзiткеннерi хазнаның ӧӧн городынзар хығыртылчалар.
Эльвира Самрина Хакасияның Л.Р.Кызласовтың адынаң чир-суғ ӱгренҷең музейiнде ӱр ниместең не сығара тоғынча. Ол республикадағы СМИ-ларнаң паза халыхтарнаң палғалысча ӧӧн специалист полча. Орта чоохтаза, ХГУ-да хабарҷы ӱгредиин алған хыстың пӧгiнi пу культура учреждениезiнiң тоғызынаңар хабарларны тарадары полча. Ол санда музейде тимнелген кӧзiдiглердеңер, хайраллалчатхан чыындылардаңар. Iди ағаа хакас чонның культуразынаңар, кибiр-чозахтарынаңар кӧп пазарға килiсче. Чоохтирға кирек, андағ тоғыс чиит чайаачының кӧңнiне тың кiрче. Ағаа ӧбекелерiнiң чуртазын пiлiп аларға хынығ нооза. Аннаңар, узын тилiдiп, тоғыста тузаланҷаң наа оңдайларны тӧремiл тiлепче.
Олох сылтағнаң ол пӱӱл «Школа межэтнической журналистики» проектте аралазарға чаратхан.
– Мин 10 сентябрьдаң сығара 15 ноябрьға теере Алтай крайының Барнаул городында тӧстелген школада онлайн курстарда араласхам. Пiстiң кураторыбыс «Алтайская правда» газетаның шеф-редакторы Олег Купчинский полған. Ол Zoom платформада национальностьтар сурығларынаң палғалыстығ темаларға хабарлар пазарынҷа лекциялар хығырған, мастер-класстар кӧзiткен. Аның устаанынаң мин хакас чонның кибiрлерiнеңер, Хакасияның ӧӧн музейiнеңер он азыра статья пас салғам. Пасха даа чоннардаңар – керектердеңер, эвенктердеңер – искiрiглер тимнеем, – чоохтап пирген музейде тоғынчатхан арғызыбыс.
Iди Эльвира Самринаның «Не простые, а «золотые» хабары тиксi проекттiң иң чахсы материаллар санына кирiл парған. Хакас хыстарның сӱрместерiнеңер, ипчiлернiң тулуңнарынаңар паза ууҷазы Варвара Константиновна Самринадаңар чайаачы тоғызы ағаа Москвазар чол асхан.
– «Школа межэтнической журналистики» проекттiң халғанҷы чардығы 28 ноябрьдаң 5 декабрьға теере ирткен. Чиңiсчiлерге программа хоостыра улуғ конференция кӧрiлген – школа араласчылары эксперттернiң лекцияларын искеннер, хабарлар пазарынҷа мастер-класстарында араласханнар. Оларның санында хазнаның национальнай политиказының ӧӧн кӧстеглерiнең танысхабыс. Паза Богородтағы ойнаҷахтар фабриказынзар, анаң «Кочевник» этнопарксар экспедицияларға чӧргебiс, – чарытхан Эльвира Самрина.
Пiстiң чиит чир-суғҷыбыс iдӧк Москва городтың правительствозында ирткен этническай паза региональнай СМИ-ларның медиафорумында араласхан. Паза ағаа Россия синiндегi «СМИротворец» хабарҷылар марииның чиңiсчiлерiн сыйыхтирынҷа пайрамда аралазарға часкалығ ӱлӱс тӱскен.
Хайди таныхтаан Москвада пол килген хыс, мындағ синнiг ӱгредiглерде араласханының тузазы тың улуғ. «Сыйыхтығ айланғаны, тiзең, кiзiнiң кічіг чир-суубысты сабландырар кӧстегҷе тоғынар кӧңнiн уламох кӧдiрче», – теен ол.
Л.Р.Кызласовтың адынаң чир-суғ ӱгренҷең музейнiң чиит специализi Эльвира Самрина Москвада iкi сертификатнаң паза проекттiң иң чахсы тоғызы ӱчӱн дипломнаң таныхтатхан.
Автор :
Александра КАРАМЧАКОВА
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
