Ағбанда ниме-ноо сығарчатханнарның кöзідии иртче
07.12.2022
Хабарлар
Пӱӱн-таңда Ағбан городтағы “Чиңіс” культура кінінде “Ағбанда иділген” кöзідіг тоғынча. Піс кем ниме-нооларны кöзідіге сығарғанын пос хараанаң кöріп алдыбыс.
Идінӌектер паза предприятиелер кöзідіг-садыға аймах ас-тамах, кип-азахтар паза сувенирлер сығартырлар.
“Воскресенский” теплица хонииның алнында кізі дее чох полған полза, Fresh Cheese столын кöрігӌілер ибірібістірӌіктер. Пу аттығ сырларны сығарча идінӌек Екатерина Борисова паза технолог Денис Гурин.
Аннаң андар парза, “Абаканские сласти” аттығ компет-шоколад сығарчатханнарның столы турған. Идінӌек Елена Минчактың предприятиезі Наа чылға удур аймах сыйыхтар чыып салтыр. Тігенек, Хар кізіӌек паза пасха кöрімнең иділген харчахтарда компеттер, шоколадтар паза сироптар суғылтыр. Плитка шоколадтары аразында, тізең, талғаннығ шоколад хайиим тартхан! Аны, öнетін дее чазабин, сыйыхха аларға чарир.
Пу кöзідігде кип-азах тікчеткен предприятиелер паза устар тоғыстарын илееде сығартыр. Іди кип-азах паза чазанарға хоза нимелерні (аксессуарларны) сығарчатхан идінӌек Евгений Гайдаренконың кöзідии пістің хараабысха тасталған. Олар ниме-нооларында тöреен чир-суубысха хынысты паза аның чир-чайаанын хайраллирға киректелчеткенін читірчелер. Сығарған нимелері ачыныстығ кöрінчелер.
Татьяна Штань, тізең, пӱӱл ле пос киреен санға турғысхан. Хада хонғанынаң олар ипчі чон кип-азаан тікчең цех азыбысханнар. Кип-азахтарны пос фамилиязының адынаң (Shtan) садарға пöгінчелер. Татьяна профессия ӱгредиин алған ус, илееде чыл ателье тутхан, аннаңар пу киректе опыды пар. Кöзідіге кӱннің кисчең кип-азахтардаң пасха, ідöк ӱлӱкӱннерге кисчең кöгенектер паза костюмнар сығарылған.
Сувенирлер аразында “Палитра” полиграфия студиязының ниме-ноолары чапсытхан. Олар Хакасияның предприятиелеріне паза идінӌектеріне пос адын аймах ниме-ноолар: ідіс-хамыс, кип-азах, ручкалар, брелоктар паза пасхазы - пастыра сабландырарға полысчалар. Менеджер Елена Тачееваның таниинаң, студия тöстелгеннең 15 чыл толды. Сувенирлер аразында чыылған сыйыхтар хайиибыс тартхан: пірсінде талған паза хайах полған, ікінӌізінде - кічиӌек кöклöӌек паза тӱӱр. Андағ сыйыхтарны студия позы чыыпча паза чазапча.
Хайди кöрчебіс, городта илееде ниме-ноо сығарылча. Идінӌектер паза предприятие тöстегӌілері оларның ниме-нооларын садызар паза тузаланар чуртағӌылардаңар сағыссырапчалар, аның ӱчӱн прай нимені ипти паза чахсы идерге кӱстенчелер!
Ағбан город устағ-пастааның орындағы идінӌектер кöзідиин иртірер сағыс олаңай ла тöрібеен. Город устағ-пастаа Хакасияның ӱлгӱлерінең хада-пірге “Тазоба” индустрия паркын тöстирінӌе тоғыс апарча.
Автор :
Наталья Сюптерекова Сом Дина Карамчаковани
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
