ИҢ АРТЫХТАРЫНА – 100 МУҢ САЛКОВАЙ
07.12.2022
Хабарлар
«Посха тоғыс таапчатханнар» номинацияның 3-ҷі орынға турысхан фитнес-тренері Лилия Малышева (ортызында)
Хакасия идінҷегі. Улуғ хырлас айының 1-ғы кӱнінде «Хакасия идінҷегі - 2022» марығның салтарлары иділген
С.П. Кадышевтің адынаң чон чайаачызы кінінің кічіг залында тиксі республиканың идінҷектері паза кӧстегліг министерство-ведомстволарның кізілері чыылысханнар.
– Хакасия правительствозы пос киреенең айғасчатханнарға паза предприятиелерге хазна хабазиин тӧреміл чахсыландырча. Сірер пу сурығда ӧткін араласчазар. Піс, пос киреенең айғасчатханнарның сағыc-кӧрізін истіп, оларны нинҷе пар оңдайыбыснаң санға аларға кӱстенчебіс. Пістің алныбыста пір пӧгін турча нооза – Хакасияның экономиказын тилідерге. Аарлығ идінҷектер, прай сағынған сағыстарны толдырарға паза пӧгіннерні чуртасха кирерге алғапчам. Сірернің кӱстенізіңер сылтаанда Хакасия ӧткін тилізін узаратсын, хазнаа урунчатхан сидіксініcтер пісті уламох кӱстіг паза ӧткін итсін! – айланған Хакасия пазы Валентин Коновалов.
Марығның 8 номинациязында тиксі республикадаң 90 азыра идінҷек паза предприятие араласхан. Полған на номинацияда ӱзер сыйыхтығ орын турғызылған. Чиңісчілер марығ статуэтказын паза 100 муң салковай ахчалығ сертификат холға киргеннер, «Городтағы нимес пос кирее» номинациядағылардаң пасха, анда 100 муң салковай орынға турысханнар аразында ӱлестірілген.
Пастағы ікі номинацияның – «Прорыв года» паза «Экспортный потенциал» – чиңісчiлеріне сыйыхтарны республика пазы Валентин Коновалов читірген. «Прорыв года» номинацияда орыннар піди ӱлестірілген: чиңісчі – «Лазер Мед Плюс» ООО (имнег полызығлары), 2-ҷі орын – идінҷек Елена Макарова (юрист полызығлары), 3-ҷі орын – Анна Уалиева (кип-азах сығарызы). «Экспортный потенциал» номинацияда утхан «ЛСТК-Саяны» ООО, 2-ҷі орынға идінҷек Дмитрий Калинин (аал хонии ниме-ноозы) сыххан, 3-ҷі орынға – идінҷек Елена Минчак (тадылығ ниме-ноо).
«Городтағы нимес пос кирее» номинацияда республиканың аал чӧптері араласханнар. Оларның пос киреен тилідеріне хабасчатханы паалалған. Іди сценаа Асхыс, Ағбан пилтірі, Шира паза Орджоникидзе аймахтарының аал пастары сыхханнар, 10-ҷа кізі. Оларның аразында пастағы орынға Тойым аал чӧбі турысхан. Юлия Исмагилова аал чӧбі пазы Евгений Кулешовха 50 муң салковайға ахчалығ сертификат читірген. Ікінҷі орынны паза 30 муң салковайға сертификатты Расцвет аал чӧбі алған, 3-ҷі орынны паза 20 муң салковайға ахчалығ сертификатты – Ӧӧк пилтірі аал чӧбі.
«Хакасияның промышленнигі» номинацияның чиңісчілерін экономика тилізі министрi Виктор Богушевич алғыстаан. Пастағы орынны «Конвейерные технологии» ООО (чир ис-пайы паза металлургия сығарызына тиріглернің сығарызы) алған. 2-ҷі орынға «Стальконструкция» ЗАО (тимір пӱдіріглер) сыххан, 3-ҷі орынға – «Алгоритм» ООО (тимір-бетон ниме-ноо сығарызы).
Хакасияның тиліс чыындызы устағҷызы Денис Пауль «Чииттернің пос кирее» номинацияда чиңісчілерге сыйыхтар читірген. Аның таниинаң, пу номинацияда кӱрезіг хатығ парған, 14 араласчы санға алылған. Пастағы орынға Олеся Пархоменко (тадылығ чиис тимнирі) турысхан, 2-ҷі орынға – Максим Ухварин (арығ ас-тамах сығарызы) паза 3-ҷiзi – «Беркут» ЧОП.
«Посха тоғыс таапчатханнар» номинацияда пастағы орынға кип-азах тікчеткен ус Лидия Голубченко турысхан, «Иб хыриндағы садығ туразы» номинацияда – Татьяна Дмитриева, ол Шира аалда аймах ниме-ноо садығ туразын тутча, паза «Стартап года» номинацияда пастағы орынға идінҷек Екатерина Коновалова турысхан.
«Хакасияның идінҷегі» марығ республиканың экономика тилізіне пос киреенің тузазын кӧзітче. Регион синінде пос киреенең айғасчатханнарға аймах хазна хабазығлары кирілчеткені кӧріндіре салтарларны пирче. Пӱӱнгі кӱнде пістің республикада пос киреенең айғасчатханнар саны 17 муңа чит парир, олар ідӧк аймах налогтар тӧлепчелер паза чонға тоғыс орыннарын тӧстепчелер.
Автор :
Наталья СЮПТЕРЕКОВА
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
