РЕСПУБЛИКАДА – ПИЗІНҶI КИСЛОРОД СТАНЦИЯЗЫ
07.12.2022
Хабарлар
Халғанҷы чылларда пандемия пасталыбысханда, имнег тураларында коронавирус ағырығнаң паза аның соонда сидiк оңдайнаң ағырып, тыныс чидiспинчеткенi илееде кiзiнiң сығысча. Ағырчатханнарның саны ӧс сыхса, пациенттерге кии пирчеткен баллоннар чидiспин, оларны имнирi сидiксiнiстерге ағылҷаң. Аннаңар республиканың имнег учреждениелерiнде кислород пирҷең станциялар пӱдiрiлгеннер. Ирткен чылда Ағбанда Г.Я.Ремишевскаяның адынаң республиканың имнег туразында, Саяногорсктағы паза Харатастағы аймахтар аразындағы имнег тураларында кислород пирҷең станциялар турғызылған. Кiзiлернi имнирiне паза оларның чуртазын ал халарына киректелчеткен кислород пирҷең станцияларны турғызарына Хакасияның резерв фондынаң 54,5 миллион салковай позыдылған.
Пӱӱл часхызын Ағбан пилтiрiндегi имнег туразы андағ станцияа чидiнген. Ол хорадығларға федеральнай бюджеттең 27 миллион салковай позыдылған. Октябрьның халғанҷы кӱннерiнде республиканың чуғынҷах ағырығлар имнег туразында кислород пирҷең станция тоғынып пастаан. Хакасияда имнег учреждениелерiне кислородтығ баллоннар сығарчатхан завод чоғыл, аннаңар оларны Кемеровтаң, Новосибирсктең, Томсктаң паза Хызылчардаң аларға килiсчең. Имнег тураларына кислородтығ баллоннар хаҷан даа пар поларын хайығда тударға киректелҷең. Амды, тiзең, пис имнег туразында кислород пирҷең станциялар тоғынчатханда, республиканың имнег учреждениелерінде кии кирексiнiзi пӧгiл парған тиирге чарир.
– Андағ оборудование имнег тураларына кӱннiң cай киректелче, анзы тыныс чидiспинчеткен пациенттер пар полчатханнаңар. Чоох парча коронавирус чуғынҷах ағырығнаң ағырчатхан пациенттердеңер ле нимес, iдӧк кислород киректел парча пневмониянаң, кискекнең, аймах-пасха чуғынҷах ағырығларнаң ағырчатханнарға, ол санда кiчiг палаларға. Аннаңар, коронавирус ағырығ чох пол парза даа, кислород пирчеткен станцияның кирексiнiзi чiт парбас.
Ӧӧн имҷі Наталья КОГАН
Станцияны тоғындырар алнында имнег туразында чарытхы эмектерiн алыстырыбызарға килiскен. Пiлдiстiг, ол 1980 чыллардох пӱдiрiлген тура, прай ниме иргiлен парған. Ағаа хоза, станциядаң имнег туразынзар, анаң полған на палатазар киинi тарадар ӱчӱн, ӧнетiн кӧрiлген ниме-ноо тартылған. Оборудование аларына Россия правительствозы резерв фондынаң 33 миллион салковай позытхан. Киректелчеткен пӱдiрiглерге республика бюджедiнең хоза 34 миллион салковай пирiлген, – чарытхан ӧӧн имҷi Наталья Коган.
Ӧӧн имҷiнiң чооғынаң, имнег туразында кислород пирчеткен станция чох полғанда, пациентке кии киректелзе, олар кӧзiр чӧрҷең улуғ нимес кислородтығ концентратнаң тузаланҷаңнар. Олар пандемия тузында алылтыр. Че ол оборудование тоғынчатханынаң кислород пирчеткен станцияа турбинча, ағаа хоза, ол чарытхы сетьтерiне улуғ нагрузка пирче. Имнег туразына турғызылған пос алынҷа тоғынчатхан кислород станциязы минутада 1000 литр кислород сығарча. Имнег туразы пасха регионнардаң садысчатхан киилiг баллоннарнаң мыннаң мындар тузаланарох, анзы реанимациядағы кiзiлерге баллоннарда тимнелген кислород ла чарапчатханынаң палғалыстығ.
Автор :
Наталья ТЮКПЕЕВА
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
