ТУРЫСТЫҒ СӦБІРЕДЕ – ТУРЫСТЫҒ ПАЛАЛАР
07.12.2022
Хабарлар
Сыйыхтас. Хакасия правительство туразында республика пазы Валентин Коновалов Леонид паза Наталья Мишаковтар сӧбiрезiне «Родительская доблесть Хакасии» медальны пайрамни читiрген
ПIСТIҢ РЕСПУБЛИКАДА «РОДИТЕЛЬСКАЯ ДОБЛЕСТЬ ХАКАСИИ» МЕДАЛЬ 2012 ЧЫЛДАҢ СЫҒАРА ПИРIЛЧЕ. ОН ЧЫЛ АРАЗЫНА АНДАҒ ПӦЗIК ПАЗА ТАНЫҒЛЫҒ СЫЙЫХНАҢ КӦП ПАЛАЛЫҒ 20 АЗЫРА СӦБIРЕ ТАНЫХТАТХАН. ОЛ СӦБIРЕЛЕР ПАСХАЗЫНА ТУРЫСТЫҒ КӦЗIДIМ ПОЛЧАЛАР, ПАЛАЛАРЫН ЫНАҒЛАСТА ПАЗА ПААРСАСТА ӦСКIРЧЕЛЕР.
Таныхтирға кирек, республика правительствозының ӧӧн пӧгiннерiнiң пiрсi ол кӧп палалығ сӧбiрелерге иркеҷектерiн ӧскiрерiне чахсы оңдайлар тӧстирi полча. Аннаңар регионда сӧбiрелерге аймах хабазығлар кӧріл парған. Ол хабазығлар полызиинаң республикада кӧп палалығ сӧбiрелернiң саны чылдаң чылға хозылча. 2018 чылда Хакасияда 8 муң азыра кӧп палалығ сӧбiре полған полза, ирткен чылда андағ cӧбiрелернiң саны 10 муң азыра саналған. Мыннаң мындар турыстығ сӧбiрелернiң саны хозыл ла турарына iзенербiс.
Пӱӱл Хакасия пазы Валентин Коновалов танығлығ медальны Асхыс аймаандағы Асхыс аал чуртағҷылары Леонид Николаевич паза Наталья Владиславовна Мишаковтарға читiрген. Леонид Асхыс аймаанҷа ОМВД-ның пастығы, полицияның подполковнигi полча, Наталья – УФСИН-да істенче, iстiндегi службаның майоры. Ирепчi, право хайраллаҷаң органнарда тоғынып, cӧбiреде палаларын iдӧк чуртаста орта чолҷа парарға ӱгретче. Мишаков ирепчi хоныхта, пiлiзiзіп, паарсазып, 17 чыл чуртап парир. Олар, маң чох тоғыста iстенчетселер дее, палаларына улуғ хайығ салчалар. Органнарда істенчеткеннер удаа орайға теере тоғынчалар паза дежурстволарға сыхчалар, че Мишаков ирепчi ибдегi тоғысты паза сӧбiре кирексiнiстерiн хаҷан даа маңнаныстығ толдырча. Олар пис пала ӧскiрчелер. Улии Арина 16 частығ, 11 класста ӱгренче. Пірге хазна сыныхтағларын тударына тимненчетсе дее, хынчатхан волейбол секциязына сыбыра чӧрче паза марығларда араласча. Артур 16 частығ, ол Россия МВД-зының Санкт-Петербургтағы Суворовскай чааҷы училищезiнде ӱгренче. Александрға 11 час, ол аймах предметтерҷе олимпиадаларда ӧткiн араласча паза олаңай кӱреснең айғасча. Аделина 9 час толдыр салған, теелбек салҷаң кружокка чӧрче. Очы хыс Анюта 6 частығ, «Тополек» олған садынзар чӧрче. Кiчiг дее полза, бассейнзер чӧрерге хынча.
Леонид паза Наталья Мишаковтар сӧбiреде прай тоғыстарны паза палаларнаң айғазарын чӧптезiп ӱлесчелер. Улуғларын ӧскiрерiнде чииттерге аға-ууҷалар хабасчаң полтырлар, че палалар ӧзiбiскенде, iҷе-пабазына туңмаларын кӧрерге полысчалар. Улуғ сӧбiреде сағыссырастар даа кӧп, че харындас-пиҷелер ынағлазып чуртаза, iҷе-пабазына чахсы полысчылар полчалар.
Кӧп палалығ iҷе Наталья Мишаковадаң хайди тоғыста маңнаныстығ тоғынчатханнаңар паза палалар ӧскiрерге туc таапчатханнаңар сурғам. Паза хығырығҷыларға часкалығ сӧбiренiң чазыттарынаңар чоохтап пирерге сурынғам.
– Тоғызым тоозыл парза, минiң ибде iкiнҷi сменадаң «iҷе тоғызы» пасталыбысча, – кӱлiмзiреп чоохтаан Наталья Владиславовна. – Сыннаң чоохтаза, палаларыбыс ӧс парғаннар, улуғлары кiчiглерiнең айғасчалар. Ағаа хоза, иркеҷектерібісті нандырығлығ тудынарға ӱгретчебiс, аннаңар кiчiглерi дее чахсы тудынчалар.
Пiстiң часкалығ сӧбiре тiп санапчам. Ӧӧнi – ол iҷе-пабаның иркеҷектерiне хынызы паза пiстiң хонғанымнаң удур-тӧдiр улуғласханы. Палаларға хынызыбысты читiрерге паза амғы туста чуртаста орта чол таап аларға полызарға кӱстенчебiс.
Хакасия пазы Валентин Коновалов Леонид Николаевичтi паза Наталья Владиславовнаны iҷе-паба «тоғызы» ӱчӱн, улуғ паза ынағ сӧбiренiң аарлазын хайраллапчатханнары ӱчӱн алғыстаан. Олар пасхазына кӧзідім полча тiп таныхтаан. Республика пазы сӧбiрее часка, хазых паза хаҷан даа пiлiзiзіп, ынағлазып чуртирға алғаан.
Автор :
Наталья ЧЕБОДАЕВА
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
