Наа чапсых ойын тимнелче
29.11.2022
Хабарлар
Культура. Ирткен неделяда В.Г. Чаптыковтың адынаң Хакас филармониязы «Алтын Чӱс» операның чабых кӧзідиин иртірген. Пір чардыхтығ ойын Президенттің грантына турғызылған.
Алтын Чӱс алып чир ӱстӱнңе чӧріп, Алып Ханның сӧбірезі пырозы чох ӧдірт салғанынаңар піліп алча. Ол мындағ чабалны иткен Хара Ханны, Хуу Хатты чох идерге сағыныбысча. Алтын Чӱске Алып Ханның кічіг палазын тірілдіріп алар оңдай парын чоохтап пирчелер. Паланы тірілдіріп алар ӱчӱн, алыпха алтын пӱрліг хазыңны таап аларға кирек. Аймах сидіксіністерні тобырып, Алтын Чӱс Алып Мӧкені, Алып Ханның оолғын пу чирге айландырча. Піди тиліп пастапча ойынның полтазы. Кӧрігңілер ойында алыптарның кӱрезиин, хара сағыстығ матырларның кӧйтігін, аймах хайхастарны кӧрерлер.
«Алтын Чӱс» алыптығ нымах хоостыра пазылған ойын турғызарында Хакас филармониязының симфоническай оркестрі (аннаң устапча Хакасияның искусстволарының саблығ тоғынҷызы, Хакасияның чон артизі Вячеслав Инкижеков), «Кӱн сузы» теелбек ӧмезі, «Каданс» хоры араласханнар.
Ӧӧн матырларны Хакасияның чон артисттері Артур Марлужоков, Мария Янгулова, республиканың саблығ артисттері Ольга Васильева, Наталья Фоменко, Радж Мандаржап, Молат Ах хасха ойнапчалар.
Таныхтирға кирек, операда ойналчатхан кӧглер Семён Прокопьевич Кадышевтің «Алтын Чӱс» алыптығ нымахты толдырчатханынаң пазылған. Мында чон кӧӧн классическай музыкаа килістіре пазарында улуғ тоғыс иртірілген. Кӧглерні симфоническай оркестрнің кӧгңілері Ольга Кох паза Ирина Жихарева пасханнар.
Кӧрігҷілер пу операны 2023 чылның апрель айында кӧрерлер.
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
