«Благодарение» полызығлығ чыындының сыйиина турысхан ӱгретчiлер

Сыйыхтас. Хакасияда хакас тiлiн тилiдерiнде улуғ хозым итчеткен ӱгретчiлер, ученайлар «Благодарение» полызығлығ чыындының сыйиина турысханнар

Пӱӱл марығда 13 ӱгретчi араласхан, оларның пизi чиңiсчi полыбысхан. Олар Хакасияның ӱгретчiлер узын тилiтчең институттың наука тоғынҷызы Алевтина Николаевна Балгазина, Н.Ф.Катановтың адынаң Хакас национальнай гимназияның хакас тiлi ӱгретчiзi Елена Петровна Сагатаева, ӱс чулдағы школаның пасталығ класстар ӱгретчiзi Лариса Леонтьевна Чекурова, Кiчiг Арбыттағы ортымах школаның хакас тiлi ӱгретчiзi Валентина Ивановна Артонова паза Асхыстағы лицей-интернаттың хакас тiлi ӱгретчiзi Ирина Васильевна Идимешева. Олар хакас тiлi ӱгредиине наа методикалар кирчелер, учебниктернiң паза ӱгредiг пособиелерiнiң авторлары паза автор-составительлерi полчалар. 

Хакасияның правительство туразында республиканың ӱгредiг паза наука министрiнiң тоғызын толдырчатхан Анатолий Бутенко паза «Благодарение» полызығлығ чыындының директоры Тарика Торокова чиңiсчi ӱгретчiлерге ахчалығ сыйыхтар паза дипломнар читiргеннер.

– Пiс Хакасияның ӱгредiг паза наука министерствозынаң хада пу марығны нинҷе-де чыл изере иртiрчебiс. Полған на чыл аның араласчыларының саны ӧзiп одырча. Пiс пис иң турыстығларны таллапчабыс. Чиңiсчiлернi аймах-пасха кӧстеглерҷе паалапчабыс. Марығның ӧӧн пӧгiнi – тӧреен тiлнi тилiдерiне улуғ хозым итчеткен ӱгретчiлерге хабазары, – чоохтапча «Благодарение» чыындының директоры Тарика Торокова.

ӱгретчiлерге хабазарынаң пасха, «Благодарение» чайаачы марығлар иртiрче, аймах проекттер чуртасха кирче. Хакасия пазының орынҷызы Михаил Побызаков чыынды хакас тiлiн, культуразын тилiдер тоғысты тiспен апарчатхан ӱчӱн алғызын читiрген.

– Сiрер аймах проекттер чуртасха кирчезер, марығларда чарғыҷы полчазар. Мыннаң мындар iдӧк, хада-пiрге тоғынып, пiс пiр тоғыс апарарбыс, – чооғында таныхтаан Михаил Анатольевич.

Михаил Побызаков Асхыс аймаандағы ӱс чул аалны олтырых тiп таныхтаан, хайда амғы туста тӧреен тiл хайраллалча. Тиктең нимес чиңiсчiлер санында пу школаның пасталығ класстар ӱгретчiзi Лариса Чекурова полған. Лариса Леонтьевна – хакас тiлi учебниктерiнiң, программаларның, тоғынҷаң тетрадьтарның автор-составительi. Iдӧк ол тиксi Россия синiнде иртчеткен мастер-класстарның араласчызы полған.

– Халғанҷы чылларда пiстiң аалдағы олғаннар орыс тiлiнең чоохтазарға кӱстенчеткеннерiн сизiнчебiс. Ибде улуғлар пос аразында тӧреен тiлнең чоохтасчалар, палаларынаң, тiзең, орыстаcчалар. Пу сурығны пiс сӧбiрелернең кӧдiрчебiс. Амды олған пос тiлiн пiлер ӱчӱн прай оңдайлар пар. Пастағы паза пизiнҷi класстағы ӱгренҷiлерге тiл марии иртiрiлче, «Благодарение» полызығлығ чыынды хабасча, учебниктер сығарылча паза даа пасхазы, сӧбiрелер ле пiске хабас пирген ползалар, чахсы поларҷых, – таныхтапча Лариса Чекурова.

Пӱӱл пастағы класcтағы ӱгренҷiлер аразында ирткен марығда ӱс чулдаң кӧп олған араласхан, олар прайзы чиңiс тутханнар!

Пӱӱнгі кӱнде республикада хакас тiлiн хайраллап халар ӱчӱн улуғ тоғыс апарылча: хазна программазы алыл парған, хакас тiлi кабинеттерi тӧстелче, учебниктер сығарылча, интернетте приложениелер тӧстелче, халых организациялар  пу кӧстегҷе кӧп тоғыс апарчалар. Прай ниме – постаң, сӧбiредең...