Брифинг. Республиканың чааҷы комиссариадында кӱскӱдегі хығыртығ пасталчатханына чарыдылған брифинг ирткен 

Брифингті иртіргеннер Хакасия пазының орынҷызы Юрий Курлаев паза республиканың чааҷы комиссарының тоғызын толдырчатхан подполковник Николай Видяйкин.

Хайди искірген Юрий Курлаев, пӱӱл 1 ноябрьдаң Россия президентінің указы хоостыра Тирігліг кӱстерзер чааҷыларның срочнай службазына кӱскӱдегі хығыртығ пасталча. Пу чыл чардыхти мобилизация иртірілген сылтаанда, хығыртығ пір айға соона чылдырылған. Амды мобилизация мероприятиелері тоозыл парған, прай муниципалитеттер турғызылған пӧгіннерні толдыр салғаннар.

Анда алынҷа сурығлар илееде сығысхан, ам ол читпестерні санға алып, чааҷы комиссариаттарындағы имнег комиссиялары прай сыныхтағларны чахсы иртірерлер. Чааҷы частьтарынзар хазии пик ооллар ла ызылар. Ирткен чылларда Хакасиядаң парған призывниктернің, хазии уйан полып, пір дее кізізi нандыра айландырылбаан. Часхыдағы хығыртығда турғызылған прай пӧгіннер толдырыл парған.

Ам чааҷы службазына 18 – 27 частығ, запаста полбинчатхан, отсрочка чох кізілер хығыртылчалар. Хакасиядаң службаа пылтырғыдаң асхынах кізі хығыртылар, амғы кампанияда 600 призывник службаа парар. Оларның 30 %-і сухопутнай войсколарзар ызылар, 20 % – Кии-хан тигір кӱстерінзер, 10 % – Чаа-талай флодынзар, 9 % – стратегическай кӧстегліг ракета войсколарынзар, 7 % – национальнай гвардия войсколарынзар, 7 % – Кии-десант войсколарынзар, 17% – пасха войсколарзар.

Илееде оол Хакасияда орныхчатхан чааҷы частьтарында служба иртерге сағынча, оларның кӧңні iдӧк санға алылар. Призывниктерге служба апарарға кирек ниме-ноо, кип-азах пирілер. Олар ӧнетін чаа операциязында аралазарға ызылбастар, службаны пір чыл иртерлер. Аны тооссалар, оларның контрактча чааҷы службазына парар алай чаа училищезінзер кірер оңдай полар. Амды оларның паба-ағалары чаа операциязында араласчатханда, срочнай служба ирткеннер оларның кистінде чазын чӧрбестер, неке. Амғы чииттер патриоттар полчатханына ізенчебіс.

Хығыртығ кампаниязын турыстыра иртірербіс, республиканың прай муниципальнай пӱдістерінде хығыртығ комиссиялары тоғынып пастабыстылар.

Николай Видяйкиннің чооғынаң, Хакасияның призывниктері Россияа ӱр ниместе піріккен наа регионнарда орныхчатхан чааҷы частьтарынзар ызылбастар, ӧнетін чаа операциязында араласпастар. 200 азыра оол Центральнай чааҷы округындағы войсколарда служба иртер. Тимненізі пӧзік чииттер Кии-десант войсколарынзар алай национальнай гвардия войсколарынзар ызыларлар. Хакасиядаң пастағы команда 10 ноябрьда ызылар, хығыртығ кампаниязы 31 декабрьда тоозылар.

Республиканың чааҷы комиссариадындағы чығҷаң пунктта призывниктерге чааҷы кип-азаа, ізіг чиис, банк карталары, сим-карталар, ідӧк пос гигиеназына кирек ниме-ноо пирілер. Служба иртер орынзар парар чорых тузына азыранҷаң ас-тамах пирілер.

Сығысчатхан прай сурығларҷа Хакасияның чааҷы комиссариадында тоғынчатхан 8(3902)34-13-08 «ізіг линия» телефонынҷа алай муниципальнай пӱдістердегі военкоматтарзар айланарға чарир.