Чыылығ. Хакасияның правительство туразында республика пазының  социальнай сурығларҷа орынҷызы Михаил Побызаков профильнай министрлернең паза город-аймахтар пастарынаң чыылығ иртiрген. Ол ӧкiстернің чурт суриин пӧгеріне чарыдылған.

Хакасияда тиксi ӧкiстер санының 95 %-i iҷе-пабалығ, че ачығ суға тартылып паза  пасха даа сылтағларнаң олар iҷе-паба праволарын алдыртыбысханнар. Андағларның палалары социальнай ӧкiстерге саналчалар. Че хазна полған на ӧкiске алай іҷе-паба хайии чох халған палаа чуртха чидiнерге полызарға кирек. Килчеткен 2023 чылда республика бюджедiнде оларға чурт аларына 500 миллион салковай кӧрiл парған. Хомзынысха, ӧкiстер саны ӧсче, аннаңар чуртха теес хызырылбинча.

Пӱӱл ӧӧркi Чӧптiң чарадиинаң ӧкiстернiң чурт суриин пӧгерге, хоза ӧнетiн чурт сертификаттары тузаланысха кирiлген. Республика бюджедiнең 500 миллион салковайдаң 250 миллион салковай чурт сертификаттарына парыбызар. Пiр сертификат 2 миллион 400 муң салковайға пирілер. Аннаң тузаланып, ӧкiстер республиканың хайдағ даа городында паза аймаанда чурт садызып алар оңдайлығлар. Муниципальнай пӱдiстер чурт пӱдiрзелер алай садыссалар, ӧкiстерге ӧӧнiнде 33 квадрат метр килiсче. Чурт сертификады полызиинаң олар хай син улуғ тура аларын постары кӧрерлер, чидiспинчеткен ахчаны постары хозарлар. Пу сертификаттар ӧкiстернiң чуртха теезiн хызырарға полызар тiп iзенiс пар. Аннаңар килчеткен чыл тӱзiмнiг поларына iзенчелер ӱлгӱдегiлер. Сағам сертификатха тузаланыста ла полған чуртты садызып алары кӧрiлче, че тура пӱдiрерi паза анда тыхтағ тоғыстарын иртірерi хыйа идiлбинче. Полған на муниципальнай пӱдiс чурт садызарында сидiксiнiстерге урунча. Олар республика пазының орынҷызына читiрiлгеннер. Прай ол ағырсымнығ сурығлар мыннаң мындар ӱзӱрiлер, оларны пӧгер оңдайлар кӧрiлер.       

Пӱӱл чурт сертификадынаңар чарадығ алылған соонаң аннаң iкi кiзi тузаланған: Таштып  паза Орджоникидзе аймахтарында. Чурт сертификадынаң 23 частығ, чарғаа тартылбаан, тоғынчатхан, сӧбiрелiг паза прай саринаң посты чахсы кӧзiтчеткеннер ле тузалан поларлар. Амғы туста Алтай аймаанда алты ӧкіс аннаң тузаланар кӧңнiн искiрген. Олар постарына килiстiре чурт кӧрглепчелер. Сертификатнаң пiр чыл аразына тузаланыбызарға кирек. Чурт сертификады хоостыра пирілчеткен ахча сині полған на кварталда  алызары кӧрiлче. Анзы чурт рыногындағы алызығларнаң палғалыстығ полар.