«Демография» национальнай проекттiң «Пала тӧрізе сӧбiрелерге ахчалығ хабазығ» регион проектi хоостыра ӱзiнҷi пала ӱчӱн пособие тӧлелче. Ол тӧлег 2020 чылдағы 1 январь соонаң тӧреен палаларға кӧрiлче. Ай сай пирiлчеткен тӧлегнi тӧбiн парыстығ сӧбiрелернiң алар правозы пар. Сӧбiреде полғанының на ортымах парызы iстенчеткен улустың айда чуртап парыбысчаң иң асхынах iкi хати синiн аспасха кирек. Хакасияда андағ син - 30 952 салковай.

- Хакасияда амғы туста тӧлегнi 3 213 сӧбiре алча, тиксi ахча синi 348 миллион салковайға тиңнелче. Ол санда федеральнай бюджет ахчазы - 313,5 миллион салковай, республика бюджет ахчазы - 34,8 миллион салковай. Чоохтирға кирек, пу тӧлег сурыныс пiчии хоостыра тӧлелче, пособие алар ӱчӱн, пала тӧреен соонаң алты ай аразына айланарға маңнанарға кирек.

Палаа пiр час тол парған полза, паба-iҷелерге постарына МФЦ-зар алай чонға социальнай полызығ пирҷең управление пӧлиинзер айланарға киректелче. Анда тӧлегнi палаа iкi час толғанҷа тӧлирдеңер наа сурыныс пiчиин пир саларға. Таныхтирға кирек, пу тӧлег сурыныс пiчии пирiлген кӱннең тӧлелче, аннаңар андағ пiчiкнең тузында айланарға кирек, - чоохтаан республиканың iстенiс паза социальнай арачыланыс министрi тоғызын толдырчатхан Андрей Петров.

Чоохтирға кирек, пособие синiне чыл сай 1 январьдаң хоза индексация сурыныс пiчии чох идiлче. Iди индексация республикада айда чуртап парыбысчаң син чыл сай алысчатханы хоостыра саналча.