Чобағлығ митинг. Ағбанда орныхчатхан 5-ҷі алынҷа Познанскай тимір чол бригадазының актовай залында Украинада чуртазын пир салған чааҷы Егор Алжибаевті халғанҷы чолға ӱдескеннер

Чааҷылар частьының актовай залында чон толдыра чыылысхан. Украинада иртірілчеткен ӧнетін чаа операциязында аралазып, чуртазын пир салған Егор Алжибаевті халғанҷы чолға ӱдезерге кӧп хакас чон андар килтір. Егор Владимирович позы Паза пилтірі аалдаң, ол Паза аалларының прай чуртағҷылары пеер килгенге тӧӧй полған, ағаа хоза, Ағбандағы чуртағҷылар Егорны ӱдезерге килгеннер. Iдӧк аннаң хада служба ирткен чааҷылар залда полғаннар.

Актовай залның сценазында, пӧзік орында, чабых хомды турча, аның ӱстӱ Россияның паза Хакасияның флагтарынаң чабылых. Iдӧк сценада турғызылған Россияның паза Хакасияның флагтары хыринда аарластығ хадағда чааҷылар турғаннар. Хомдының азаанзар Егорның сомы хызылых, анда свечі кӧйче. Сцена алнында уғаа кӧп венок паза чахайах салылча. Хомды ибіре чааҷының туғаннары одырғаннар.

Егор Владимирович Алжибаев, 5-ҷі алынҷа Познанскай тимір чол бригадазында автомобильлер взводының водительі полып, контрактча служба иртчеткен. Украинада ӧнетін чаа операциязы пасталғанда, ол андар пастағы кӱннердӧк ызылған. 30 сентябрьда, Украинаның тирігліг кӱстерінің артиллерия атызы алтына кіріп, чуртазын пир салған. Ағаа 36 час полған, ол Мужество орденіне турысхан (ӱреен соонда).

Траур митингі пасталар алнында Россияның паза Хакасияның гимннері толдырылғаннар. Пастағызын сӧс Хакасия пазы Валентин Коноваловха пирілген. Ол республика правительствозы паза позының адынаң Егор Алжибаевтің туған-чағыннарына хомзынызын читірген:

– Пӱӱн прай Хакасияа чобағлығ кӱн. Егор Владимирович Алжибаев, Украинаның, Донбасстың, Херсонның паза Запорожьенің амыр чуртағҷыларын, Чир-суубыстың ӱстӱндегi амыр тигірні арачылап, чуртазын пир салған. Ол олаңай кізілерні, палаларны ӧлімнең арачылаан. Піске ол толдыр полбас чідіріг, хаҷанға даа чахсы кӧзідім полып халар. Кирек сӧстер дее табарға сидік. Егорның туған-чағыннарына хомзынызым читірчем, сірернең хада прай Хакасия чобалча. Піс аны ундутпаспыс. Матырға сабланыс хаҷанға даа!

Регион устағҷызы, чооғын тоозып, хомдызар чахайахтар салған, ибіре одырчатхан полған на туғанын хуҷахтап, часхарчатхан сӧстерін читірген.

Iдӧк митингте чоох тутханнар Хакасияның ӧӧркі Чӧп кнезінің орынҷызы Евгений Молостов, Ағбан город пазы Алексей Лёмин, Ағбандағы чаа гарнизонының пастығы, полковник Андрей Баринов, тимір чол бригадазында Егор Алжибаевнең хада служба апарған улуғ лейтенант Артём Поркаев паза ӧнетін чаа операциязында Егорнаң хада чааласхан Иван Чебодаев. Иванның чооғынаң, ол Егорнаң хада Украиназар пір кӱнде парған, окопта хада узуҷаңнар, iди чарым чыл анда хада полғаннар, амды арғызын халғанҷы чолға ӱдезерге килісче.

Матырны Ағбандағы сыыратта Чааҷылар сабланызы аллеяда чыып салғаннар.