Тоғазығ. Чарыс айының 5-ҷі кӱнінде Хакасия пазы Валентин Коновалов ӧӧркі Чӧп кнезі Владимир Штыгашевнең хада мобилизацияа тартылғаннарға паза оларның сӧбірелеріне хабазығларның ікінҷі чардығын алар оңдайларны ӱзӱрділер 

Мобилизацияа тартылғаннарның сӧбірелеріне амох хабазарға киректелчеткеннеңер республика правительствозы хабазығларның пастағы чардығын чарадыбысхан. Оларны чарадарына бюджетсер алызығлар кирері киректелбеен, ахча резерв чыындызынаң позыдылар. Чоох парча пір саңай тӧлелер ӱс хабазығдаңар: 10 муң салковай полған на палаа, ол санда пастағы профессия ӱгредиин алчатхан, че 23 час толдырғалахтарға; 10 муң салковай полған на сӧбірее; 10 муң салковай полған на мобилизацияа тартылған чуртағҷаа. Пу тӧлеглерні Хакасияның істеніс паза социальнай арачыланыс министерствозы пуох неделяда тӧлеп пастир, килчеткен неделяа прай тӧлебізерге кирек тіп искірче Валентин Коновалов.

Хоза хабазығларға ідӧк льготалар кирілген: чурт-коммунальнай полызығларға, тиксі тыхтағ ӱчӱн тӧлеге, хара тасха хорадығларны айландырарға, олған сады паза паланың школада азыранчатхан ӱчӱн тӧлеглерге, хоза ӱгредіг ӱчӱн, пала хазиин пиктиріне, служба иртібіскеннерге тикке реабилитация. Республика ӱлгӱлері прай хабазығларны чааҷылардаң кірген айланыстарға тӧстеніп тимнееннер. Олар Омскта тоғазығ тузында Хакасия пазы Валентин Коноваловха сурыныстарын постары читіргеннер. Че республика пазының кӧрізінең, ол хабазығ читкіҷе нимес, аннаңар Хакасия правительствозы ­ хабазығларның ікінҷі чардығын тимнеен. Оларны чарадар ӱчӱн, регион бюджедіне алызығлар кирерге паза Хакасияның ӧӧркі Чӧп депутаттарының чарадиин аларға киректелче.

– Піс Владимир Николаевичнең мобилизацияа тартылған полған на чуртағҷының сӧбіре чуртазы прай саринаң арачылалых поларға кирек тіп санапчабыс. Пӱӱн прай халыхтар кӱстенізін піріктірерге паза аны мобилизацияа тартылғаннарның сӧбірелеріне читірерге кирек. Пістің кӱзібіс – пірге тудынғаныбыста, ол кӱсті, тізең, армиябысха хабазарына кӧстирге киректелче. Республика парламентіндегі прай фракцияларның пір кӧрізі поларға, чарадығ пір ӱннең, депутаттың хайдағ партияа кірчеткенін санға албин, алыларға кирек.

Ӧӧркі Чӧп устағ-пастаа депутаттар чағынғы сессияда бюджетке алызығларны чапчаң алар ӱчӱн прай ниме итче. Владимир Штыгашев ізендірген, бюджетке алызығлар пір саңай ікі хығырығда алылар.

– Піcтің пӧгінібіс – полған на сӧбірее хабазарға, – теен ӧӧркі Чӧп кнезі.

Хакасия пазы ідӧк пу неделя тоозылғанҷа кӧстегліг министерстволарға хабазығларның ікінҷі чардығын аларына киректелчеткен пічіктерні тимнеп саларға чахаан, анаң оларнаң республика парламенті танызар паза ӱзӱрер.

Устағҷылар ідӧк республика синінде кирілчеткен хабазыға хоза, полған на сӧбіренің кирексінізін санға алып, алынҷа хайыға аларға киректелчеткенінең чарасханнар. Военкоматтар паза муниципалитеттер хада-пірге социальнай паспорттар тимнеен соонаң сӧбiрелерге хайдағ алынҷа хабазығ киректелчеткені іле кӧрінер.